Pitor Kerieu 1
1
Kelukeshü
1Jisu Khrista apostel-u Pitor-e, pie ta Cüre tuoketako vo Pontu, Galatia, Kapadokia, Asia mu Bithuniako nu tuoketako ki shü, 2Ukepenuopfü u Puou thuo kedalie mu rhüse tuote, u bu Jisu Khrista dieze chü mu puo zie kegepie valieketuo la Kemesa Ruopfü nunu chü kemesa se tuoketako:
Ngukemezhie mu nouneu bu nie gei ba phikelieu chücie.
U Kelhou Kemerüu
3U Niepuu Jisu Khrista Puou mu Ukepenuopfü bu thejakepfüu chücie! Puo u ngumezhiethorcü la kesia nunu Jisu Khrista rhei lasiekelie geinu u penuo kesapie kerhei siedze kemerü nu shülie, 4tsiu kaüjütalie kelho, rhu kemo mu ratalie kelho theka puo teigei nu nie ya chüpie zhüte, 5thelatsanu pesipengushütuoü keba kelakelie hau nie kepele geinu Ukepenuopfü thuo puo kekuo üse nie rükhiese tuo zo. 6Hau la nie tsie zopuoki nie kemezhiekecü neiü seüdzütuo ürei nie nei phi tuoya. 7Sidi mi nunu kevikesuo siwa rei suotayakezha suna ki rei puoma rekuokecü nie kepele ketho-u bu Jisu Khrista mia mhingu chü kevor nhie thetshetherhu mu zayie chülieketuo la. 8Nie puo ngu mo rei, nie puo khrieya; mu nie tsie puo ngu mo zorei nie puo peleya, sidi nie nei pie puphalie kelho zapuzayie nu tuote, 9nie kepele kemerüu, süusü nie ruopfü kelakelie nguliezhükecü la.
10Ngukemezhie nie gei vorketuo dze kepu siedzekesikoe u terüchü mu menuo se di kelakelie süu dze pfhü vor zo, 11sidi uko nou ketuo Khrista Ruopfüu thuo pedzüperie Khrista kemezhieketuoko mu zayie chüketuo dze pukeshü ki supuo geinutie shi morei kedikechükipuotie shicü siedzekesikoe pfhü vor. 12Süki süko u thuo u la mo di nie la lietho chü vor zo ücü silie, süusü teigei nu ketsekeshü Kemesa Ruopfüu geinu tsie dieliekevi pethayakezhakoe nie ki puyakezha dieko geinu siliete, mha süko teigeidielieko rei ngu nyü phi vor zo.
Mesa di Lhoulienukecü
13Süla mhachüketuo la nie nou dojülie,#1:13 Gk Nie nou chatsa pielie. sidi nie kekhase balie, Jisu Khrista mia mhingu chü vorketuo ki khapie nie tsüketuo ngukemezhieu pelekhrupfü ba zolie. 14Dieze nuonuoko mhielie, thiedzü nie mhasi kemo ki rüya mengu zhoko medzita hie. 15Sikecüumonyü nie kiekelieu mesakecü tuoi, nie zhorüli peteko nu mesalie; 16kekreilamonyü süu thupie kezhü, “Nieko mesaliecie, kekreilamonyü ae mesakecü la.”
17Tsiu mia puo gei rei puo nei si krei mo di themia pete mhatho kheki sü chü di theca chüyakezhau üse nieko Puo üdi kieya liro, nie miara ketuo ki mia preiürhu di lhouwaliecie. 18Nie puonuoko kinu keyie kevor kemethuo zhorüliko nunu nie rhalieketa nie si ba, mu nie rhakelie süusü kaüjütalie kevi rakachü morei suna se mo, 19derei puotoukecü morei ciewa kemo tekuonuo mhiekecü puoma keretho Khrista zieu zo. 20Puoe kijüu mvü dzekelie mhodzü kedase tuote, derei nieko la vor thelatsanu puo pie mia pesipengukeshü zo. 21Nie puo la kesia nunu puo kesoukelieu mu puo bu zayie chükelieu Ukepenuopfü pelelie, sidi nie kepele mu siedze rei Ukepenuopfü gei bate.
22Tsie nie ketho-u#1:22 Leshü kewe huo nu Ruopfü geinu icü sa. dieze chükelie geinu nie ruopfü chü kemesaliete, nie donu kekhrie ketho-u bu balieketuo la, nie nou#1:22 Leshü kewe huo nu u nou kemesa si. nu nie thochü#1:22 Moro sei. di huoniehuo khrielie. 23Niekoe penuo kesaliete; süu kaüjütalie kevi nunu monyü kaüjütalie kelho tsiau nunu zo, süu rhei mu ba seiyakezha Ukepenuopfü dieu geinu zo.#1:23 Moro rhei ketuo mu shükhreshühiekezha Kepenuopfü dieu geinu.
24Kekreilamonyü
“Chüüphou pete nha mhie zo,
mu uko zayie pete rei nhapou mhie zo.
Nha rüwitaya,
tsiu nhapou rei rataya,
25derei Niepuu dieu kechachie ba seiya.”
Siro pupie nieko kiekeshü, dieliekevi die sü süu zo.
Currently Selected:
Pitor Kerieu 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
