vēstule romīšim 10

1Brōļi, munas sirds vēlēšonōs un munas lyugšonas īt uz Dīvu par jūs pesteišonu. 2Es jums aplīcynoju, ka jim ir centeiba uz Dīvu, bet nav saprasšonas.#10:2 jim — jūdim. 3Pōrprozdami taisneibu, kas ir nu Dīva, un grybādami jōs vītā īstateit sovu pošu, jī napasadeve taisneibai, kas nōk nu Dīva. 4Bet lykuma mērkis ir Kristus, kas ikvīnam ticeigajam nas taisneigumu. 5Moizešs roksta par taisneigumu, kas nōk caur lykumu: Un kurs cylvāks šytū ir piļdejis, tys jymā dzeivōs.#10:5 dzeivōs natik vin laiceigi, bet arī myužeigi. 6Un par taisneigumu, kas ir caur ticeibu, soka: Nasoki sovā sirdī: Kas kōps dabasūs, tys ir nūjimt zemē Kristu; vai arī: Kas kōps dziļumūs, tys ir, Kristu izvest nu myrūnim. 7-8Kai arī jys soka: Tys vōrds ir tyvu tovā mutē un tovā sirdī, un tys ir ticeibas vōrds, kuru mes sludynojam. 9Jo tu ar sovu muti aplīcynoj, ka Jezus ir Kungs un sovā sirdī tici, ka Dīvs Jū pīcēle nu myrūņim, tad tu byusi izpesteits, 10Jo sirdī tycam, lai sasnāgtu taisneigumu, un ar muti aplīcynojam, lai byutu izpesteiti. 11Roksti soka: Nivins, kas Jam tic, kaunā napaliks. 12Te storp jūdim un pogōnim nav nikaidas starpeibas. Vīns un tys pats ir Kungs par vysim, kas sovu bogōteibu dola vysim tim, kas Jū pīsauc. 13Un ikvins, kas Kunga vōrdu pīsauc, byus izpesteits.#10:13 pīsauc ar dzeivu ticeibu. 14Bet kai lai pīsauc tū, kam jī natic. 15Un kai lai tic tam, par kuru nav dzērdējuši? Un kai lai dzērd bez sludynōtōja? Un kai lai sludynoj, jo nav syuteiti? Kai ir raksteits: Cik cyldonas kōjas ir tūs, kas sludynoj lobu (kas sludynoj mīru).

16Bet Evangelijam na vysi ir paklauseigi, jo Izajas soka: Kungs, kas myusu sludynōšonai īticēja? 17Tai tad, ticeiba ir nu sludynōšonas, bet sludynōšona uz Kristus pavēles.

18Un es vaicoju: Vai tad, laikam, nav dzērdējuši? — Bez šaubom!, Jo jūs bolss izplyuda pa vysu zemi, un jūs vōrds leidz zemes rūbežom. 19Un es vaicoju tōļōk: Vai tad Izraeļs tō nasaprota? Moizešs jau pyrmais soka: Es jyusūs saceļšu skaudeibu caur tim, kas napīdar pi tautas. Caur nasaprateigū tautu es jyusus sanyknōšu. 20Un Izajas atklōti soka: Es beju atrūnams tim, kas manis nameklēja, es beju pasarōdejis tim, kas manis navaicōja. 21Bet Izraeļam saceja: Vysu dīnu es stīpu sovas rūkas uz tautu, kas ir napaklauseiga un speiteiga.

Currently Selected:

vēstule romīšim 10: LGT

Highlight

Copy