Ibriko 9

Kijü Hau mu Teigei Rüsuo

1Siro dietseidiekho kerieu nu zorei kerüsuo zhoko nyi mu kijü nu rei kemesachüu nyi. 2Kekreilamonyü rüsuopfheki puo chülie, süu kerieu, mu sünu mitubau, mizhüu, mu Kepekieniekhrüdau khapie ba; hau üse Kemesachü üya. 3Siro süsieu nu pfhe lhapie khakecü bouu üse Kemesa sie rei Mesa iya. 4Sünu kethengu kethe suna ruosuobau mu dietseidiekhobouu, pete suna pie dakecüu, suna pie kechü li manna pie shüse kebau, Aron the puonyü the zo parketau, tsiu dietseidiekhokelie tsiekranie rei pie zhü; 5sümho gei zayie kechü cherubnie unie shü kelhapie ngukemezhiebau whepfü ba. Tsie mha hako dze pede pu balie lhote.

6Mha süko keselie di zievoko bu rüsuopfheki kerieu nu le ruosuo chü seiya; 7derei zievokezhatho-u rübei kibou kenieu nu lelie kevi zo, siro puo rei cie puo nu va puo rübei leya, mu puo süki thezie se di puo thuo puo la mu themiako le kemo nunu kephouma chükewako la le ruosuo chüya. 8Haha la rüsuopfhekiu nu kibou kerieu keba chie kemesatho chüu nu leketuo cha khrüshü mo zo üdi Kemesa Ruopfü thuo thashüte. 9Hau pie tsiedo teiu la zasi#9:9 Gk Dievi. puo chüshü, sütei ki mia puoe puo mha khakeshü mu khunuo dukhripie ruosuo chükeshüko la puo nou chü pevi tseilie kenjü, 10derei mhako chüpie puotoulieketuo teiu vor kemochie kecükekrie mu u chü kemesaketuo zho kro puo zo.

11Derei Khrista vor di mha kevi vorketuoko#9:11 Hanu Grik dielouu ro Dietseidiekho mu medo si. mho zievokezhatho-u chülieta tse, puoe (thedzie üse chü kemo, süusü tsiedo mhachükelieko mhie mo di), rüsuopfhekiu ki zhakuo mu vi tseikecüu nu,#9:11 Gk Vi tseikuo. 12puoe vapuochü Kemesatho Chüu nu le ruosuo chüwate, sünu temvü mu mithunuo zie se mo, derei puo thuo puo zie se le di kechachie la rhakelie se vorshü. 13Kekreilamonyü temvü tsiu thudo zie mu thuünuo thekeshü mige kegepie themia u perhuwaketako chü kemesalieya liro, 14süki rei Khrista zieu we u chü kemesakuoshü motuo me, puoe kechachie Ruopfüu geinu puo thuo puo chüpie pejolie kelho chü Ukepenuopfü tsükeshü la, sidi kesia mhatho chü tuoketa nunu u chü kemesawa di u bu rhei tuoyakezha Ukepenuopfü lie chüketuo la.

15Hau la puo dietseidiekho kesa nu thedo nu kethau chü, sidi kielieketako bu phrapie kezhü kechachie baketuo kayie welie vite, kekreilamonyü dietseidiekho kerieu#9:15 Hanu Grik dielouu nu Dietseidiekho mu medo si. khrükhro ketuo teiki rei jo tuoketako rhalieketuo la puo siashü zo. 16Siro mha pupie mia tsükeshü die puo#9:16 Hanu Grik dielouu nu Dietseidiekho mu medo iya. nyi üro, puo se sie nu kekreiu bu süu ngulieya. 17Kekreilamonyü phrakeshüu#9:17 Hanu Grik dielouu nu Dietseidiekho mu medo si. se sie nu süu puo kekuo nyitaya, derei puo chükeshüu rhei keba chie we mhapuorei chülie lho. 18Sütuoi dietseidiekho kerieu zorei thezie sa mo di chülie mo zo. 19Kekreilamonyü Mosae thezho-u medzi di diekhakeshü pete pie themia peteko ki pukeshü ki, puo thudonuo mu temvü zie pie dzü sa kereilie mu chümielo kemene pie hisop nha gei phakelieu petselie di kegepie thezho leshüdau mu themiako va phreshü zo. 20Sidi sie, “Hauha Ukepenuopfü nieko ki die khakeshü dietseidiekhokelie zieuwe,” iya. 21Sükemhie di thezieu kegepie rüsuopfhekiu mu rüsuo nu seyakezha mhabou pete rei vashü. 22Ketho, thezho-u nu zorei thezie se mha pete khre chü kemesalieya, mu thezie sa mo di kephoumako valieya mo.

Khrista Seu La Kephouma Vakelie

23Siro teigei keba rhi hako thuo rei mha süko se chü kemesalie morosuota ro, teigei keba vieko zowe süko ki rei ruosuo kevi se morosuokuo zo. 24Kekreilamonyü Khrista zowe themia dzie se chükelie kemesachüu nu le mo, süu ketho-u rhi puo zocü la, derei puo teigei le di tsie u sou chü vo Ukepenuopfü mhodzünu bate. 25Sizomonyü zievokezhatho-u puo thuo puo zie monyü perinuo zie se di teiciekepra kemesachüu nu le sei tuoyakezha tuoi Khrista zowe tsiemelie puo phou pie ruosuo chüchü balie lhote; 26simotuo ükecü sie kijü chülie tsenu vor kenuotsa ketso puo tsiemelie kemezhie morosuota zotuo. Derei puo mia mhingu chü vor di kephouma valieketuo la puo thuo puo pie vapuochü ruosuo chüwate. 27Mu themia bu va puo sia phre di süsie ketsokecü vortuoüwaketa tuoi, 28Khrista rei themia kekra kephouma pfülietuo üdi vapuochü puo phou khashüwate, mu puo vorketuo va kenieu we kephouma dze la monyü puo merü kelho di pfhe kebako kelalieketuo la vorcü zotuo.

Currently Selected:

Ibriko 9: ANBRBSI

Highlight

Copy