Kediko Kenieu 23
23
Josia Mhachü Kesa Lakeshü
(2 Seyie 34:3-7,29-30)
1Siro kediue mia ketsepie Juda mu Jerusalem phichüko pete kie kengupie puo ki shülie. 2Sitse kediue Jihova ki nu kho, mu Juda themia pete tsiu Jerusalem nu lhou keba pete, zievoko mu siedzekesiko, siro themia kecükezha pete puo ze kho; sidi puoe Jihova ki nu ngukelie dietseidiekhokelie leshüdau nu dieko pete phrüpie uko nyie nu shü. 3Siru kediue tsiepou puo khieki thalie di Jihova mhodzünu dietseidiekholie, sidi puo melou pete se mu puo kerheiro pete se leshüda hanu ngukelieko chüüzelieketuo la, Jihova siemedzituoü mu puo diekhakeshüko, puo zhapuko, siro chünukeshüko chüüzelietuo üshü. Siro themia pete dietseidiekhokelie nu thalie.
4Sitse kediue die khapie Hilkia zievokezhatho-u, mu zievo-u, siro kikha kepfheu tsü di, Jihova rüsuoki nunu Baal la siro Ashera la, siro teigei ketuo krodi pete la chükelie tehiemekhou pete se chazou partanushü, sidi puoe süko Jerusalem khie Kidron lie nu thewa, tsiu süko migeko toupfü Bethel nu vota. 5Siro puoe terhuorhi kerüsuo zievoko Juda rünako nu mu Jerusalem khieümhou thechüko nu, thechü kerükrieko nu Juda kedikoe ruosuo chütuo üdi kedakelieko ruosuo chüpie Baal, siro niaki mu khrü themvüko tsiu teigei krodiko pete tsüyakezha pete khawa. 6Siro puoe Jihova kiu nunu Asherau se Jerusalem khie, Kidron Rücüu nu vorlie, sidi süu Kidron Rücüu ki nu thewa, sidi süu bietshiephawa, tsiu puo nyophe süko kelhoupie themiako mekhru nu shüwa. 7Puoe rüsuoki nu thepfumia thethekelie kiko, Jihova kinu kebako, sünu thenumia bu Ashera pfhe doyakezhako bierhuowa. 8Tsiu puoe Juda rünako nunu zievoko pete ze vorlie, sidi zievoko ruosuo chüyakecü thechü kerükrieko, Geba nunu vo Beersheba ketso pekawa, tsiu nadiu nu Joshua care ki, nadiu nu care u vitsa keba careko nu thechü kerükrieko bierhuowa. 9Sirei thechü kerükrieko nu zievoko Jerusalem nu ruosuobau nu khor mota, derei ukoe u siezedzürie donunu khreiüshükemo niekhrüda cü. 10Siro puoe Tofet, süu Ben-hinom razhau nu miapuorei bu puo nuo thepfumia morei thenumia thepie Molek rüsuo motuoü pekawa. 11Puoe Juda kedikoe Jihova kicie nu kele ki, iunuk Nathan-melek kebau khieki, süu rünau khie bakecüu kiki nu kier niaki rüsuokecüko biewa, sidi niaki kierbageiu mi pie thewa. 12Tsiu Ahaz ki peso gei keba ruosuobako, Juda kediko thuo chükelieko, siro Manasseh-e Jihova kitiezhanie nu ruosuoba chükelieko, kediue bierhuowa mu süko biephrowa, sidi puoe nyophe süko kelhoupie Kidron Rücüu nu shüwa. 13Siro Jerusalem mhodzü keba thechü kerükrieko, bie pesuokewa kijüthouu zatsatie kebako, Solomon kediu Sidonmia kerütsekecüu Ashtoret la, mu Moabmia kerütsekecüu Khemosh la, mu Ammonmia kerütsekecüu Milkom la, chükeshüko kediue pekawa. 14Sidi puoe terhuorhiko biephro phaphawa, siro Asherako#23:14 nanyü seiko., sidi thechü süko nu themia ru thuo tshuta.
15Sütsügei rei Bethel nu ruosuobau, Nebat nuou Jeroboam chükeshü thechü kerükrieu Israel bie kephoumakeshüu, puoe ruosuobau mu thechü kerükrieu kenienie rei bierhuowa. Puoe thechü kerükrieu thewa, sidi pie nyophe chüwa, tsiu Ashera rei thewata. 16Sidi Josiae rüreishü tse, puoe kijüthou gei kezhü mekhruko ngulie, sitse puoe mia ketseshü, sidi mekhru nunu theruko chülie, sidi süko pie ruosuoba geinu thewa, sidi süu perhuwa, süu Jihova die Kepenuopfü themiau pukeshü tuoi, die hako pukeshü chü tseiwa. 17Sitse puoe sie, “A ngu ketha tsiese luu kedipuo ga?” Sitse nadi nu themiakoe sie puo ki, “Süu Kepenuopfü themiau, Juda nunu vorkecüu no Bethel ruosuobau petsou di chükewako pukeshüu mekhru lie.” 18Siru puoe sie, “Puo bu rüleilie; miapuorei bu puo ru bie hiecie,” sita. Süla ukoe puo ruko bu si zhüta, Samaria nu kevor siedzekesiu ru sa zhüta. 19Süsie rei Josiae Samaria rünako nu thechü kerükrieko kiko, Israel kediko chüpie Jihova nou chü kemeyiekecüko chüseta, sidi puoe Bethel nu chükeshü mhiei süko gei chüwa. 20Siro puoe ruosuobako gei thechü kerükrieko nu zievoko pete dukhriwa, sidi themia ruko pie uko geinu theshü, sidi la Jerusalem nu vota.
Ciekevonyiu Khapie Bakelie
(2 Seyie 35:1-19)
21Sitse kediu themia peteko ki diekhashü di sie, “Dietseidiekhokelie leshüda hanu thupie kezhü mhiei di nieko Jihova nie Kepenuopfü ze ciekevonyi nyiliecie,” sishü. 22Israel capimiako capi kechü teiki morei Israel kediko tei pete nu vor tsie ketso sükemhie ciekevonyi nyishü mo zoluo. 23Derei Josia dikelie cie kerethetha cie Jerusalem nunu ciekevonyiu nyilie.
Jihovae Juda gei Puo Nou Meyie Baketa
24Sizomoü terhuo zeyakezhako, themoumiako, terhuorhiko, mu terafim#23:24 Moro kikru rhuoko., siro Juda mu Jerusalem nu mha kerütsekecü ngukelie khe, Josiae chü kelhouwa, süusü Hilkiae Jihova kiu nu ngukelie thezho leshüu dieko chüüzelietuo ükecü la zo. 25Puo mhodzü kedi puorei puo nou pete se mu puo kerheiro pete se mu puo kekuo pete se, Mosa thezho khakeshüu chü tseituoü Jihova tsükeshü puo kemhie tuo mo; tsiu puo sietsa rei puo kemhiekecü sierlie mo.
26Sirei Jihovae puo nou meyiepie kemerie chüketa nunu rüdi lalie mota, süusü puoe Juda gei puo nou meyieta, kekreilamonyü Manasseh-e puo nou chü kemeyiekeshü la. 27Süla Jihovae sie, “Ae Israel chükewa tuoi a mhinguki nu Juda chüwatuo, sidi a kedakelie Jerusalem hauha, siro kiu dze a kepuu, a za bu sünu batuo ükecüu khawatuo,” sita.
Josia Se
(2 Seyie 35:20-27)
28Siro Josia mhatho kekreiko, tsiu puoe chükeshü peteko, süko Juda Kediko thedze Leshüda nu thupie zhü mo üme? 29Puo teiki Faro Neko Ijipt kediue Asiria Kediu ki kho di Eufrat rüu nu vo, siru Josia kediue vo puo ze kese, derei Faro Nekoe Megido nunu puo ngulie tse, puoe puo dukhriwa. 30Sitse puo kituokoe kierbagei geinu puo mo-u pfülie, di puo pfü Jerusalem nu vor, sidi puo thuo puo mekhru nunu puo khruwa. Sitse kijüu nu themiakoe Jehoahaz, Josia nuou zelie, di tier pie puo kenheshü, sidi puo bu puo sou nu kedi chülie.
Jehoahaz Kedi mu Süu Jüketa
(2 Seyie 36:1-4)
31Jehoahaz-e kedi chü sedekelie ki puo kelhouzha cie mepfüeseta; mu puoe Jerusalem nu khrü se kedi chü, siro puo zuo zae Hamutal, Libnamia Jeremia nuopfü. 32Tsiu puoe Jihova mhodzüki puo puonuoko tuoi, mha kesuo shüüko chü. 33Faro Nekoe puo bopie puo bu Hamat kijü nu Ribla nu bata, süusü puo bu Jerusalem nu kedi chülie lhoü; sidi rünau kemvü chü di khezhanuo rakachü krie puo, mu suna talent puo khruo. 34Tsiu Faro Nekoe Eliakim Josia nuou chüpie puo bu puo puo Josia sou nu kedi chü, siro puo za thopie Jehoiakim chüwa, sidi Jehoahaz ze tuota, siru puoe Ijipt nu vor, sidi sünunu siata. 35Jehoiakim-e rakachü mu suna pie Faro tsü, derei puoe Faro die khakeshü mhiei raka khashütuo üdi kijüu bu khezhanuo khruo; puoe mia puopuokecü puo khezhanuou ze di, pie Faro Neko tsütuo üdi kijüu kinu rakachü mu suna lielie.
Jehoiakim Kedi Kechü
(2 Seyie 36:5-8)
36Jehoiakim di sedekelie ki puo kelhouzha cie mepfüepengouta, tsiu puoe Jerusalem nu cie kerepuokrü di. Siro puo zuo za Zebida, Rumamia Pedaia nuopfü. 37Tsiu puoe Jihova mhodzü puo puonuoko pete kechü tuoi mha kesuo shüüko chü.
Currently Selected:
Kediko Kenieu 23: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More