vēstule romīšim 9

IX.

1Ikš Kristus es soku patīseibu, es namaloju un ikš Svātō Gora tū aplīcynoj muna sirdsapziņa,#9:1 ikš Sv. Gora apgaismōta. 2ka es ļūti skumstu un bez pōrstōšonas man sōp sirds. 3Es lobōk grybātu pats nu Kristus byut atskērts, na kai muni brōļi, kas pēc mīsas ir muni radinīki. 4Jī ir izraelīši un jim pīdar bārnu tīseibas, gūdeiba, dereiba, lykumdūšona, Dīvam kolpōšona un apsūlejumi. #9:4 bārnu tīseibas — tīseibas byut par Dīva bārnim. 5Jim pīdar ciļtstāvi un nu jim pēc mīsas nōk Kristus, kas ir pōrōks par vysu, myužeigi slaveits Dīvs. Amen. #9:5 ciļtstāvi — Abraams, Izaaks un Jākubs.

6Un nav tai itkai Dīva vōrds byutu kritis. Na vysi, kas nu Izraeļa paīt, ir izraelīši;#9:6 kritis — Dīva apsūlejumi zaudējuši sovu spāku. 7un tōdēļ na vysi, kas ir Abraama pēcnōcēji, ir jō bārni, bet gon: Nu Izaaka tev tiks saukti pēcnōcēji. 8Tys ir: Na mīseigī pēcnōcēji ir Dīva bārni, bet gon apsūleišonas bārni ir īskaiteiti pēcnōcējūs. 9Un apsūleišonas vōrds ir šaids: Ap šū laiku es otkon atnōkšu un Sarai byus dāls. 10Un tai beja na tik vin ar jū, bet arī ar Rebekku, kurai nu tō poša veira myusu tāva Izaaka beja bārni. 11Un koleidz vēļ jōs dāli nabeja dzymuši un ni loba, ni ļauna darejuši, — lai Dīva lāmums, kas atsateic uz izlaseišonu palyktu namaineits: na pēc dorbim, bet pēc izvālātōja (grybas), — 12jai pasaceja: Vacōkais kolpōs jaunōkajam, 13kai stōv raksteits: Es mīļōju Jākubu un Ezavu īneidu.#9:13 īneidu — mozōk mīļoju, naīvaroju.

14Kū tad lai sokom? Vai pi Dīva ir nataisneiba? Nimoz nē! 15Jys Moizešam soka: Par kū es apsažāloju, tū es apžāloju kam leidzjust grybu, tam es leidz jyutu. 16Tai tad, navys poša gribēšona un skrīšona ir nu svora, bet gon Dīva apsažālōšona. 17Arī Faraonam Roksti soka: Es tevi īceļu tōdēļ, lai caur tevi parōdeitu sovu vareibu un lai muns vōrds byutu izsludynōts pa vysu pasauli. 18Tai tad, par kū grib, par tū Jys apsažāloj, un, kū grib, pamat aizacērsšonā.

19Bet tu man ībilssi: Kōpēc tad Jys pasmōdej? Kas tad Jō grybai var pretōtīs? 20Ak, cylvāks, kas tu esi, ka Dīvam gribi uzstōdeit praseibas! Vai tad tāls tēlnīkam dreikst saceit: Kōpēc tu mani taidu esi veidōjis? 21Vai tad pūdnīkam nav varas par mōlu, lai nu tōs pošas massas gūdam vai arī nagūdam taiseit trauku? 22Un kas tad nu tō, ka Dīvs pret iznīceibai padūtajim dusmeibas traukim, pret kurim sovas lelōs lānprōteibas dēļ beja īcīteigs, beidzūt grib parōdeit sovu dusmi un dareit zynomu sovu vareibu? 23Un pret apžālōšonas traukim, kurus pazeimōja gūdeibai, grib parōdeit sovas gūdeibas bogōteibu?

24Arī myusus, na tik vin nu jūdim, bet arī nu pogōnim, Jys paaicynōja, 25kai pi Ozeja soka: Tautu, kas nav muna, Es saukšu par sovu tautu, un tū, kas nabeja nūmīļōtō, par nūmīļōtū (un tū, kas nabeja apvelteita ar žēlesteibu, par apveļteitu ar žēlesteibu). 26Un tamā vītā, kur jim saceja: Jyus asot na muna tauta, tur saceis: Jyus asot dzeivō Dīva bārni.#9:26 tamā vītā, kur dzeivōja pogōni. 27Bet Izajas par Izraeli soka: Jo izraelīšu byutu tik daudz, kai jyuras smiļšu, tikai atlīkas tiks izglōbtas. 28Un Kungs sovu vōrdu izpiļdeis piļneigi (un ōtri pēc taisneibas; jā, ōtri Jys tū izpiļdeis) vērs zemes.

29Izajas tai pat īprīkš pasaceja: Jo Karapulku Dīvs nabyutu mums pōri pametis sāklas, tad mes byutu kai Sodoma un byutu leidzeigi Gomorai.#9:29 kai Sodoma — byutu piļneigi iznykuši.

Jūdu tauta ir vaineiga poša.

30Kū tad lai sokom? Pogōni, kas pēc taisneiguma nasasteidze, taisneigumu sasnēdze, — taisneigumu, kas nōk nu ticeibas; 31Izraeļs, turpretim, pēc lykuma attaisnōšonōs steigdamīs, tō nasasnēdze. 32Kōpēc? Tōpēc, ka gribēja sasnīgt tū na caur ticeibu, bet gon caur dorbim.#9:32 caur dorbim — caur lykuma dorbim, kurim nabeja vērsdabyskōs vērteibas. 33Jī paklupa uz pīdauzeibas akmiņa, kai stōv raksteits: Raug, Es Sionā nūlikšu pīdauzeibas akmini un pakrisšonas klinti, un kas jam ticēs, tys kaunā napaliks.#9:33 Kristus pazemeigō uzastōšona nasaskanēja ar jūdu cereibom, jo tī gaideja pesteitōja, kas byutu kai pasauleigs valdinīks, un jūs atbreivōtu nu romīšu vērskundzeibas. Nōve uz krysta jūdim beja par īļaunōšonu. Tōpēc, ka naticeigī īs pazusšonā, K. Jezus Kristus teik saukts par pīdauzeibas akmini un pakrisšonas klinti. Patīseibā K. Jezus ikvīnam ir kai pamats un atbolsts, lai nivins, kas Jam tic, napalyktu kaunā.

Currently Selected:

vēstule romīšim 9: LGT

Highlight

Copy