Keriekitho 47
47
1Sidi Josef-e Faro ki vo di puo ki, “A puo tsiu a siezedzürieko, uko kuo kroko mu u thukroko, siro u vie ketuo kheko se di Kanan kijü nunu vorte, uko tsie Goshen kijü nu ba.” 2Mu puoe puo dzürieko mia pengou ze Faro ki vor. 3Sitse Faro puo dzürieko ki, “Nieko kedipuo kechümia ga?” Ru uko Faro ki, “Hieko puonuoko mhiei di, hieko n kituoko tekuo kepfhemialie.” 4Sidi uko Faro ki, “Hieko rüsomia chü di kijü hau nu lhoutuoü vorlie; Kanan nu pekrieu re seketa la n kituoko kuoko la nha jüte, süla tsie hieko n ki chaya, n kituoko bu Goshen kijü nu lhoutacümu.” 5Sitse Faroe Josef ki, “N puo mu n siezedzürieko n ki vorte. 6Ijipt kijü sü n mhodzünu zhü ze; n puo mu n siezedzürieko bu kijü kevithora lhoulie; uko bu Goshen kijü nu lhouliecie; mu no uko donu chülie kesümia huo si ba ro, uko bu a riko kemeho chülie.”
7Sitse Josef puo puo Jakob ze Faro ki ler, ru Jakob jashü Faro tsü. 8Sitse Faro Jakob ki, “N kelhouzha cie kitsuota ga?” 9Sitse Jakob Faro ki, “Kijü hanu a rüve kevor teicieko krie puo di sertewe; a kelhou teicieko kra mo mu lhou re se zo, süko se a puonuoko kijü hanu rüve kevor teicieko ze kemejülie sü mo.” 10Sidi Jakob japie Faro tsüshü, di Faro mhodzü nunu prata. 11Sitse Josef-e puo puo mu puo siezedzürieko bu lhou balieketuo chüshüwa. Ijipt nu kijü uko ya khapie uko tsüshü di Ramese kijü nu, kijü kevitho-u, Faro pukeshü kemhie. 12Siro Josef-e puo puo, puo siezedzürieko mu puo kinuko pete u kinuko tsüphrü medzi di kecüca uko se morokesuo le di pie uko tsüshü.
Ijipt nu Pekriekecü
13Siro kijü pete nu kecüca puo rei jüta, pekrieu rethorketa la. Pekrie la Ijipt mu Kanan kijü kemezhie phita. 14Siro pekrie la Ijipt mu Kanan kijü nu telha khrükecü nunu shükeiraka pete Josef dzie nu lerta, mu Josef shükeirakako se Faro ki vorshü. 15Siro Ijipt kijü nu mu Kanan kijü nu raka ketsi thewa tse, Ijiptmia peteko Josef ki vor di sie, “Kecüca kha hieko tsücie, kiüdi hie bu n mhinguki nu siatatuo mu? Hie rakako ketsi tseiwate.” 16Sitse Josef sie, “Nie khurinuoko khashülie, sitse a kecüca pie nie khurinuoko ze kelilietuo, nie raka jütacü sie.”
17Süla uko khurinuoko se vor Josef tsü, sitse Josef-e kecüca üse kierko, gadako mu tekuokroko ze kelilie; sidi süciesü puo uko khurinuoko la kecüca pie uko tsü di uko va chüshülie. 18Siro teicie süu tseita tse, süsie cie rei uko puo ki la vor, di puo ki, “Hieko raka pete ketsiwaketa se a niepuu ki kevielie lho; siro hie riko a niepuu vieta zo; tsie we hiechühiemo mu hie kijüko zo kemosie mhapuorei a niepuu mhodzü peshapie ba mote. 19Kiüdi hie bu n mhi kinu siatatuomu, hie rei mu hie kijü rei? Kecüca pie hie rei mu hie kijü rei khrülietacie, sitse hie kijü ze hieko rei Faro diemia chütatuo; siro tsia khashü hie tsücie, sitse hieko rheilietuo mu siata molietuo, tsiu kijüu bu rei ruoketa kijü chüta molietuo.”
20Süla Josef-e Faro la Ijipt kijü pete khrüwa; Ijiptmia pete u lieko ze phrewaketa la, kekreilamonyü pekrieu rethorketa la. Sidi kijüu Faro vie chüta; 21mu puoe themiako rei chüpie miadiemia chüwata,#47:21 Sam Gk Vg kemejülie: MT Puoe uko chüpie nadiko nu shüwa. sidi Ijipt kijü latsatie puo nunu vo kekreitsa ketso siwata. 22Puoe zievoko kijü rübei khrü kemo zo; zievokoe Faro kinu methuo ngulieyacü la, sidi Faro kha uko ketsü se di lhouya; süla ukoe uko kijü zewa mo. 23Süsie Josef themiako ki, “Harie, a thie Faro la nieko mu nieko kijüu khrüliete. Nieko tsia hako pielie di, kijüu nu cieshüliecie. 24Sidi lie kere teiki, niekoe pengou-zapuo khapie Faro tsütuo, mu za dia bu nie vie chütuo, se nie tsia chülieketuo la, kecüca la, mu nie kiriko la, tsiu nie nuonuoko kecüca la.” 25Sitse uko sie, “No hieko kerheiro kelashüte, hieko bu a niepuu nei chülie thienyü, siro hie Faro diemia chütatuo.” 26Sidi Josef-e Ijipt kijüu la thezho puo chüshüwa, mu thie ketso rei süu tuo zo, Faro bu pengou zapuou lieketuo; zievoko kijü rübei Faro vie chü kemo zo.
Jakob Teisozha Thelako
27Hai di Israel-e Ijipt kijü nu lhouta, Goshen kijü nu, sidi sünu uko ya nyilie, mu kruolie di kra philieta. 28Siro Jakob-e Ijipt kijü nu cie kerethenie lhoulie, puo kelhou teicieko krie puo di hiediaethenie.
29Siro Israel siataketuo tei penuo vorta tse, puoe puo nuou Josef kielie di puo ki, “A tsie n kenguki n khriepfülieta üro, n dzie pie a do khro shüshücie, di a gei tseiüvi mu diethoshütuoü phrashücie. Ijipt nunu a khru hie zocie. 30Derei a a puonuoko ze zhü tsuta tse, Ijipt nunu a toupie vo uko kekhru chü nu a khruwacie.” Süla puo sie, “A n kepu kemhie chüshütuo.” 31Siro puoe sie, “A ki rüseshüwalie,” siru puo rei rüseshüwa. Süsie Israel-e nuketsu puo zhüu gei krapfü bata.
Currently Selected:
Keriekitho 47: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
