I vēstule korintīšim 3
3
III.
1Un jums, brōli, es navarēju runōt kai goreigajim, bet gon kai mīseigajim, vēļ kai bārnim ikš Kristus.#3:1 mīseigajim — kas sekoj mīsas īgrybom. 2Es jyusus barōju ar pīnu, bet na ar cītu bareibu, jo jyus tōs veļ navarējot izturēt. Pat tagad jyus tō veļ navarat,#3:2 pīnu — vīnkōršu un vīgli saprūtamu mōceibu. 3jo jyus vēļ mīseigi asot nūskaņōti. Koleidz jyusūs volda naids un škeļšonōs, vai tad jyus naasot mīseigi nūskaņōti un vai nadorat pēc cylvāku īroduma? 4Jo vins soka: Es pīkreitu Pōvulam, cyts otkon: Es Apollonam, vai tad jyus te naasot teiri mīseigi?
Streidi ir preteigi vīneigajam Kungam.
5Kas tad ir Apollo? Kas Pōvuls? — Tikai kolpi, kas jums paleidzēja ticeibā tai, kai kuram kotram Dīvs ir īdevis. 6Es dēsteju, Apollo aplaisteja, bet Dīvs deve augšonu. 7Tōpēc ni dēsteitōjs ni laisteitōjs ir kaut kas, bet gon Dīvs, kas dūd augšonu. 8Dēsteitōjs ar laisteitōju ir leidzvērteigi, bet kotrs pēc sova dorba sajam atolgōjumu. 9Mes asom Dīva leidzstrōdnīki, jyus asot Dīva dryva, Dīva ceļtne.
10Kai apkēreigs namdaris ar žēlesteibas paleidzeibu, kuru Dīvs man deve, es īlyku pamatu, bet cyts uz tō tūrpynoj noma ceļšonu. 11Tūmār, lai ikvīns uzmonōs, kai ceļšona jōtūrpynoj. Nivins navar likt kaida cyta pamata, kai tū, kas ir īlykts: Jezu Kristu. 12Bet nu kō kurs uz šytō pamata tōļōk ceļ: nu zalta, sudobra, dōrgakminim, vai arī nu kūka, sīna vai solmim, 13tys pasarōdeis ikvīnā dorbā. (Kunga) dīna tū atklōs. Jei pasarōdeis gunī. Un guņs pōrbaudeis tū, kas kura kotra dorbā ir.#3:13 Kunga dīna — tīsas dīna. 14Jo kura dorbs izturēs, tys sajims atolgōjumu; 15jo kura dorbs sadegs, tam byus zaudējums, un lai gon pats byus izglōbts, tūmār tai kai caur guni.#3:15 kai caur guni — caur škeisteišonas guni.
16Vai tad jyus nazynat, ka jyus asot Dīva svētneica un ka jyusūs mōjoj Dīva Gors? 17Bet jo kurs iznycynōtu Dīva svētneicu, tad tū pati iznycynōs Dīvs, jo Dīva svētneica ir svāta un tei asot jyus.
18Nivins pats sevis lai namōnej. Jo kas nu jums dūmōtu, ka šys šamā pasaulī asūt gudrs, tad tam, lai topt gudram, jōpalīk par muļki, 19jo šō pasauļa gudreiba Dīva prīškā ir muļkeiba. Ir arī raksteits: Jys saker gudrinīkus jūs pošu gudreibā, 20un tōļōk: Kungs zyna, ka gudrinīku dūmas ir nīceigas. 21Tōpēc nivins nu cylvākim lai nasalīlej. Jums pīdar vyss: 22Pōvuls, Apollo un Kefas (Pīters), pasauļs, dzeive un nōve, tagadne un nōkūtne: 23vyss šytys pīdar jums, bet jyus pīdarat Kristum un Kristus — Dīvam.
Currently Selected:
I vēstule korintīšim 3: LGT
Highlight
Share
Copy
Want to have your highlights saved across all your devices? Sign up or sign in
Aloizius Broks: Svātī roksti. Jezus Kristus Evangelijs und Apostolu Darbi 1933, Apostols vystules i apokalypsis 1937.
