Keriekitho 46

Jakob Puo Kikruko Ze Ijipt nu Ketsu

1Sidi Israel puo vie ketuo pete selie di rüve sedeshü, sidi Beersheba nu vorkelie ki, sünunu ruosuo chüpie puo puo Isak Kepenuopfü tsü. 2Mu Ukepenuopfü süzhü puo mho geinu Israel rüchü di sie, “Jakob, Jakob,” sitse puo sie “A haki bawe.” 3Sitse puoe “Ae Kepenuopfü, n puou Kepenuopfü zo; Ijipt nu tsu michie hiecie; a sünu n chüpie seyie kezha puo chüshütuo. 4A thuo n ze Ijipt nu tsutuo, mu n ze la vorshü zotuo; siro Josef bu puo dzie pie n mhinie kegushütuo.” 5Süsie Jakob-e Beersheba nunu tuoshü; Israel nuonuokoe, uko puo Jakob nuonuo kecüko, mu u nupfünuoko bu Faro ketsekeshü bageiko gei tuolie. 6Süsie rei uko kirinuoko, mu uko vienya Kanan nunu ngukelie pete selie di Ijipt nu vorlie, Jakob mu puo ze ketuo puo nuosenuoyie pete. 7Puo nuo thepfuko mu uko nuonuo thepfuko, puo nuo thenuko tsiu puo nuonuoko nuonuo thenumia puo ze ketuo pete mu puosepuoyie peteko ze Ijipt nu vorta.

8Siro hako Israel nuosenuoyieko Jakob mu puo nuosenuoyie Ijipt nu kevorko za: Reuben Jakob nuorieu, 9tsiu Reuben nuoko: Hanok, Palu, Hezron, mu Karmi. 10Simeon nuoko: Jemuel, Jamin, Ohad, Jakin, Zohar mu Kananpfü nuo Shaul. 11Levi nuonuoko: Gershon, Kohat mu Merari. 12Juda nuoko: Er, Onan, Shela, Perez mu Zera (derei Er siro Onan unie Kanan nunu siata); siro Perez nuonie ro Hezron mu Hamul. 13Isakar nuonuoko: Tola, Puva, Jashub#46:13 Sam Gk Nuol 26:24 1 Seyie 7:1; MT Iob. mu Shimron. 14Zebulun nuoko: Sered, Elon mu Jahlil. 15(Hako Leah nuoko, Pedan-aram nunu penuoshü Jakob ketsüko tsiu puo nuopfü Dina rei sa; puo nuonuo thepfuko mu thenuko pete kesa mia serese). 16Gad nuoko: Zifion, Hagi, Shuni, Ezbon, Eri, Arodi mu Areli. 17Asher nuoko: Imna, Ishva, Ishvi, Beria mu uko üpfü Sera. Siro Beria nuonie: Heber mu Malkiel. 18(Hako Laban-e khapie puo nuopfü Leah ketsüpfü Zilpa nuonuoko, puoe hako penuoshü Jakob tsü, mia keresorou.) 19Jakob kimiapfü Rachel nuonie: Josef mu Benjamin. 20Siro Ijipt kijü nunu penuoshü Josef ketsünie liro Manasseh mu Efraim, On nu zievo-u Potifera nuopfü Asenat geinu penuoshü puo tsü. 21Siro Benjamin nuoko: Bela, Beker, Ashbel, Gera, Naman, Ehi, Rosh, Mupim, Hupim mu Ard. 22(Hako Rachel geinu penuoshü Jakob ketsüko pete kesa mia keredia.) 23Siro Dan nuou: Hashum#46:23 Gk: Ibri Hushim.. 24Naftali nuoko: Jahzil, Guni, Jezer mu Shilem. 25(Hako Bilha, Laban-e khapie puo nuopfü ketsüpfü nuoko mu puo hako penuoshü Jakob tsü. Pete kesa mia thenie.) 26Siro hako pete Jakob ze Ijipt nu vor, puo geinu lhou keparko. Mu Jakob nuoko nupfünuo sa kemo, uko mia hiesorouesorou; 27Tsiu Ijipt nunu penuoshü Josef ketsü mia kenie: Jakob kinumia Ijipt nu kevorko pete kesa mia hiethenie.

Jakob Ijipt nu Lhou Baketa

28Siro Israel-e Juda bu rie Josef ki tsu, puo bu puo mhodzü Goshen nu kevo chau thashü puo kielieketuo la; sidi uko Goshen kijü nu vorlie. 29Mu Josef-e puo kierbagei keselie di Goshen nu puo puo Israel ze kesetuoü vo; sidi puo thuo puo khapie puo tsü mu puo puo vo ciepielie di puotei huo puo puo bouka geinu kra bata. 30Sitse Israel sü Josef ki, “Tsie we a siata rei vite, a thuo n zie ngu di no rhei tuo zocü siliete eru.” 31Sitse Josef puo dzürieko siro puo puo kinuko ki, “A vo di Faro ki putuo, tsiu puo ki, ‘A dzürieko mu a puo kinuko, Kanan nu ketuoko a ki vorte. 32Mu uko tekuo kepfhemia zo, ukoe khurinuo keperimia zolie; tsiu uko kuo kroko, u thukroko siro u vie ketuo pete se vorte,’ idi pushütuo.”

33“Siro Faroe nieko kie di, ‘Nieko kedipuo kechümia ga?’ iro. 34Niekoe sie, ‘N kituokoe hie nhicu nunu tsie ketso perinuo keperimia zo, hieko mu hieko puonuoko rei’ iliecie, nieko bu Goshen kijü nu lhou balieketuo la; kuopfhemia kehoupuorei Ijiptmia mhodzünu we kerütsekecümia zocü la.”

Currently Selected:

Keriekitho 46: ANBRBSI

Highlight

Copy