Mhakechüko 7

Stefan Diepuko

1Sitse zievokezhatho-u sie puo ketso di, “Mha hako si zo me?” ita. 2Stefan sie:

“A kezeko#7:2 Gk Themiako, siezedzürieko. mu a puonuoko, a die rünyüshücie. Zayie Kepenuopfü u puotsau Abraham vo Haran nu kelhou mhodzü Mesopotami-a nunu puo pengushü, 3sidi puo ki, ‘N rüna mu n seyiemia khawa di tuo zo a kijü puo tha n kieshüketuou nu voliecie,’ sita. 4Süla puo Chaldiamia kijü khawa di vo Haran nu lhouta. Puo puou se sie, Ukepenuopfüe puo bu tsie nieko lhou keba kijü hau nu vorlie. 5Sirei Ukepenuopfüe puo ya kijü phizho puorei rhuopie puo tsü pekrei mo, sidi kijü süu pie puo mu puo yieko vie chü zotuoü phrashü, puo nuo puorei jü zoluo ürei. 6Derei Ukepenuopfü pukecü hamhie, puo yieko bu vo si kemo kijü puo nu lhoutuo, mu uko miadiemia chü di cie krie dia mia bu uko pesetuo. 7Ukepenuopfü pukecü, ‘Sirei mia uko tepie u die chükecüko, a süko pejotuo, siro süsie uko la parlie di thechü hanu a lie chütuo.’ 8Süsie puo dietseidiekho chülieketa zasi la puo zhüre. Sütuoi Abraham puo nuou Isak penuolie mu zha thetha nhie puo zhürelie; siro Isak puo nuo Jakob ngulie mu Jakob geinu u puotsanuo kerekenie lhoulie.

9“U puotsanuoko, Josef ngu u rota di puo zepie Ijipt nu shüwa; derei Ukepenuopfüe puo ze tuo, 10sidi puo kemezhiekecü neiüko nunu puo kelalie, sidi puo Ijipt nu kediu Faro mhodzünu kevor ki zorei mhasi tsiu mia khriepfükelie theja ngulie, sidi puo chüpie puo bu Ijipt kijü mu puo kikru pete kekhakezhau chülie. 11Süki Ijipt mu Kanan kijü pete nu pekrie di kemezhie phita mu u puonuoko kecüca puorei ngulie kenjüta. 12Derei Jakob-e Ijipt nu telha ba ükecü sikelie ki puoe u puonuoko ketsepie sünu shü rie. 13Süsie va kenieu va, Josef-e puo dzürieko bu puo silie, tsiu Faro bu Josef kinumiako silieta. 14Süsie Josef-e puo puo Jakob mu puosepuoyieko pete kesa mia hietheniepengou bu Ijipt nu kertanu pushü. 15Süla Jakob-e Ijipt nu tsuta. Sidi puo mu u puonuoko sünunu siata hu, 16tsiu uko mo pie Shekem nu vo Abraham-e Hamor nuonuoko ki nu raka pie khrükelie mekhruu nunu khruwa.

17“Sirei Ukepenuopfü thiedzü Abraham ki phrapie kezhü chü tseishüketuo teiu penuo vortazhü tse, u themiako Ijipt nu kra mu kruo phi sierta. 18Josef si kemo kedi kekrei puo Ijipt mho di sierta kemochie. 19Puo u yieko gei kethedo di u puonuoko pese phita di uko kemvü chüpie uko bu u nuonuo pesiawaketuo la süko kelhouwanuta. 20Süteiki Mosa penuolie, puoe Ukepenuopfü mhodzünu nuo kezivi phi yopuo. Khrü se puo puo ki nu theke, 21sidi puo khawa tse, Faro nuopfü puo chü pielie di pie puo nuo chülieta. 22Süla Mosae Ijiptmia mhasi pete pie pethapfülie di puo die nu mu puo mhathoko nu kuo se sierta.

23“Siro puo cie hiediaketa ki, puo themia Israelko#7:23 Gk Puo siezedzürieko, Israel nuonuoko. kedipuo mhie baya shicü mehoketuo lelieta. 24Süki mia puo mia bu puo zhasekecü ngu di puo themia süu yapie sie di puo kepese Ijipt-u biewa di puo zeu khepulie. 25Puoe Ukepenuopfü puo se di puo themiako kelashütuoü keba uko silietuo nhiecü lesie, derei uko süu ca silie mota. 26Süsienhie puoe mia kenie kegei keba ki puo unie donu theca chüwatuo üdi ‘A zenie, nnie siezedzürie ze; kiüdi nnie kegei ba ga?’ sishü. 27Derei mia pese kethau Mosa khukege zo di sie, ‘Supuonie n bu hie mhokezha mu capiu chünushü ga? 28No ndu Ijipt-u dukhrikewa tuoi a dukhriwa nyüya me?’ sita. 29Mosa die süu sishü tse ta vo Mediamia kijü nu lhou tuota, mu sünunu puo nuo kenie lhoulie.

30“Si tuo di cie hiedia sie Sinai kijüthou rayhau nu ronyho tu keba miü nunu teigeidieliemia puoe puo pengushü. 31Mosa süu ngu di puo ngota, sidi puo süu mehotuoü penuo phi tse: 32‘A n puonuoko Kepenuopfü, Abraham, Isak mu Jakob Kepenuopfü’ idi kepu silie. Süki Mosa pekhrukhru di süu meho michieta. 33Süki Niepuu sie puo ki, ‘N phikou rhuowalie, n ketha chüu mesa zocü la. 34A a themiako Ijipt nu kemezhie keba ngu, mu uko meheimelokecü pfhe si bate, süla a uko shüphrashüketuo la vorwe. Tsie vorlie, a n ketsepie Ijipt nu shütuo,’ sita.

35“Süu Mosa mia puo melie di puo üse, ‘Supuonie n bu hie mhokezha mu capi chünushü ga?’ isiketau, Ukepenuopfüe ronyho tu kebau nunu puo pengukeshü teigeidielieu geinu puo bu themiako kekhaketuo mu kelashüketuo la ketsekeshüu zo. 36Puo Ijipt nunu mu Kemerie Dzükezha nu siro cie hiedia rayha nu ketuo ki u ngoko mu zasiko chü di themiako ze parshü. 37Mosa haue Israelko ki, ‘Ukepenuopfüe a sesierkeshü tuoi puo nie themiako#7:37 Gk N siezedzürieko. donunu siedzekesimia puo sesiershütuo,’ ikeshüu zo. 38Rayha nu Israelko kehouu mu Sinai kijüthou geinu mha pukeshü teigeidielieu ze ketuou sü puo zo; mu khapie u tsüshüketuo la puo Ukepenuopfü kinu kerhei die ngukelieu zo. 39Derei u puonuoko puo die ze mvüte; uko puo khukege zowa di uko noue la Ijipt nu vota nyü sie zo, 40sidi sie Aron ki, ‘Hie cha thaketuo la terhuo huo chüshücie; Ijipt nunu hie ze parkecü Mosau kedipuo chüte shi hie si mote,’ sita. 41Süki uko thudonuo puo chülie di ruosuo chüpie miarhiu tsü, mu uko thuo chükelie süu la u neipie mhapuochü. 42Derei Ukepenuopfü uko kinu rüreita mu uko khapie uko bu teigei ketuo krodi neiüko rüsuoketuo chüwata, süko dze siedzekesiko leshüda nu thupie kezhü:

“ ‘He-i Israel kinuko,

nieko cie hiedia rayha nu ketuo ki perinuo dukhri mu pie ruosuo chükecü se a tsü me?

43Mo zo; nieko Molok rüsuopfhekiu,

siro nie themvü rhuou Refan,

nieko rüsuoketuo la chükelie miarhiko toupfü tuo;

mu süla a nieko whuopie Babilon tsewatuo.’

44“U puonuoko rayha nu ketuo ki zhapu pfhekiu rei se tuo zo, Ukepenuopfüe puo rhi thapie Mosa kieshü di chükelieu. 45Ukepenuopfü thuo u puonuoko mhodzünu whuokewa seyieko peviekelie ki u puonuokoe ngukelie süu Joshua geinu keyie vor. Mu süu David teiki ketso zo, 46puo Ukepenuopfü khriepfülie mu Jakob Kepenuopfü bu baketuo la thechü puo cha. 47Derei puo la ki chükeshü sü Solomon zo. 48Sirei siedzekesiko kepu tuoi, Kerükrietho-ue u dzie pie chükelie kiko nu baya mo,

49“ ‘Tei sü a kediba,

tsiu kijü sü a phiba zo.

Nieko kimhiecü ki puo chüpie a tsütieya ga? Niepuue siya,

morei a bu rüleiketuo chüu kirapuo ba ga?

50A dzie thuo mha hako pete chüshü mo üme?’

51“Harie pietsümvükecü themiako, umelou mu unyie zhürekemo, nieko rei nie puonuoko mhiei Kemesa Ruopfü petsou seiya. 52Nieko puonuoko siedzekesimia pechüpenyü kemo huo ba üme? Uko thiedzü kemiatho lietho-u vorketuo dze pukeshü Ukepenuopfü dieliemiako dukhri, mu tsie nieko puo sewa mu dukhrikewamia chüte. 53Nieko teigeidielieko bu keyiekeshü zho-u ngukelieko zo; siürei nieko süu dieze chü mo!”

Ketsie pie Stefan Vakhrikewa

54Mha hako sikeshü ki ukoe sie, Stefan gei u nou rüpe se di u hu thegeipie bata. 55Derei puo Kemesa Ruopfü bu puo tshupfü di teigei meho terü tha, süki Ukepenuopfü zayie mu Jisue puo zatsa ketha ngu. 56Sidi puo sie, “Harie, a tei kokeshü mu Themia Nuou Ukepenuopfü zatsa ketha ngu bate!” 57Sitse uko shie kemerie chü mu u dzie pie u nyie mekalie di keze thu zo vo puo vapielie. 58Sidi puo merhashü ze casie pra di ketsie pie puo va; mu puo kepejoko u pfhe lhepie Saul ükecü khriesamia puo phi nu pie zhü. 59Uko ketsie pie puo va thaluocü nu puo kecha chü di, “Niepuu Jisu, a ruopfü zeliecie,” ishü. 60Süsie puo khoutoupfü shie puo rhiechü di, “Niepuu, no kejo hau pie uko tsü gei shü hiecie!” si. Puo die hau pushü di siata#7:60 Gk Ze tsuta. .

Currently Selected:

Mhakechüko 7: ANBRBSI

Highlight

Copy