Keriekitho 48

Jakob Japie Josef Nuonie Ketsü

1Siro mha hako sie, mia Josef ki, “Harie n puo suo bate,” ishü; süla Josef-e puo nuonie Manasseh mu Efraim zelie di vo. 2Siro mia Jakob ki, “N nuou Josef n ki vorzhie,” sitse puo thuo puo rhiechü sie puo zhü gei balie. 3Sidi Jakob sie Josef ki, “Kuokejokejü Kepenuopfüe#48:3 Ibri nu El Shaddai. Kanan kijü nu Luz nu a pengushü di japie a tsü. 4Sidi a ki, ‘A n chü pekruoshütuo tsiu n chü pekrashütuo, mu a n chüpie themia krodi puo chüshütuo, siro a kechachie la kijü hau khapie n nuosenuoyieko tsüshütuo.’ 5Mu tsie n nuonie, a Ijipt nu ketsur mhodzü penuoshü n ketsünie bu a vie chütatuo; Efraim tsiu Manasseh rei Reuben mu Simeon unie kemhie, a vie chütuo. 6Siro unie sie nu penuokelie nuonuoko ro n vie chütuo, siro thekatsatie la unie zapie unie siezedzürieko za sa thutuo. 7Kekreilamonyü a Padan nunu kevor ki, Kanan kijü nu, cha nunu Rachel siate, Efrat nu voketuo dopuo baluocü nu; sidi a bu Efrat nu kevo cha nu puo khruwate ru” (süu Bethlehem ücüu).

8Siro Israel Josef nuonie ngu tse, “Harie, suomia ga?” 9Sitse Josef-e puo ki, “Unie-e Ukepenuopfü hanunu khapie a ketsü a nuonielie.” Sitse puo sie, “N pezie rei unie ze a ki vorcie, sidi a bu jashü unie tsücie.” 10Israel tsaketa la puo mhinie rei merüta di mha ngu kemecielieya mota, süla Josef unie ze puo ki phishü; sitse puo unie meboshü di unie ciepielie. 11Süsie Israel Josef ki, “A n zie rei nguketuo le tuo mota zo; ru harie, Ukepenuopfü a bu n nuonuo rei sa nguwate” ita. 12Süsie Josef-e puo puo khoudzanie donunu unie ze parlie, di puo thuo tsu kijü zerepfü zhüta. 13Süsie Josef-e unie kenienie teshülie, puo dzie puo zatsa pie Efraim merhashü di Israel vitsa va, mu puo vitsa üse Manasseh merhashü di Israel zatsa va, sidi unie ze penuo phishü. 14Derei Israel puo dzie puo zatsa yhapie Efraim tsü gei shülie, süu nhicuu mu puo dzie puo vitsa pie Manasseh tsü gei shülie puo dzie kevarü di; Manasseh-e nuorieu zoü rei. 15Sidi puo japie Josef tsü di,

“A puonuo Abraham tsiu Isak puo mhodzünu tuo kevor Ukepenuopfü,

a kerhei chie a kepfheu chü vor thie tsokeshü Kepenuopfü,

16mu kemezhielie kevi pete nunu a shüphrakeshü dielieu,

japie u nuonie tsücie;

sidi unie geinu a zau keyiese tuolie,

tsiu a puonuoko Abraham siro Isak za rei sa;

mu unie bu kruosie kijü nu krodi puo chüliecie.”

17Siro Josef-e puo puoe puo dzie puo zatsa pie Efraim tsü gei shüketa ngu tse, süu puo nei mota; sidi puoe Efraim tsü geinu puo puo dzie teshüpie Manasseh tsü gei shüwa. 18Sidi Josef puo puo ki, “Ci molie, a puo, hauha nuorieu, süla n dzie n zatsa pie puo tsü gei shücie.” 19Derei puo puoe mvüta, di sie, “A si balie, a nuo a si ba zolie, puo rei sier seyie puo chütuo; siro puo rei zha zotuo, derei puo siezeu we puo ki zhakuotuo, mu puo nuosenuoyieko krodi seyie kro puo chütuo.” 20Süla puo sünhie japie unie tsü di sie,

“N za se di Israel-e jashütuo,

‘Ukepenuopfü bu n chüpie Efraim mu Manasseh tuoishülie.’ ”

Hai di puo Efraim bu Manasseh mhodzü rieta. 21Süsie Israel-e Josef ki, “Harie a siatatuo üzhie, derei Ukepenuopfü n ze tuo zotuo; sidi n ze la vo n puonuoko kijü nu shütuo. 22Siro a thie pie n siezedzürieko ketsü mho a n shiephruo#48:22 Moro kijüthou zieu (Ibri Shekem, dieu Shekem rünau za ze kemhie). rükrüshüzhie ho. A a zhiecha mu a theü se Amormiako kijü penyükelieu sa pie n tsüshü ho.”

Currently Selected:

Keriekitho 48: ANBRBSI

Highlight

Copy