Daniel 11
11
1A la zowe, Medemia, Darius di therie cie, puo bu metei mu puo chü pekuoshüketuo la a puo sie thashü.
2“A tsie ketho-u se n ki pushütuo. Persia nu kedi se sier satuo. Kedi diau peteko ki mhanyikuotuo, mu puo kinyi la kuo sierta tse, puoe mia peteko hüpie Grik kedi ngumvü sietuo. 3Sitse terhümiavimia kedi puo siertuo, süu kekuo kezha se se mha kekhatuo, mu puo nei puo medo chütuo. 4Siro puo kuo siekelie ki, puo kediu pruo teigei teikhrie diako nu keza votatuo; derei pie puo kayieko tsülie lho, morei puo kuo di mha kekhakecü mhielie lho; kekreilamonyü puo kediu bo phewatuo sidi hako kemo kekreimia tsüwatuo.
5“Sitse pekhrotsa kediu kuo sietatuo, derei puo khro kezhamia puo puo ki rei kuokuo mu puo ki rei zhakuo di mha kekhatuo. 6Teicie huo sie unie kekhriethotuo, sidi kepfhekhokecü puo chü kemeteituo üdi pekhrotsa kediu nuopfü bu pesotsa kediu ki vortuo. Derei hapfü puo kekuou se balie lho, tsiu hau nuosenuoyie bu rei balie lho. Sidi hapfü mu puo kekhruohiko tsiu puo nuo mu puo yapie kethako pete khawatuo.
“Süki, 7hapfü geinu puoco puo puo sou nunu thesiertuo. Siro puoe rüpfhünuoko petsou vortuo sidi pesotsa kediu dahou nu ler di uko perhietuo sidi kuolietuo. 8Siro uko rhuoko mu uko rhuorhiko tsiu suna mu rakachü se kechü uko mhabou puoma kereko, puo terhü nu vakelie vie süko ketapfü Ijipt nu tsutatuo. Sidi teicie huo pesotsa kediu perhie mo batatuo, 9süsie kenuoue pekhrotsa kedirüvieu nu letuo, derei puo thuo la puo kijü nu votatuo.
10“Siro puo nuonuoko terhü chütuo mu rüpfhünuo kekra pfhü kengulietuo; sidi dzüdi mhie par di mha pfüthe votatuo sidi puo dahou ketso terhü chü votatuo. 11Siro noupfhü nunu pekhrotsa kediu vo di pesotsa kediu ze terhü chütuo, süusü rüpfhünuo kezha pesielietuo derei puo ngumvümia bu puo penyüwatuo. 12Siro themia kro-u setata tse, puo nou zha sietuo, sidi puo themia nyienyiecü ker chü kelhouwatuo, derei puo kuolie lho. 13Kekreilamonyü pesotsa kediu kerieu va ki rei themia krakuocü kengulietuo di teicie huo sie#11:13 Ibri Mu puotei thela ki teicieko nu. rüpfhünuo kezha puo chütuo mu mha kekra sa se di tuo partuo.
14“Süki themia kekra sie pekhrotsa kediu perhietuo. Siro ziemho-u chü tseishüketuo la nie thuo nie themia donu thezho medziya kemoko u thuo u chü kerükrielietuo derei uko tetsutatuo. 15Sitse pesotsa kediu vortuo sidi dahouko biemewatuo, tsiu dahouko lielietuo. Siro pekhrotsa rüpfhünuoko mu chüpahiko rei thalie kenjütatuo, kekreilamonyü uko thalieketuo kekuo jütatuo. 16Derei puo whuo kevor-u puoneipuonyü chü zotuo, mu puo mese chülie lho. Puoe thechü keziviu nu thalietuo, mu süko pete puo kekuou nu lertuo. 17Puo kedi kekuo pete se kevor lesietuo, tsiu puoe kezekevi zho#11:17 Gk: Ibri Kedi kechü, mu kemiathoko puo ze. huo se vortuo sidi süko chüshütuo. Kedirüvie pekawaketuo la, thenumiapfü puo pie puo ki penyishütuo; derei süu chü khrielie lho morei puo la vilie lho. 18Süsietsa puoe rürei dzükezha khie kijüko gei votuo sidi süko kekra lielietuo. Derei rüpfhünuo kezhau puo bu mia rhu kemo-u biepie puo thela chüwatuo, mu puorei süu pie süu gei chü lashütuo. 19Süsie puo thuo puo kijü nu dahouu kitsa rürei la votuo, derei puo phi mesülie di tetsutatuo, sidi ngu motatuo.
20“Süsie puo sou nu mia puo sier di kedirüvie zayieu la kezhamia puo ketseshütuo; derei zha huoyo sie nouyie morei terhü nunu mo di puo pekawatuo. 21Puo sou nu ngukemecü themia kesuo puo siertuo; puo thededie puorei khashü mo zo di vortuo tsiu kethedo di kedirüvieu lielietuo. 22Puo mhodzü nunu rüpfhünuoko zoupfü tuotatuo, mu biephrowatuo, tsiu dietseidiekhokelie kedinuou rei sa di. 23Siro puo ze khrietho chü lakelie sie puoe kethedo di mhachüta mu krotho kecü puo ze di kuo setatuo. 24Thededie khashü mo zo di puoe rüna kevithoko nu vortuo mu puo puonuokoe chü mo zokecü chü di mha peka, mhava mu uko kinyiko chüsetatuo. Puoe badiko petsou di mharhü sietuo, derei puotei huo la zotuo. 25Puoe rüpfhünuo kezha puo ze di puo kekuou pesielie di pekhrotsa kediu ngumvüketuo lesietuo, mu pekhrotsa kediu rei rüpfhünuo kezha mu kuo phikecü puo ze vor di puo ze kegeituo, derei puoe thalie lho, kekreilamonyü mia puo ngumvü di mharhüpie bawaketa la, 26sükoe kediu vie cüükrieyakezhako zo. Uko thuo puo pekawatuo, sidi puo rüpfhünuoko zoupfütatuo, mu mia kekra geiwatuo. 27Siro kedi hanie, unie nou mha kesuo wepfü, mizhü gei ba di ketijü kepu batuo. Derei süu kuolie lho, kekreilamonyü puo thela teiu chiepie bawaketa la. 28Siro puo kinyi kekra se di puo kijü nu la vortuo, derei puo noue puo kemesa dietseidiekho-u petsoutuo. Sidi puo thuo puo medo-u chütuo, mu puo thuo puo kijüu nu la vortuo.
29“Siro chiepie keba teiu nu puo la vortuo mu pekhrotsa vortuo, derei hateiu nu we hadzü mhielie lho. 30Kekreilamonyü Kitmia rouko puo petsou vortuo, süla puo nou thachüta di tsiesie latatuo. Siro puoe puo nei mo se di kemesa dietseidiekho-u petsoutuo. Puoe rüreise kemesa dietseidiekho-u khakewako kitsa vata di süko die rünyütatuo. 31Puoe ketsekeshü rüpfhünuoko vo di rüsuokiu mu dahouu tshulie di bie perhuwatuo. Siro uko bu teisonhie chüyakezha kethe ruosuou chü mvütatuo, sidi uko mha va perhu se zoketuo kemecü chü zokecüu pesieshütuo. 32Puoe dietseidiekho-u zeya kemoko ketsilietuo, derei uko Kepenuopfü gei diethoyakezhako we thalie di mhachü toushütuo. 33Themiako donu mhakesikoe u kesikele se mia kekra ze kezalietuo, derei zha huo sie, ukoe zhiecha siro miü tsiu kedie chü kemezhiecü mu kepeka nunu tetsutatuo. 34Siro uko krüketa ki, uko kekhruohi huoyo ngulietuo, mu themia kekra rei mia kese die se di uko ze kezelietuo. 35Siro mhakesiko huo tetsutatuo, süki uko chü pevikuolie mu ketso kemesalietuo,#11:35 Ibri Puoe uko chü pekrashü. si zo vo thela teiu tsotuo, kekreilamonyü chiepie keba teiu tsoketuo puotei huo baluocü la.
36“Kediu puo thuo puo medo-u chütuo. Sidi puo thuo puo chü kerükrie mu terhuo pete ki rei zhakuoü sietuo, sidi terhuoko Kepenuopfü ngukemvü die kemeriekecü putuo. Puoe noupfhü teiu tsei kemochie kruo miemie volietuo, kekreilamonyü chütuo üdi rhüpie kebau chü zotuokecü la. 37Puoe puo puonuoko rhuoko morei thenumiae u neiyakecüu puorei rhulie lho; puoe terhuo puorei rhulie lho, kekreilamonyü puo thuo puo üse mha kekrei pete ki rei zhakuo üyacü la. 38Puoe hako sou nu dahou rhuoko rhutuo; puo puonuoko si rei kemo rhuoko rhu, sidi puoe suna siro rakachü se, tsiu ketsie puoma kere mu mhama kerethoko khapie süko tsütuo. 39Puoe chazoumia rhuoko kekhruohi se di badiko chülietuo. Kehoupuorei puo pu kerükriekecümia chü penyikuo sashütuo. Sidi uko pethopie mha kekra mho kekhakecü chütuo, mu puoma kechü nunu kijüu kezashütuo.
Puotei Thelau
40“Puotei thelatsa pekhrotsa kediu puo petsou siertuo. Derei pesotsa kediu khriewhi mhiei, kierbagei, kierkesemia mu rou kekra ze di puo petsou vortuo. Sidi puoe dzüdi mhie kru rüna pete nu votuo. 41Puo kijü kezivi nu rei letuo, sidi mia nyienyiecü ker rei puo dzie nu tetsutatuo, derei Edom mu Moab tsiu Ammonmia kevithoko we puo kekuou nunu talietuo. 42Puoe puo bou yhapie seyieko petsoutuo, mu Ijipt kijüu talie kenjütatuo. 43Puoe suna mu rakachü kinyibouu, tsiu Ijipt nu kinyi pete kekhakecüu chütuo; sidi Libiako mu Ethiopiako#11:43 Moro Nubiako; Ibri Kushko. pete rei puo phizhoko medzituo. 44Derei niakratsa tsiu pesotsa nu kevor dieko puo kedeshütuo, sitse puo nei mo phi di vo mha bie pesuo mu mha peka tseiwaketuo la tuo pratuo. 45Sidi puoe kedi pfhekiko se vo dzükezha mu kemesa kijüthou donunu pethoushütuo. Sirei puo puo thelau tsotatuo, mu miapuorei puo khruohishülie lho.
Currently Selected:
Daniel 11: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
