vēstule romīšim 3

III.

1Kas tad jūdim ir pōrōks un kaida ir apgraizeišonas prīkšrūceiba? — #3:1 ir pōrōks par pogōnim. 2Daudz ikvīnā nūzeimē! Vyspyrms, jim tyka uztycāta Dīva apsūleišona. 3Un kas par tū, ka daži naīticēja. Vai tad jūs nauzticeiba Dīva uzticeibu iznycynōs? 4Nē, Dīvs palīk uzticeigs, jo pat vysi ļaudis malōtu. Stōv raksteits: Ka Tu palyktu taisneigs sovūs vōrdūs, un uzvarātu, kad Tevi tīsoj.

5Jo myusu nataisneibas deļ skaidri pasarōda Dīva taisneiba, kū tad lai sokom? Vai tad Dīvs, ciļvēceigi runojūt, nav nataisneigs, kad uzlīk strōpi? 6Nimoz nē! Bet kai gon cytaiž Dīvs lai tīsoj pasauli?#3:6 Jo Dīvs nadreikstātu tīsōt jūdu tōpēc, ka jūs grāku dēļ pasavairoj Dīva gūds, kai tad Jys lai tīsoj pōrejū, grākūs īgrymušū pasauli. Caur tū, ka Dīvs ļaunu izmontoj lobam, ļaunais napōrstōj byut par ļaunu, un ļauna dareitōjs nu strōpes naizbāg. 7Un jo caur munim malim skaidrōk pasarōda Dīva patīseigums Jō poša uzslavēšonai, kōpēc tad mani nūtīsoj kai grēcinīku? 8Un nav tai, kai daži saimōdami mums pōrmat, itkai mes mōceitu, ka varūt dareit ļaunu, lai nu tō iznōktu lobs. Taidu nūtīsōšona ir taisneiga.#3:8 taidu — kas tai dūmoj un tai dora.

9Kas tad nu tō? Vai mums ir kaidas prīkšrūceibas? — Nimoz nē. Jau īprīkš nūskaidrōjom, ka grāka varai ir padūti vysi: kai jūdi, tai arī pogōni. 10Stōv raksteits: Taisneiga nav ni vīna, pat ni vīna vīneigō. 11Nivīna nav saprateiga, nivīna nav, kas maklātu Dīva. 12Vysi ir nūsamaļdejuši un nalīteigi palykuši, jo nav ni vīna, kas dareitu lobu, pat ni vīna vīneigō. 13Jūs reikle ir kai atvārtais kops, ar sovu mēli jī dora viļteibu, uz jūs lyupom ir ūdžu inde; 14jūs mute ir pylna lōstu un ryugtuma, 15jūs kōjas steidzās lai izlītu asni. 16Iznīceiba un nalaime staigoj pa jūs ceļim, 17bet mīra ceļa jī napazeist, 18Dīva baile jim ir sveša.#3:18 burtiski: Dīva baile nav pret jūs acim.

19Mes zynom, ka tys, kū soka lykums, atsateic uz tim, kas lykumam ir padūti. Tai tad, ikvīnai mutei ir jōnūklust un vysam pasauļam Dīva prīškā jōatsazeist par vaineigu. 20Caur lykuma dorbim Jō prīškā natiks attaisnōts nivins cylvāks. Caur lykumu nōk grāka pazeišona.#3:20 Kai ōrsts slymajam nūrōda uz jō draudūšū veseleibas stōvūkli, lai slymais veseleibas atgyušonai centeigōk pīlītōtu zōles, tai Dīvs ciļvēcei caur Moizešu deve lykumu, lai tei pazeidama sovu pūstu steigtūs pi Pesteitōja.

Jēzus Kristus ir cilvēces Pesteitōjs.

21Bet tagad attaisnōšona (kas nōk) nu Dīva, uz kuru nūrōdeja lykums un pravīši, atsaklōja bez lykuma. 22Attaisnōšona nu Dīva nōk caur ticeibu ikš Jezus Kristus deļ vysim un pi vysim, kas (Jam) tic; te nav nikaidas izškireibas.#3:22 izškireibas storp pogōnim un jūdim. 23Vysi ir sagrākōjuši un Dīva gūdeibu pazaudējuši. 24Un jī tiks attaisnōti bez nūpalnim caur Jō žēlesteibu, pateicūt atpērkšonai, kas nōce caur Jezu Kristu.#3:24 Attaisnōšona ir Dīva dōvona, kas cylvākam teik dūta na cylvāka poša, bet gon Jezus Kristus nūpalnu dēļ. 25Caur ticeibu Dīvs Jū nūlyka kai asneigū izleigšonas upuri, lai parōdeitu sovu taisneigumu. 26Sovā dīviškā pacīteibā Jys šymā laikā pīdeve agrōk padareitūs grākus, lai parōdeitu sovu taisneigumu un aplīcynōtu, ka Jys pats ir taisneigs un taisneigu dora tū, kas tic ikš Jezus (Kristus).

27Kur tad nyu ir tei līleiba? — Tei ir izslāgta. Caur kuru lykumu? Vai caur dorbu? — Nē, bet gon caur ticeibas lykumu. 28Mes asom pōrlīcynōti, ka cylvāks teik attaisnōts caur ticeibu bez lykuma dorbim. 29Vai tad Dīvs ir tikai jūdim un pogōnim nē? — Jā, arī pogōnim; 30ir tik vīns un tys pats Dīvs, kas apgraizeitūs attaisnōja ticeibas dēļ un naapgraizeitūs caur ticeibu. 31Vai tad caur ticeibu mes atceļam lykumu? Nimoz nē, mes lykumu apstyprynojam.

Currently Selected:

vēstule romīšim 3: LGT

Highlight

Copy