Luka 14
14
Yesu Bar ɗǝ Sum Viin Fedna maa Angaa Yahudu
(Luk 14.1-35)
1Viin Fedna maa angaa Yahudu yen, kǝ Yesu nak lokng mushori maa Farisi yenaa ryaa maa awura ryaa, angaan kaa ta tang fur yis ɓyaa ma ta. 2Pang sum yen kǝ akuɓol mee ɗaa kwak mee bumsullaa taa Shambal ta nggen Yeswaa. 3Pang Yesu yiɓǝn. Angaan yokghan shiiring Musa ɗaa Farisi ka, “Shiring Musa shee ka kun kaa bar ɗǝ mung kǝng womnakghaa viin fedna maa angaa Yahudwaa nyaa? Koo kun nakghaa?” 4Pang a ɗa maad, shee Yesu gunji sum ki pang bar. Pang foo maa ka kǝ niyang.
5Pang yiɓǝn yen ka, “Na ni ta kǝshii yinaa kǝ Fan mee koo kala mee ni piri kǝshii kung minna viin Fednaa, pang vikghaa maa nyee rak paa?” 6Nzup ɗǝ kaɓan a sham pala ma ta shii maa awung kǝ sheeki rak.
Taɓan shii ɗǝ Ɓwakghaa maa Sum
7Mee kǝ yokghai ka asheeni kyai mok ara ɗaa maa mushori ɗa ya ta, pang ɓan yen agara mari. 8“Ng muɗakghai ni kwar ku lakng yalang yii, kaa cir ara ɗaa maa mushori kaa taa ˈyii yaa rak, takghaa ri mang mushori ɗakghai ni mang kǝ ɓyak ku. 9Ng mee ni kap kaɓan, mung kǝ kwar yin lak mɓaa yin ki, taa ɓaa ku ka, ‘Nanzu kaa na sum ri ara ɗaa mari.’ Tung kaɓan ndoo kaɓa ku a naa ta ɗaa nggǝra kǝshii maa sum myaa ni. 10Tung kaɓan, muɗakghai ni kwar yin lak, ɗaan nggǝra, ta ara ɗaa maa dǝs maa suma, tung ka mung kǝ kwar yin lak ki ni tari, ɓaa ku ka, ‘Mar min, nanzu kaa ta ɗa araan zar zaraa.’ Tung kaɓan a makghaa ku ta yis maa sum kaa kwar yen lak kyaa. 11Nzup mung kǝng makghaa shii mee a mbasakghaa ma, mung kǝ mbasak shii mee a makghaa ma.”
12Yesu ɓan mung kǝ kwar lak ki ka, “Ng woni kwara lakng ryaa maa awura ryaan vii koo ɗǝ kǝryakghan, kaa kwar lak maa mar mu ni en nak, ɗaa zaa mu ɗaa tǝɗong mu ɗaa angaan kaa ɗa awung kwak kaa pyet ɗǝ wok ni en nak. Wo ni shii kaɓan, yen ni maa a kwara ku lak, ɗǝ kaɓan ni pang apǝra ku ta shii maa awung kaa shii. 13Tung kaɓan ng wo ni kwara lakng ryaa maa wura ryaa, kaa tokshii angaan shoor ɗaa gurum, ɗaa angaa kwak shanggad ɗaa rup, 14Tung ka a shama pǝra ku rak. Vitor fwaa ku maa myak zar mee ta, taa pǝra ku viin Nanzwa maa sum zar raa.”
Agara shiin Banji Lakghaa
(Mat 22.1-10)
15Gaat ta kǝshii maa angaan kaa ryaa awura ryaa ki kǝ yir kaɓan, pang ɓan Yesu ka, “Mu nggen kal ni mung kǝ sokghaa ryaa maa awura ryaa kǝshii Lakng tǝruun Vitora.”
16Yesu pal ma ta ka, “Sum yen ta kǝ ɗǝs awura ryaan lak shee kwar lak maa sum pyak. 17Kǝ kǝd kasa maa ara lak ki, pang ton kori mee ta angaan kǝ kwar yen lak kyaa, ka kǝ ta ɓanyan ka, ‘Taran, a kǝd kasa maa ara lakng ryaa maa awura ryaa ki yaa.’
18“Nzup ɗǝ kaɓan koo na paa lǝr yara maa gwarshiin kǝ waraa ta. Mang kǝ gaat ki shee ka, ‘Taa yisa ryaa ni pang ng ryap ara pashii, nak maa dap ni kǝng naa ɓee, kalang mi gep kǝng naa ɓee ara ki.’
19“Ɗakghai ki shee ka, ‘Ng ryapshii aroci maa kala ɗǝn pashii yaa kwen, ng ruɗaki kǝng wunak yen ɗǝna kǝng ta kam yen kǝng ɓee, ng kwarsa ku ni kaa kalang mi gep.’
20“Muɗakghai shee ma mee ka, ‘Ng yal yii pashii min taa yisa ryaa ni, tung kaɓan ng sokghaa gangaa rak.’
21“Kori ki taa ɓan mulok mee ki, Pang mulok ki shii tura. Pang ɓan kori mee ki ka, ‘Nakghai ta gwarshaa, ɗaa longgor maa ndar ki, ka kwar lak maa angaa shoor, ɗaa gurum ɗaa rup ɗaa angaa kwak shanggad.’
22“Kori mee ki shee ka, ‘Viikuta, awung kaa shee ka kǝng shii ku maa ng shii yaa. Nzup ɗǝ kaɓan dǝs maa ara ɗaa yakghai ta kǝshii kyaa.’
23“Pang mulok ki ɓan kori mee ki ka, ‘Nak shiin ɗǝngaa ɗaa wan shii, kaa ɓan asum kaa tari, tung kǝ lok min sok shiil ta. 24Ng ɓana yin ka, nzup maa sheening kaa kwar yen lak ki gaat ta kǝshii yena sokghaa lamza awura ryaan lak min ki rak.’ ”
Bungaan Shin Byaan Yeswaa
(Mat 10.37-38)
25Kǝ banji ɓum maa sum lǝr byaa ma, shiiɓǝl ma pang ɓan yen ka. 26“Nzup mung kǝ taa ta makghaa, nakghaa mu byaa min rak, shee mee ni ɓyak ruɗan mi kǝ ɓyak mang kǝ ruɗa dǝ mee ɗǝ nak mee, yii mee ɗaa wan mee, azaa mee ɗaa azaa mee, ɗǝ shii mee rak, shama nakghaa mu byaa min rak. 27Nzup mung kǝ mee ni cir koning gandalangaa mee kǝ bii mi rak shama kǝ nak mu byaa mi rak.
28“Ng mu ɗakghai yin ni ruɗa lokghaa lokng toor, ɗaa kǝ ɓasa kaa pang, awuna mak ni pang ng wuna ta shiin lokghaan lok kyaa paa? Ng ɗǝ pyar kǝ shama lokghaa lok ki kǝ kǝɗaa? 29Ng mee ni foo dat lok ki pang sham lokghaa kǝdɗaki rak, nzup mung kǝ mee ni lakshii pang ɓee shiishala ma. 30A shee ka, ‘Sum mari kap lokghaan lok pang kǝd maa rak.’
31“Koo kaa shee ka ruu yen ruɗa naa rom ɗǝ ruu ɗakghai. Ɗaa kǝ ɓasa kaa pang koo ng ɗǝ amorom zari ware (10,000) kǝ shama shaa rom ɗaa amorom zari warkǝ (20,000) mɓaa ng kaa taaki pira ma ɗǝ rom maa? 32Ng mee ni shama rak, tokghaa a dǝshai ta sum kyaa kǝ yakghai maa shaa yang yang kǝ yar ɗaan wom ɗǝ mee. 33Tung kaɓan, nzup mung kǝ mee ni kalak awuu kǝng ɗǝ mee rak shama nakghaa mu byaa mi rak.
Agarang Mangshiin kǝ Wusungaa mee Yarshii
(Mat 5.13; Mar 9.50)
34“Mangshii kun, nzup ɗǝ kaɓan ng wusungaa mee ni kǝd, a shaa kacee ni pang kaa pora ɗǝ wusungaa mee tǝkwak ta paa? 35Shaa ndar maa awuu zar rak, shama ryakghaa awuu ɗǝn kǝ maksar rak.
“A furayang maa ni maad. Mung kǝng ɗǝ kutun yira kǝ yiri.”
Currently Selected:
Luka 14: (Boi) Tiyaa
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
