Mhakechüko 4

Pitor mu Johan Unie Mechükehou Mhodzünu Kevo

1Pitor mu Johan unie themiako ki die pu ketha nu zievoko mu rüsuoki kepfhe mhokezhau mu Sadukiko unie ki vorta, 2unie-e Jisu geinu kesiamia rheilakesie nyikecü dze pie mia pethaketa la u nou u nei mo phituo. 3Süla uko unie telie mu süki thevatieketa la unie khapie ba süsienhie tso. 4Derei dieu kesiko themia kekra pelelie; sidi süko le kesie nyie pengou mese.

5Süsienhie uko razou kezhako, phichüko, mu thezhokepethako Jerusalem nu kengulie, 6zievokezhatho-u Ana, Kaifa, Johan#4:6 Leshü kewe huo nu Jonathan. mu Alexander, tsiu zievokezhatho-u ze keseyiecü pete. 7Uko kedienie ze vo uko donu thalie tse sie, “Nnie kedipuo kekuo morei kedipuo za se hau chüya ga?” idi ketso.

8Sitse Pitor, Kemesa Ruopfü bu puo tshupfü di uko ki, “Kezhako mu phichüko, 9mhatho kevi chüpie kerünyieu gei keshü mu puo kimhie di shürholiete shicü dze thie hienie ketsoya üro, 10nieko pete rei mu Israelmia pete rei si touliecie, tsie haki ketha themia hau shürhokelie ha Jisu Khrista Nazaret-u#4:10 Gk Nazor-u. za kekuo nunu zo, süu niekoe puo goukewau mu kesia nunu Ukepenuopfüe puo chü perheikelieu zo. 11Jisu hau

‘Ki kechüko, niekoe khakewa tsieu;

süu bu kike mvüdze tsieu#4:11 Moro ketsie kemeyietho-u.’ chüliete.

12Puo geinu zo kemosie kelakelie kekrei puorei jü, kekreilamonyü u kelalie morokesuo la tei khro chüüphou donu theza kekrei puorei tuo mo.”

13Ukoe Pitor mu Johan unie kethepfu ngushü tsiu unie leshükesimia zo mo siro miaümia zo ükecü silie tse u ngota mu unie hadzü rei Jisu ze tuoya ücü sita. 14Shürhokelieu unie khieki thakecü ngukelie ki uko mhapuorei pu pejo salie kenjüta. 15Sidi unie bu mechükehouu nunu tuotanuwa, sidi uko thuo uko donunu kerüchü bata. 16Uko sie, “Úko themia hanie pie kedipuo chü ro vi ta? Kekreilamonyü Jerusalem nu kelhoumia pete rei unie geinu zasi kemeyie puo chükeshü; we rei süu mo ükecü pulie kenjüte. 17Derei hau dze keyie pekrapie mia ki shü sawa kemonu úko unie bu mia ki theza hau pu sa hienu kedewa khe,” sita. 18Süla uko unie kielie di unie bu mhakipuorei Jisu zau se pu morei petha sa hienuwata. 19Derei Pitor mu Johan unie sie uko ki, “Ukepenuopfü mhodzünu Ukepenuopfü pfhe zekecü ki nieko pfhe zekecüu puotoukuotuo mo kishi, nieko thuo le phicie; 20kekreilamonyü hie kesi kenguu pu molie kenjü ze.” 21Sidi unie kede sakewa sie, unie bu tuota, unie pechülieketuo ca puorei ngulie kenjüta, kekreilamonyü themiako pete unie mhatho süu la Ukepenuopfü tsheketa la. 22Siro shürhokelie zasi hau puo geinu chükelieu kelhouzha cie hiedia rei zie saketa la.

Kepeleko Kethepfu Chakecü

23Mia unie khashükewa sie, unie la unie kro-u#4:23 Gk Unie themia üya. nu vor di zievokezhako mu phichüko unie ki kedipuo pu shicü kezashü. 24Siro uko süu sikeshü ki, uko pete keze puo chü u pfhephra peto di Ukepenuopfü ki, “Kekuotho Niepuu, tei mu kijü, dzükezha tsiu süko nu ketuo pete chükeshüu, 25Kemesa Ruopfü geinu no hie puotsau David, n kituou#4:25 Moro nuou. kinu pukeshü,

‘Kiüdi Judakemomia u nou rüpeya ga?

Mu themiako kemethuoko medoya ga?

26Kijü nu kediko u kesese thate,

tsiu kezhako keze kengulie di,

Niepuu mu Khristau petsou thate.’

27Ketho zo, Herod mu Pontia Pilat unie rei rüna hau nu Judakemoko mu Israelko ze kehou di n kemesa kituou#4:27 Moro nuou. Jisu, no puo kenhekelieu petsou zo, 28sidi n dzie mu n mharhü pedzüperie chütuo üdi rhüpie ketuoko chüwa. 29Tsiu Niepuu, tsie uko mha kechükede kebako mehoshücie, di n kituoko#4:29 Gk Diemia. bu thepfu di n dieko pulieketuo chüshücie, 30n kekuo dzieu yhashü mia chü keshürhoshü mu n kemesa kituou#4:30 Moro nuou. Jisu za nunu zasiko siro u ngoko chülieketuo khashücie.” 31Sidi uko kecha chüshü tse, uko vo kehou kebachüu shü kenieta; süsie uko pete Kemesa Ruopfü u tshupfü tsiu thepfu di Ukepenuopfü die puta.

Kepelemiako Mha Pete Vierhe Chüketa

32Süki kepeleko krodiu keze nou puo chüta, mu miapuorei puo thuo puo vieü puo vieü mota, derei uko mha pete pie vierhe chüta. 33Siro apostelko kuo se di Niepuu Jisu rheilasieketa zhapu chü bata, mu uko pete gei ngukemezhieu thuo tshupfü bata. 34Süki uko donu ketsopfhümia puorei jüta, kekreilamonyü u ki u lie kenyimia, süko zelie di zekelie mako se vor. 35Sidi uko süko pie apostelko phi ki khashü, mu mia puopuo tsopfhü le di uko süko kezalietaya. 36Süki Josef ükecü Saipras nunu penuokelie Levimia puo tuo, apostelko puo üse Barnaba üya (puoca “mia chü kethepfuyakezha nuou”). 37Puo lie puo zelie, sidi rakau se vor apostelko phi ki shü.

Currently Selected:

Mhakechüko 4: ANBRBSI

Highlight

Copy