Jona 3
3
Ninevi Thenou Kedikelie
1Jihova die va kenieu Jona ki vor di sie, 2“Sieliecie, Ninevi nadi kezhau nu volie, di a n ki kepu dieko pie puo ki pucie.” 3Süla Jonae sielie di Jihova pukeshü mhiei tuo Ninevi nu vo. Ninevi-e nadi kezha se puo, puo kezha zha se chatuo. 4Jonae nadiu nu lelie, sidi zha puo chatuo tuoshü, süsie puo shiekhoui di, “Ninevi pekawaketuo zha hiedia bakecü zote!” 5Sitse Ninevimiako Ukepenuopfü pelelie, sidi uko kezhakecü pete, gakhropfhe dzie di mevota.
6Siro dielieu Ninevi kediu ki vo tse, puoe puo kediba nunu sielie, di puo boulie rhuowa, sidi gakhropfhe se puo whelie tsiu mige nu bata. 7Süsie puo Ninevi nu mha pu di: “Kediu mu puo pehüko thezho-u khashü: Themia kehoupuorei morei khunuo rei, tekuo morei thukro-u shierei u bu mhapuorei cülie lho. Süko vachü lho, morei dzü rei krielie lho. 8Themiako mu khunuo pete bu gakhropfhe dzielie, sidi uko bu shie petopie Kepenuopfü ki shülie. Mu pete bu u kesuo kechü nunu mu u dzie nu mha pekatuoü bakecü pete nu rüreiliecie. 9Kepenuopfü rürei vor mu puo noukedilie, tsiu puo noupfhü nunu rüreita; sidi u bu kata molie rei si momu.”
10Siro Ukepenuopfü uko mhathoko ngukeshü ki, kimhie di uko kesuoko nunu rüreilie shikecü kenguki, Kepenuopfüe uko gei kepeka se vortuo üdi pukeshü nunu puo nou rüdita; sidi puo süu chü mota.
Currently Selected:
Jona 3: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More