Kediko Kenieu 25
25
1Siro puoe kedi chükelie cie thepfü cie, khrü ker-u nu zha ker nhie, Nebukadnezar Babilon kediue puo rüpfhünuo pete ze vor Jerusalem perhie di süu houpfü bata; tsiu ukoe süu khieümhoura dahou chülie di re bata. 2Sidi nadiu whuo zo ba kediu Zedekia dikecü cie kerepuokrüu tso. 3Siro khrü diau nu zha thepfü nhie nadiu nu pekrie re se vorta, süla kijüu nu themiako kecüca puorei jüta. 4Sidi nadiu pfüphawa, siru terhü themia pete teizei ze kediu zie khieki, kuda kenie donu kharu puo ze di tata, Chaldiamia thuo nadiu houpfü ba zo shierei, ukoe Araba tsatie nu vota. 5Derei Chaldiamia chüpahikoe kediu whuo vo, sidi Jeriko razha nunu puo tsolie; tsiu puo chüpahi pete puo khawa di ta cüreta. 6Sidi ukoe kediu telie di puo ze Ribla nu Babilon kediu ki vorshü; sidi ukoe puo dienya kecü. 7Siru ukoe Zedekia mhingu nunu puo nuonuoko dukhriwa, siro Zedekia mhi kerülawa sidi mese dziekha pie puo phalie di puo ze Babilon nu vota.
Juda Tezeketa
(2 Seyie 36:17-21; Jer 39:8-10; 52:12-30)
8Siro khrü pengou nu, zha thenie nhie, Nebukadnezar Babilon kediu dikelie cie kerethepfü cie, Nebuzaradan kepfhekezhau, Babilon kediu kituomia puoe Jerusalem nu vor. 9Sidi puoe Jihova kiu, kediu kiu mu Jerusalem ki pete thewa, tsiu themia kezhako ki pete mi pie thewa. 10Tsiu Chaldiamia chüpahi, kepfhekezhau ze keba pete, Jerusalem khieümhoura dahouko biemewa. 11Süteiki kepfhekezhau Nebuzaradan-e nadiu nu keba themiako siro Babilonmia dzie nu kedie chü leketako, themia kro-u donu lhiepie kebako zeta. 12Derei kepfhe kezhaue themia mhakejümiako bu khubebo keleimia tsiu lieciemia chütuo üdi khapie bawa.
13Siro Jihova kinu keba mese pie kechü coko, mu puo phiko, tsiu mese pie kechü dzükezhau, Chaldiamiae bietshebietsha phawa, sidi mese kebako toupfü Babilon nu vota. 14Siro galiko, mekhouko mu mitulo kebeko mu kecieko, siro mese vienya se mhachüyakezha pete se tuota, 15tsiu shüthuoli, seikhou mu sütuoi suna pie kechü, suna keba mu rakachü pie kechü, rakachü keba, kepfhe kezhaue seta. 16Co kenienie rei, dzükezhau, tsiu Solomon-e Jihova kiu la chükeshü coko, mhanya hako mese pie kechü puo mesi mejü tsokelie pfü mo. 17Co puo rükrie thu kerethetha, siro co süu gei keba mese se chü; tsiu puo rükrie thu se, siro co khieümhoura houpfü keba dorüko, mu turaü kerhiko, pete mese se chü.
18Siro kepfhe kezhaue, zievokezhau Seraia, mu süsieso zievo Zefania, siro kikha kepfhe seko ze tuota, 19tsiu nadiu nunu puoe terhü themiako mhokezhau, siro kediu mhodzünu bayakezha mia pengou nadi nunu ngukelieko, rüpfhünuoko mhokezhau donu kethuu nadi nu mia kie kengushüyakezhau, tsiu nadiu nu ngukelie mia hiesorou zeta. 20Nebuzaradan kepfhekezhau hako ze tuota, sidi ze vor Ribla nu Babilon kediu ki shüwa. 21Ru Babilon kediue Hamat kijü nu Ribla nunu uko vü di uko vükhriwa. Sükemhie di Juda teze puo kijü nunu miadie chü vota.
Juda nu Peshakeshüko Ta Ijipt nu Voketa
22Siro puoe Gedalia Ahikam nuou Shafan bu Juda nu peshakeshü themiako, Nebukadnezar Babilon kediu khakewako mho ahng-u chü. 23Sidi chüpahi mhokezhako pete, uko mu uko themiakoe, Babilon kediue Gedalia bu kezha chüketa silie tse, Nethania nuou Ishmael, mu Karia nuou Johanan, mu Seraia Tanhumet nuou Netofatmia, mu Jazania Makhat nuou, uko mu uko themiako, Mizpa nu Gedalia ki vor. 24Gedaliae uko mu uko themiako ki rüse di sie, “Chaldiamia kezhamiako prei hiecie, kijüu nu lhou balie, Babilon kediu lie chülie, silie liro nie la vituo,” sita. 25Derei khrü thenieu nu, Ishmael Nethania nuou Elishama nuou, kediu seyieu, mia ker puo ze vor, sidi Gedalia vü, sidi puo vükhriwa, siro Judamia mu Chaldiamia puo ze ketuoko Mizpa nu kebako sa. 26Sitse themia pete, kecü rei kezha rei#25:26 Moro phichünhicu., mu chüpahi mhokezhako sielie di Ijipt nu vor; ukoe Chaldiamia prei batakecü la.
Kedie Kechü nunu Jehoiakin Kha Lakeshü
(Jer 52:31-34)
27Juda kediu Jehoiakin miadie kechü cie serethenie cie, khrü kerekenieu khrü, zha mepfüethenie nhie, Babilon kediu Evil-merodak di sedekelie cie, kedieki nunu Juda kediu Jehoiakin khashüwa. 28Tsiu puoe menuo di puo ki mha pu; siro puo kediba chüpie Babilon nu puo ze kebako mho shü. 29Siro Jehoiakin-e puo kedie pfheneiko kediwa. Sidi puoe puo kerhei chie kediu mizhü geinu mhacümhakrie bata. 30Mu puo meza la, teisonhie ngulie kezhü de kediu ki nu ngulie seiya mu puo kerhei chie si vota.
Currently Selected:
Kediko Kenieu 25: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More