Ezekiel 1
1
Kierbagei Ziemho-u
1Teicie ser cie, khrü diau nu, khrü süu nu zha pengou nhie, ae Kebar rü khieki kediemia donu bakecü ki, teiko koshü, sitse ae Ukepenuopfü ziemhoko ngu. 2Thekhrüu nu zha pengou nhie, (süusü kediu Jehoiakin-e miadie chü tuoketa cie pengouketa cie.) 3Jihova die Kebar rü khieki Chaldiamia kijü nu keba Ezekiel zievo-u Buzi nuou ki vor; mu sünu Jihova dzie puo gei tuo.
4A mehoshü ru, pesotsa nu teikhrie khriedi puo vor; kimhou kezha puo puokhieümhou ziekruoi süu whi mu miu sünu par ba tso, siro miü donu thegi meriedakecü puo ba. 5Siro süu donu khunuo kerhei kemhiekecü dia par. Siro uko rhiu hakemhie; ukoe themia rhi kemhie, 6siro mia puopuokecü puo zie diadia; mu mia puopuokecü puo shü diadia. 7Uko phi-e mezhü, siro uko phizhüe mithunuo mou kemhie, sükoe mese kezhü kemepreikelie tuoi vavai. 8Uko khie lutsahatsa uko shü diako khro themia dzie tuoikecü ba. Sidi uko zie mu uko shü chüpfü. 9Uko shü vo huoniehuo nyü mu uko rürei la mo zo di mezhü vo phre; mia puopuocü tuo pedzü phrezhü hu. 10Siro uko zie kenguu we hamhie: uko diako themia zie, thezatsa losha zie, thevitsa pedo zie tuoi, mu tsüü zie tuoi; 11uko zie-e hakemhie. Uko shüe kelhapie pesotsa va; mia puopuokecü puoshü kenienie, mu uko shükoe vo huoniehuo nyü, tsiu kenie pie u mo whe isi. 12Sidi mia puopuokecü u mhodzütsa mezhü vota; ruopfüu kevora, uko rei süra vo, uko voketara rürei la mo zo. 13Rhei ketuo khunuoko donu#1:13 Gk OL: Ibri Khunuo kerheiko ngu kepar. miü nu mizhü tukezhü tuoi, tsiu mitu tuoi, süu khunuo kerhei diako donu kho mu ke ituo; miu ziekruoi mu miu nunu teimela par. 14Siro rhei ketuo khunuoko ta kho mu ke teimela phriephriekecü mhie di.
15Ae khunuo kerheiko meho ba tse, kijüu gei khunuo kerheiko khieki puo khunuo diako puo la bageithuo puopuo keba ngulie.#1:15 Ibri Uko zie puopuo la. 16Bageithuoko mu kechü rhiko kenguu hakemhie: Uko kenguu beril tsiepfü tuoi; tsiu uko diako rhi kemhie phre, bageithuo puo bageithuo kekrei puo nu keba mhie. 17Uko melekeshü ki, ukoe rürei la mo zo rei lutsahatsa valielie zo. 18Puo thuo khieko rükrie mu kemerie zo; kekreilamonyü puo thuo diako lutsahatsa themhi thuo tshupfü. 19Siro khunuo kerhei diako melekeshü ki, bageithuoko uko khieki mele vota; mu khunuo kerheiko kijü nunu sieta tse, bageithuoko rei sieta. 20Ruopfüu kevora, uko sünu vo, mu bageithuokoe uko ze sieta, khunuo kerheiko ruopfü sünu tuokecü la. 21Uko meleshü tse, kekreiko rei meleta, uko thata ro, kekreiko rei thata, mu uko kijü geinu sieta ro, bageithuoko rei sa uko ze uko khieki sietaya; khunuo kerheiko ruopfü bageithuoko nu tuotacü la.
22Siro khunuo kerheiko tsü mhogei teikhru tuoikecü ketsiethega kemelei mhie phriephrie#1:22 Gk: Ibri U ngo zokecü ketsiethegau mhie. di uko yapfü ba. 23Teikhru khro, uko shü kelhapie mezhütshoi, huohiehuo petsou ba, khunuo kerheiko pete rei u shü kenienie pie puo mo-u whe phre. 24Ukoe meleshü tse, ae uko shüko pfhe, dzükezha pfhe tuoi, Kerükrietho-u#1:24 Ibri Shaddai. teikese pfhe tuoi themia kekra pfhe chüpahi kro puo pfhe tuoikecü si mu uko thata ro uko shü se kerünuo la kertaya. 25Siro uko tsü mho teikhru mho geinu mhapfhe puo par; sitse uko thata mu uko shüko pie rünyhu ketaya.
26Uko tsü mho teikhru mhogei kediba tuoicü puo ba, süu kenguu safir tsie tuoi, siro kediba tuoikecüu mhogei kebau rhi-e themia puo kemhiei. 27Puo chieca mhotsa puo rhiu, thegi kemelei mhiekecü a ngu, süu nu mi kemhiekecü thuo pete zepfü ba, tsiu puo chieca pekhrotsa, ae miü tuoikecü ngu, siro puokhieümhou pete mha kezie puo whipfü ba. 28Puokhieümhou kezieue teirü ki kimhou gei pfhesei keja tuoi. Jihova vithedze chü zokecüu kenguu hakemhie zo.
A süu kenguki, a zeretsu zhüta, sitse ae mia puo die pukecü pfhe si.
Currently Selected:
Ezekiel 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More