Keriekitho 22

Abraham Kepele Dojükecü

1Mha hako sie Ukepenuopfüe Abraham dojü, di puo ki, “Abraham” siru puo sie “A haki bawe.” 2Sitse puo sie, “N nuou zelie, n nuo pfuliu Isak, no puo khrieyakezhau, sidi tuose Moria kijü nu volie, di a n ki pushüketuo kijüthouko puo geinu puo khapie kethe ruosuo chüshücie.” 3Süla Abraham khiserüna sielie, di puo gadayo gei theba keselie, mu puo khriesamia kenie mu puo nuo Isak zelie, siro kethe ruosuo la sei phrolie, sidi Ukepenuopfü puo ki pukeshü thechüu nu vo. 4Zha se nhie Abraham tosie ru thechüu petse phinu keba ngulie. 5Sitse Abraham-e puo khriesanie ki, “Nnie gadayo ze di haki balie; a mu unuou hienie lutsakhie vo ruosuo chüwa di nnie ki la vortuo.” 6Sidi Abraham-e kethe ruosuo kechü seiko chüpie puo nuou Isak bu pfülie; mu puo puo dzie nu mi mu zhietenuo pielie. Sidi unie keze tuo vota. 7Sitse Isak puo puo Abraham ki, “A Puo!” isi. Sitse puo sie, “A nuo a haki tuo zo.” Puo sie, “Harie mi mu sei we tuo, derei kethe ruosuo la tekuonuou kirapuo ba ga?” 8Abraham sie, “A nuo Ukepenuopfü thuo kethe ruosuo la tekuonuou khashütuo.” Sidi unie keze tuo vota.

9Unie vor Ukepenuopfü pukeshü chüu tsokelie ki, Abraham-e sükinu ruosuobau chülie, di sei khapie sügei shülie. Sidi puo nuo Isak phalie di puo khapie ruosuobau gei seiko gei pie zhülie. 10Süsie Abraham puo nuou dukhrituoü puo dzie se zhietenuoyo chülie. 11Derei Jihova dielieu teigei nu puo kie di sie, “Abraham! Abraham!” isi. Puo sie, “A haki bawe” sishü. 12Sitse puo sie, “N dzie khapie unuoyo gei shü hiecie, puo gei mhapuorei chüwa hie; a tsie no Ukepenuopfü khrüpreiyakecü siliete, no a kinu n nuou, n nuo pfuliu se bata mo ze ru.” 13Süsie Abraham tosie mehoshü ru harie, puo sietsa tekuochü puo ronyho nunu puo kianie doupfü tha di ngulie, sitse Abraham vo tekuochüu ze vor di puo nuo sou nu süu khapie kethe ruosuo chüwa. 14Süla Abraham-e thechü süu üse “Jihova Jireh,” ilie mu thie ketso rei hai di pu tuoya “Jihova kijüthouu geinu süu keseshütuo.”

15Siro Jihova dielieue teigei nu va kenieu va Abraham kie, 16di sie, “A a thuo rüseshüte, idi Jihovae puya, no mha hau chükeshü, n thuo n nuo pfuliu se bata mo zocü la, 17a ja n tsü tou zotuo, mu a n nuosenuoyie chü pekrapie teigei themvüko mu dzükezha khie huocanyo mhieshütuo; siro n nuosenuoyiekoe uko ngumvümia kharu pevielietuo, 18tsiu n nuosenuoyie geinu kijü seyieko theja ngulietuo, kekreilamonyü no a die zeliete.” 19Sitse Abraham tuo khriesanie ki la vorlie, sidi uko keze Beersheba nu vota; mu Abraham Beersheba nu lhou bata.

Nahor Nuosenuoyieko

20Mha hako sie Abraham ki pukecü, “Harie, Milka rei nuo penuopie n siezeu Nahor tsüshüte. 21Nuorieu Uz, puo siezeu Buz, Aram puou Kemuel, 22Kesed, Hazo, Pildash, Jidlaf mu Bethuel.” 23Bethuel sier Rebeka puou chülie. Mia thetha hako Milkae penuopie Abraham siezeu Nahor tsüshü. 24Sümhonu puo pelipfü, puo za Reuma üyakezhapfü rei Teba, Gaham, Tahash mu Maka hako penuolie.

Currently Selected:

Keriekitho 22: ANBRBSI

Highlight

Copy