Ibriko 8
8
Jisue U Zievokezhatho-u
1Hie pu keba ca kemeyieu sü hau zo: teiko gei Kezhatho-u kedibau zatsa baketa u zievokezhatho hikecü puo bate, 2puoe themia bu monyü, Niepuu thuo chükeshü kemesachüu nu pfheki ketho-u nu lietho chü bate. 3Kekreilamonyü zievokezhatho kehoupuorei kedapie puo bu mia mha khakeshüko khashü mu ruosuoko chüya; süla zievo hau rei mha huo khashü morosuota. 4Mhanuü puoe kijü nu ba üro puoe zievomia puorei mota zotuo, kekreilamonyü zievomiako thezho-u medzi di ruosuo khakeshüko mezalie kevi bacü la. 5Uko kemesachü nu rüsuoe teigei chüketuoko rhiu mu puo khrüu zo; kekreilamonyü Mosa rüsuopfhekiu pethoutuoü kesie ki, puo tarho di, “Kijüthou geinu thapie n pekiekeshüu medzi tou di chüliecie,” ishü zo. 6Derei tsie we Jisu lietho vikuokecü puo nguliete mu puo thedo nu dietseidiekho vikuokecü puo chükelie rei phrapie kezhü vikuocü puo geinu puo mvüdze chüliete. 7Kekreilamonyü dietseidiekho kerieu vi tsei üliro, kekrei puo pfhü saketuo ba ba mo.
8Ukepenuopfüe süu vi tsei kemo ngu di pukecü:
“Teisozhako vorzhü tou zo, Niepuue siya,
a Israel kiu mu Juda kiu ze dietseidiekho kesa puo chüketuo ki;
9a uko puonuoko ze dietseidiekhokeshüu,
a Ijipt nunu uko dzie teshü di uko cha tha ze kepar nhie mhie lho,
ukoe a dietseidiekho-u nu tuolie mo,
süla a rei uko sanyü mote,
Niepuu sidi puya.
10Teisozha süko sie a Israel kiu ze dietseidiekho ketuou hauha zo, Niepuue puya:
A a zhoko pie uko nou shütuo,
sidi uko melou nu thushütuo,
tsiu a uko Kepenuopfü chütuo,
mu uko a themia chütuo,
11Siro uko huoniehuo petha morei mia puoe mia puo ki, ‘Niepuu siliecie,’ isi lho,
kekreilamonyü uko pete a sitatuo,
kecütho-u nunu vo kezhatho-u ketso.
12Kekreilamonyü a uko kejokemouko ngumezhieshütuo,
mu a uko kephoumako rükra sa motatuo,” si.
13Siro puo “Dietseidiekho kesa puo,” idi pukeshü ki, puoe kerieu chüpie kewe chüwate. Siro selie suoketau mu weketau jü mhaitatuo.
Currently Selected:
Ibriko 8: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
