Mhakechüko 6

Liethomia Thenie Kedakelie

1Pethakelieko kra partazhükecü ki, Grik die kepu Judakoe Ibriko gei panya sierta, kekreilamonyü teisonhie kecükekrie kezakecü nu uko samipfüko rükra motayacü la. 2Süla kerekeniekoe pethakelie kro-u pete kie kengushü di uko ki “Hieko zo we Ukepenuopfü die pie pethakecüu khawa di mizhü geinu chalie chü bataketuo puotou mo. 3Süla, kezeko#6:3 Gk Siezedzürie., nie thuo nie donu thetshe kepfü mu Ruopfü tsiu mhasi u tshukepfü mia thenie kedalie, hie uko bu chalie süu chülietuo, 4derei hie zowe hie khapie kecha nu mu dieu pie mia kepetha lietho-u nu batatuo.” 5Uko kepuko mia pete u nei phreta, sidi uko Stefan, kepele mu Kemesa Ruopfü bu tshukepfüu, siro Filip, mu Prokora, tsiu Nikanor, Timon, Parmena mu Antiokmia di sier Judamia zho zeketa Nikola, hako kedalie. 6Sidi süko ze apostelko mhodzünu vor thalie di uko bu süko la cha mu u dzie yhapie süko gei shüshü.

7Ukepenuopfü dieu keza miemie vota, mu Jerusalem nu pethakelieko kro-u kra phi sierta, siro zievomia kekra kepeleu dieze chüta.

Stefan Tekelie

8Stefan-e ngukemezhie mu kekuo puo tshupfü di themiako donu ungomhatho mu zasiko chüshü. 9Derei Phreishüwaketamia sinagog (idi kieya) nu tsüphrü chüyakezha Kurinmia, mu Alexandramia, siro kekreimia Kilikia mu Asia nunu kevorko Stefan ze kemeüta. 10Sirei puo mhasi mu Ruopfü kekuo se di die kepu la uko puo meülie lhota. 11Sitse uko pekhre huomia nou chüshü di uko bu sie, “Puo Mosa mu Ukepenuopfü ketha die kepu hie siwe.” 12Sidi uko themia kro-u, phichüko mu thezhokepethako ketshüshü di uko bu Stefan teze mechükehouu nu vota. 13Siro uko ketijü zhapumia huo ze vor di, uko bu sie, “Themia hau kemesa chüu mu thezho-u thacü teya mo. 14Jisu Nazaret-u#6:14 Gk Nazor-u. thechü hau bierhuowa mu Mosa zhoko ze kevorko chü kediwatuo üdi kepu hie siwe!” ita. 15Süki mechükehouu nu keba pete Stefan meho terüpfü ba ru puo zie teigeidieliemia zie tuoi parketa nguta.

Currently Selected:

Mhakechüko 6: ANBRBSI

Highlight

Copy