Daniel 12
12
Kesiako Rheilakesie
1“Süteiki Mikael, kedinuo kezhau, n themiako keyau siertuo. Siro kemezhiekecü tei puo siertuo, süusü seyie chükelie therie nunu sikecü vor mo zoluocü. Derei sükisü n themiako leshüdau nu u za thupie kebako kelalietuo. 2Siro kijü nyophe#12:2 Moro nyophe kijü. nu zekezhüko kekra colietuo, huomia kechachie kerhei nu votuo, mu huomia we thenga tsiu kechachie thikecü nu tuo. 3Siro mhakesimia bu teigei kezie mhie zietuo, mu mia kekra cha thapie kemiatho nu shükeliemia bu kechachie mu kechachie themvü mhie zietuo. 4Derei Daniel, no we, die hako pekhrepie balie, mu thela teiu vor kemochie leshüdau zasi vüpie bawalie. Themia kekra ta lutsahatsa votuo, mu mhasi kra miemietatuo.”
5Sitse a, Daniel, mehoshü ru mia kekrei kenie par, mia puo kerüpo hatsa mu kekreiu lutsa tha. 6Sitse uko mia puoe linen pfhe dzie di kerü nu dzü mho kethau ki, “U ngo hako chü tseiketuo kedithechiepuo tuo ga?” 7Sitse linen pfhe dzie di kerü nu dzü mho kethau, puo dzie puo zatsa mu puo vitsa yhapie teigei petsoulie. Sidi puoe kechachie rhei tuoyakezhau za se rüse di die haha pukecü ae si, süu puotei puo, puotei kenie, mu puotei tie puo#12:7 Ibri Puotei puo, puoteiko, mu puotie. ketsotuo, tsiu kemesa themiako kekuou biekhrü tseiwa tse, mha hako chü tseiwatuo. 8Ae sishü derei puocapuola silie mo; sidi sie, “A niepuu, mha hako geinu kedipuo chü partuo ga?” 9Sitse puo sie, “N cha nu volie, Daniel, kekreilamonyü die hako pekhrepie ba zotuo, mu thela teiu vor kemochie khapie ba zotuo. 10Themia kekra chü kemesa, khrüwa, chü pevilietuo, derei kerüzhüko we rüzhü ba zotuo. Kerüzhüko miapuorei puocapuola silie lho, derei mhakesimia we puocapuola silietuo. 11Siro süteiki chü meyakezha kethe ruosuou khawa di mha kepeka kerütsekecü khashüketuo teisozha nyie puo krie kenie di hiethepfütuo. 12Hie zo tha di teisozha nyie puo krie se di serepengou nu vokeliemia thejakepfümia zo. 13Derei no we, n cha nu volie, di rüleilie, teisozha thelau nu n zhakhra ngulieketuo la no lasielietuo.”
Currently Selected:
Daniel 12: ANBRBSI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More