I vēstule korintīšim 8

VIII.

Dīvaklim upurātōs gaļas ēsšona.

1Par dīvaklim upurātū gaļu mes zynom, ka mums vysim ir pareizas atziņas. Zynōšonas, tūmār, dora uzpyuteigus, bet mīlesteiba uzceļ.#8:1 Pogōni dūmōja, ka dīvaklim upurātō dzeivinīka daļas, kuras upurātōjs sajēme atpakaļ, ir dīvaklu dōvonas. Šōs daļas upurātōjs vai nyu apēde pats, vai pōrdeve, vai arī atdeve nabogim. Daži kristticeigī tūs dzeivinīku gaļu ēde bez kaidas šaubeišonōs, jo zynōja, ka dīvakli ir nīks. Daži tūmār (vōjī) jōs ēsšonu uzskateja par grāku un radzādami, ka cyti ād, jī īsaļaunōja.#8:1 mīlesteiba uzceļ — nūstyprynoj ticeibā un padīveibā. 2Jo kas ir pōrlīcynōts, ka kaut kū ir pazinis, tad jys pat veļ nazyna, kai jam byutu jōpazeist. 3Bet jo kas mīļoj Dīvu, tod Jys (Dīvs) tū atzeist. Kas atsateic uz 4dīvaklim upurātōs gaļas ēsšonu, tod mes zynom, ka dīvakli pasaulī nav nikas un izjamūt vīnu Dīvu, cyta nava. 5Lai gon teik runōts par dīvim debesīs un vērs zemes, kai arī par tū, ka asūt daudz dīvu un daudz kungu, 6mums, tūmār, ir tikai vīns Dīvs, — Tāvs nu kura paīt vysas lītas un kura dēļ mes asom radeiti, un ir vīns Kungs Jezus Kristus, caur kuru ir vysas lītas un arī mes.

7Eistōs zynōšonas vysim tūmār nava. Daži, kas pi dīvaklim beja pīroduši, ād tū gaļu, kai dīvaklim upurātū, un jūs sirdsapziņa vōja byudama teik satraipeita.#8:7 vysim nava — jo daži dūmoj, ka dīvaklim upurātō gaļa ir kaut kas cyts, na kai parostō. 8Ēdīņs myusu vērteibas Dīva prīškā napaceļ; mes naasom vērteigōki tod, kod mes ādam, kai tod, kod mes naādam. 9Uzmonit, tūmār, ka šitei jyusu breiveiba vōjajim nabyutu par pīdauzeibu. 10Jo kas tevi ar tovu zynōšonu redzēs kaida dīvakla svētneicā ādūt, vai tad caur tū jō sirdsapziņa, kas vēļ ir vōja, nabyus pamūdynōta ēst dīvaklim upurātū gaļu?#8:10 pamūdynōta ēst — pastōvūt pōrlīceibā, ka dīvaklim upurātōs gaļas nadreikst ēst. 11Un tai caur tovu zynōšonu vōjais īs pazusšonā, — brōļs, par kuru ir nūmiris Kristus. 12Un jo jyus grākojat pret sovu brōli un īvaiņojat jō vōjū sirdsapziņu, tad jyus grākojat pret Kristu. 13Un tōpēc, jo munu brōli kaids ēdīņs īļaunoj, lobōk es vairs myužam gaļas naādu, lai sova brōļa naīļaunōtu.

Currently Selected:

I vēstule korintīšim 8: LGT

Highlight

Copy