Pitor Kerieu 2
2
Kerhei Tsie mu Kedakelieko
1Süla nieko thezho kemo neiü mu kedodakecü neiüko, mhatho nu pecülie kemo, mia ngu u rokecü, mu mia thamelekecü pete khawalie. 2Sidi nuoranuomia mhie di ruopfü nudzü kemesau mengu siei zolie, süu geinu memie sie di kelakelie tsolieketuo la, 3nie Niepuu ketseikevi methawate ru.
4Nieko mia bu puo thiwa zorei Ukepenuopfü thuo kedakelie puoma kere kerhei tsieu ki vorliecie, mu 5kerhei tsieko kemhie nieko rei zievo kemesa kro puo chü ketoukerepfü sie ruopfü ki puo chüliecie, sidi Jisu Khrista geinu Ukepenuopfü bu lielie kesü ruopfü kelhou ruosuo chülieketuo la. 6Süu dze kethodie nu thupie ketuo:
“Harie, a Zion gei ketsie puo khapie zhü,
kedakelie mu puoma kere puoke nu tsieu;
kehoupuorei puo pelekelieu thenga chütalie lho.”
7Nieko puo pelekelieko la we, puoe puoma kere tsieu; derei pelekemoko la we,
“Ki kechükoe khakewa tsieu puoke nu tsie chüketau,”
8mu “Thephi kemesü tsie tsiu mia bu tetsuketuo tsiekrieu zo.”
Ukoe tetsutaya, ukoe dieu ze mvücü la, situo üdi pedzüperie rhüse ketuo tuoi.
9Derei nieko zowe kedakelie seyie, kedi zievo, kemesa seyie, Ukepenuopfü vieketa themia zo, süusü kezei nunu nieko kiepie puo kezie u ngo phi zocüu nu shülieketau mhatho kevi kezhako pupie mia pesilieketuo la zo. 10Va puo we nieko ü themia ütuo mo,
derei tsie we nie Ukepenuopfü themia chüte;
Va puo we nie ngukemezhie ngulie mo,
derei tsie we nie ngukemezhieu nguliete.
Ukepenuopfü Kituomia Chükelie
11A khrieko, a nie bu rüsomia mu rüvemia kemhie di nie ruopfü perhie tuoyakezha chüüphou menguko nunu nie kethelienu beiya. 12Nie Judakemoko donu nie zhorüli vi se di lhoulie, sidi mia nie üse kesuo kechümia üdi nie thaya rei, uko bu nie mhatho kevi ngu di Ukepenuopfü mia nyie pepituoü#2:12 Gk Ukepenuopfü u pfhü kevor nhie. kevor nhie puo tshelie.
13Themiae rhükelie zho#2:13 Moro themia la rhükeshü zho khe. kehoupuorei Niepuu lanu chüliecie, kedi kezhau zho üse kerükrietho chü rei, 14morei ahng zho rei, süko bu siazha pie puotou kemo chüyakezhamia tsü mu mha kevi chüyakezhamia tshenu di ketsekeshümia. 15Ukepenuopfüe nie bu mha kevi chüpie mhasikemomia diethuodieruo kepuko va pejütuo ükecü puo medota zocü la. 16Ukepenuopfü kituomia#2:16 Gk Diemia. tuoi nie phreishüketamia mhie di lhoulie, sirei nie phreikeshü süu se mha kesuo kechüu whewa hie. 17Mia pete rhulie. Kepele kikruu khrielie.#2:17 Gk Siezedzürie kechüu khrielie. Ukepenuopfü preilie, kediu rei rhulie.
Khrista Kemezhiekeshü Thakie
18Kediemiako, nie niepumiako rhu di dieze chü tseilie, u zho keviko rübei monyü u zho kesuomia die rei zelie. 19Kekreilamonyü miapuonie Ukepenuopfü dze le di, puotou kemonu puo bu kemezhiekecüko rei hielieya ro puo kevi dze pu zotuo. 20Nieko mha kesuo kechü la, mia nie pechükecü hielie rei süu la therhu kikecüpuo ngulie ta? Derei nie puotouu chü di süu la kemezhielie mu süu hielie ro nie Ukepenuopfü nei chüliete. 21Mha hau la nie kielie, kekreilamonyü Khrista rei nieko la kemezhieshü, sidi nie bu puo phisie nu volieketuo la thakie chüpie zhü.
22“Puo kephouma chü mo,
mu puo tie nu mia kese puorei ngulie mo.”
23Mia puo zhasekecü ki, puo mia zhase la mo; puo kemezhiekelie ki, puo mia kechükede la mo; sirei puo thuo puo pie kemezhü tou nu mia nyie pepikezhau pelewata zo. 24Puo thuo krus#2:24 Moro puo mo geinu u kephoumako sei gei pfü sie ireiya. geinu u kephoumako puo mo geinu toupfüliete, sidi u bu kephouma kitsa u pesiawa mu kemiatho la lhou tuolieketuo la; puo kevüpfüko#2:24 Gk Vümvü iya. la nieko chü kemeneliete. 25Kekreilamonyü nieko tekuo tuoi yotuo ru, tsie we nie ruopfü kepfheu mu rüguokezhau ki vorliete.
Currently Selected:
Pitor Kerieu 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
