Keriekitho 23
23
Sara Se
1Sarae teicie krie puo di mepfüethenie lhoulie. Sara kelhou teicie-e hade. 2Sarae Kanan nu Kiriat-arba (süu Hebron) nunu siata; mu Abraham-e le Sara krü mu puo la kra. 3Siro Abraham kesiamo mhodzü nunu sielie di vo Hitmiako ki pu di sie, 4“Ae sikemomia mu solhimia chü nieko donu lhouketuomia zo; nieko do nunu mekhru chü puo kha a tsücie, a bu a themia siaketa ki khru keviewaketuo la.” 5Sitse Hitmiako Abraham ki, 6“Hieko pfhe rünyüshücie, a niepuu; noe hieko donu kedinuo kekuo puo zo. Hieko mekhruchüko n thuo n nei kedalie di kesiamia khruliecie, n bu kesiamia khruketuo la hie miapuorei mekhru chü khashü n tsü khrieta morei chakha chütalie lho.” 7Sitse Abraham-e sielie di vo Hitmia, kijü niepuko mhodzü nuketsushü. 8Sidi puo uko ki, “Nieko medo di a bu kesiamia khru kevielieketuo sie, a pfhe rünyüshücie, a la Zohar nuou Efron ki chacie. 9A bu se mekhru chü chülieketuo la, puo lieu mei ki kezhü Makpela tsiepfüu puoma lie tsei di se a tsücie.” 10Efron-e Hitmiako donu ba, di Efron-e Hitmiako mhodzü nunu Abraham die kelashü, puo nadiu kharu nu keler pete mhodzü nunu sie, 11“Mo, a niepuu a pfhe rünyüliecie; a lieu mu puo nu keba tsiepfüu sa kha n tsüshüte, a themiako mhodzü nunu n bu kesiamia khrulieketuo la kha n tsüshüte.” 12Sitse Abraham-e kijü nu themiako mhodzü nuketsushü. 13Sidi puo kijüu nu themiako mhodzünu Efron ki pu di sie, “Derei no n medotuo ro, a pfhe rünyüshücie; a lieu ma khashütuo, a kinu süu pieliecie, sitse a kesiamo se sünu khrulietuo,” sishü. 14Efron-e Abraham die kela di sie, 15“A niepuu, a pfhe rünyüshücie; kijü rakachü shekel krie dia ma ba: süu avu donu kedipuoü mu? Kesiamia khruliecie.” 16Siro Abraham-e Efron dieu puo medolie, di Abraham Hitmiako puo die kerünyüko mhodzünu rakachü shekel krie dia mejüpie Efron tsüwa, lhithomia donu priesa mejüyakezha medzi di.
17Süla Makpela nu Efron lietsa Mamre niathutsa kezhüu, sünu kezhü tsiepfüu tsiu ketsau nu keba seibo pete tsiu sükhieümhou houpfü keba peteko 18Hitmiako mu nadi kharuu nu keler pete mhodzünu Abraham vie chüta. 19Hako sie Abraham-e puo kimia Sara pie Kanan kijü Mamre (Hebron ücüu) niathutsa kezhü Makpela nu tsiepfü nunu khruwa. 20Siro lieu mu sünu kezhü tsiepfüu Abraham-e se mia kekhru chü chütuo üdi Hitmia kinu khrüpie puo vie chülieta.
Currently Selected:
Keriekitho 23: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
