I vēstule korintīšim 1

Īvods.

1Pōvuls caur Dīva grybu paaicynōtais Jezus Kristus Apostols un brōļs Sostens.

2Dīva draudzei Korintā un tim, kas ikš Jezus Kristus ir svāttopuši, paaicynōtim svātajim reizē ar vysim tim, kas myusu Kunga Jezus Kristus vōrdu pīsauc ikvīnā, kai jūs tai arī myusu molā.

3Žēlesteiba jums un mīrs nu Dīva myusu Tāva un nu Kunga Jezus Kristus.

4Es vysod par jums pasateicu munam Dīvam, par Dīva žēlesteibu, kura jums ir dūta ikš Jezus Kristus. 5Jymā jyus asot palykuši bogōti ar ikvīnu mōceibu un ikvīnu zynōšonu, 6jo līceiba par Kristu jyusūs ir nūsastyprynōjuse, 7lai jums, kas myusu Kunga Jezus Kristus pasarōdeišonōs gaidot, natryuktu nivīnas žēlesteibas dōvonas. 8Jys jums dūs arī iztureibu leidz golam tai, ka jyus myusu Kunga Jezus Kristus (atnōkšonas) dīnā byusit bez vaiņas. 9Dīvs, kas jyusus īaicynōja sova Dāla Jezus Kristus myusu Kunga vīneibā, ir uzticeigs.#1:9 īaicynōja . . . vīneibā lai jyus byutu leidzdaleibnīki kai ticeibā tai arī žēlesteibā.

Streidi pretojās kristeibas un mōceibas vīneibai.

10Brōli, Kunga Jezus Kristus vōrdā es jyusus breidynoju, ka jyus vysi vīnu un tū pošu runōtu, ka pi jums nabyutu škeļšonōs, bet gon, ka pi jums byutu vinprōteiba un vīnaidas dūmas. 11Muni brōli, Kloesa ļaudis man par jums ziņōja, ka storp jums ir streidi. 12Tai kai daži nu jums soka: Es pīkreitu Pōvulam, es Apollonam, es Pīteram, es turūs pi Kristus, tad es vaicoju:#1:12 Storp kristticeigajim Korintā beja streidi tōdēļ, ka vīnim beja īpatykuse vairōk Pōvula uzastōšona, ūtrim Apollona, trešim — Pītera, cyti otkon saceja, ka jī ir Kristus izzinēji naatkoreigi nu tō, kas jim Kristus mōceibu sludynōja. 13Vai tad Kristus ir sadaleits? Vai tad Pōvuls par jums ir krystā pīkolts? Vai Pōvula vōrdā jyus asot nūkristeiti? 14Paļdis Dīvam, ka izjamūt Krispu un Gaju es nivīna nu jums naasmu kristejis. 15Tai tad, nivīns navar saceit, ka munā vōrdā ir nūkristeits. 16Es gon vēļ nūkristeju Stefana saimi, bet vairs napīmiņu, ka byutu kū kristejis.

17Kristus manis nasyuteja kristeitu, bet gon Evangelija sludynōtu, tūmār na daiļruneibā, lai naneiktu Kristus krysts.#1:17 naneiktu Kristus krysts — lai ļaudis, kurim Evangelijs teik sludynōts, napīsakartu pošai sludynōšonai, sludynōšonas mōkslai un tū apbreinōdami pi tōs napalyktu, naīvārojūt satura. Lai nasaceitu: Es tycu tōpēc, ka mōceibas sludynōtōjs skaisti runoj, bet na tōpēc, ka saprūtu jōs saturu — pesteišonu, kas nōk nu Kunga Jezus caur jō cīsšonom un nōvi uz krysta.

18Tim, kas īt uz pazusšonu, mōceiba par krystu ir muļkeiba, bet mums, kas byusim izpesteiti — Dīva spāks. 19Stōv raksteits: Es iznycynōšu gudrinīku gudreibu un atmesšu saprateigūs sajāgu.#1:19 19–21 Ka Dīvs ciļvēces pesteišonā šō pasauļa gudreibu atstōja nūvōrtā, skaidri radzam nu tō, ka nivīns pogōnu filozofs vai pētnīks, nivīns jūdu Rokstim mōceitais pesteišonu nasūšōs gudreibas namōca. 20Kur tad palīk gudrais, kur Rokstim mōceitais, kur šō pasauļa pētnīks? Vai tad šō pasauļa gudreibas Dīvs napasludynōja par muļkeibu? 21Tai kai pasauļs ar sovu gudreibu Dīva, Jō dīviškajā gudreibā, napazyna, caur sludynōšonas muļkeibu Dīvam labpatyka izglōbt tūs, kas īticēja.

22Lai gon jūdi pīprosa breinumzeimu un greki meklej gudreibas, 23mes tūmār sludynojam krystā pīkoltū Kristus, kas jūdim ir īļaunōšona, pogōnim muļkeiba, 24bet tim, kas ir paaicynōti, lai tī byutu jūdi vai arī pogōni, Kristus ir Dīva spāks un Dīva gudreiba.

25Un tys, kas izalīk muļkeigs, bet paīt nu Dīva, par cylvākim ir gudrōks, un kas izalīk vōjs, bet paīt nu Dīva, par cylvākim ir styprōks.#1:25 kas izalīk — kas pasauļa acīs ir muļkeigs un vōjs.

26Brōli, raugatēs uz jyusu paaicynōjuma, ka storp jums nav daudz gudrinīku pēc mīsas, nav daudz vareigūs, nav daudzi dīžciļteigūs; 27bet gon tūs, kas pēc pasauļa īskotim ir muļki, Dīvs izvēlēja, lai aizkaunātu gudrinīkus; un, kurus pasauļs īskaiteja par vōjim, tūs Dīvs izvēlēja, lai aizkaunātu styprū. 28Un, kas deļ pasauļa ir zami un pat nadereigi, šytūs Dīvs izlaseja, lai palyktu nalīteigi tī, kas kaut kū ir vērteigi, 29lai Dīva prīškā nasalapnōtu nivins vērszemes cylvāks. 30Caur Jū jyus asot ikš Jezus Kristus, kas nu Dīva mums ir klivis par gudreibu, taisneigumu, svāttopšonu un pesteišonu. 31Kas grib līleitīs, soka Roksti, lai līlejās ikš Kunga.

Currently Selected:

I vēstule korintīšim 1: LGT

Highlight

Copy