Numeros 4

O rado katar e levita

1O Del dia orba e Moisesea ta e Aaronoia, ta phenda lenge:

2Cher iek llindipe katar e viche ta katar e familie katar e levitura ta katar familie katar o Koat katar lenge familie purane, 3Katar e tranda burs llik kai e pinda ta kai sai radin ande chara kai chidiniaon.

4Gava ka avel o rado katar e chaurre katar o Koat ando santuario kai chidiniaon, ando than santisimo: 5Kana o pero ka ladel, o Aaron ta leke chaurre ka ikanen e kortina kai si kote katar delpe po than santisimo ta lea ka ucharen e arka katar e alava, 6ta ka thoven upral e morcha katar e tejone ta upral pe morcha ka thoven iek chiti vuneto, ta ka thoven e pulsura te sai inllaren e arka. 7Ta po stali kai thodon e marrne ka thoven upral iek chiti vuneto ta upral po chiti ka thoven vasura o platura bare, e rroia e tasura ta e tasura bare kai del e ofrende e moliake, ta o marrno kai del suako drom. 8Ta upral katar sa gala ezgode ka thoven iek chiti lolo, ta ka thoven upral pe lete e morcha katar e tejones kai lenchar uchardon ogola ezgode, ta ka thoven e pulsura te sai inllardol. 9Mapalal ka len iek chiti vuneto te ucharen o kandelabro kai kletosarel ta leke lanpare, ta sa leke ezgode kai thodol o zeitino. 10Ta sa gala ezgode ka thovel len ande morcha katar e tejone ta ka thovel len pe upral pe iek kasta te sai inllaren len.

11Po altar sunakuno ka thoven iek chiti lolo ta ka thoven uprel pe lete e morchenchar katar e tejone ta ka thoven pe lete leke pulsura te sai inllaren le. 12Ta ka len sa ezgode katar o santuario ta ka thoven len ande iek chiti vuneto ta ka ucharen len e morchenchar katar e tejone ta ka inllaren len pe iek kasta. 13Ka ikanen o prajo katar o altar ta ka thoven upral pe lete iek chiti vuneto. 14Ta upral po chiti ka thoven sa gala ezgode kai radin lenchar po altar:

E braserura, e beliuske e pale, e tasura bare, sa e ezgode katar o altar. Pe sa gala ezgode ka thoven upral pe lende e morcha katar e tejone ta e pusura te sai inllaren len. 15Kana o Aaron ta leke chaurre ka ucharen sa e ezgode katar o santuario ta kana si te muchilpe o pero mapalal ka aven e chaurre katar o Keat te sai inllaren len, a nasti ka dodin niso katar e ezgode kai si sante, te na meren. Sa gala ezgode katar e chara kai chidiniaon si te inllaren e chaurre katar o Keat. 16O Eleazar, chaurro katar o Aaron, ka inllarel o zeitino te sai kletosarel, o taimano kai khandel sukar, e ofrende kai denpe suako drom ta o zeitino kai santifikin ta ande leke va ka achel sa o santuario ta so si ande lete, o santuario ta sa leke ezgode.

17O Del dia orba e Moisesea ta e Aaronoia ta phenda lenge:

18Na muken e vicha katar e familia katar o Keat te merel maskar e levitura. 19So morabi te cheren te sai zivin ta te na meren kana ka aven pasa o than santisimo, si gava:

O Aaron ta leke chaurre si kai ka phenen lenge so morabi te cheren ta so morabi te inllarel suako lleno suako. 20Von ni ka den andre te dikhen kana ka ucharen e ezgode sante, te na chindol pe lenge te meren.

21O Del dia orba e Moisesea ta phenda leke:

22Cher iek llindipe katar e vicha ta e familia katar o porodo katar o Gerson 23Te aven katar e llene kai si lenge tranda o pinda burs kai sai radin ande chara kai chidiniaon.

24Gava ka avel o rado katar o porodo katar o Gerson: 25Von si kai ka inllaren e kortine katar o santuario, e chara kai chidiniaon, e morcha katar e tejone kai ucharen e kortina katar delpe andre katar e chara kai chidiniaon, 26e kortine katar e bar, e kortine katar delpe ande bar kai si truial katar o santuario ta o altar, e sole ta ezgode kai trubun po rado gava ka avel lengo rado. 27O Aaron ta leke chaurre si kai ka phenen so te cheren e chaurrenge katar o Gerson pe suako rado. 28Gava ka avel o rado katar e familie ta katar e chaurre katar o Gerson ande chara kai chidiniaon, ta von ka achen tala o va katar o itamar o chaurro katar o popo Aaron.

29Ka chere iek llindipe katar o porodo katar o Merari, prema lenge viche ta familie. 30Llin golen kai si lenge tranda llik kai e pinda burs kai sai radin ande chara kai chidiniaon. 31Gava si o rado kai morabi te cheren ande chara kai chidiniaon, von ka inllaren e table katar o santuario, e pulsura, e pulsura thule ta e riga kai thodon. 32E pulsura thule kai llan truial o santuario, pe rigenchar kai thodon, e chile ta e sole ta sa so trubul len te radin, tu morabi te phene suakone lleneke so morabi te inllarel. 33Gava ka avel o rado ande chara kai chidiniaon, gava rado ka cherel le e vicha ta porodo katar o Merari ta ko ka phenel so si cheren si o Itamar, chaurro katar o popo Aaron.

34O Moises ta o Aaron cherde o llindipe, prema e viche ta e familie katar o porodo katar o Keat 35kai saia lenge mai but katar tranda llik kai e pinda burs, kai sai radina ande chara kai chidiniaon, 36Ta e llene kai sea llinde sea dui milie ta efta stotine ta pinda. 37Gala sea e llene llinde katar e familia katar o Keat, kai radi ande chara kai chidiniaon. O Moises ta o Aaron sea kai llinde len, gia sar o Del phendaia e Moiseseke te cherel le.

38E llene kai sea llinde katar o porodo katar o Gerson prema lengi vicha ta familie e purane, 39kai saia lenge tranda llik kai e pinda burs kai sai radina ande chara kai chidiniaon, 40sea dui milie ta efta stotine ta tranda. 41Gala sea e llene llinde katar e familia katar o Gerson kai sai radina ande chara kai chidiniaon, prema o llindipe kai cherde o Moises ta o Aaron soke o Del saia kai phenda lenge te cheren gava rado.

42E llene llinde katar e vicha katar o Merari prema lengi familie purane, 43katar e tranda ta llik e pinda burs kai sai radina ande chara kai chidiniaon, 44sea trin milie ta dui stotine. 45Gala si e llene llinde katar e familia katar o Merari kai sai radina ande chara kai chidiniaon, prema o llindipe kai cherde o Moises ta o Aaron, gia sar o Del phendaia e Moiseseke te cherel.

46Sa e llene levita kai o Moises ta o Aaron ta e birovura katar o Israel kai llinde prema pe familie purane, 47katar e tranda burs llik kai e pinda burs ta kai sai radina ende chara kai chidiniaon, 48sea ojto milie ta panch stotine ta ojtovardes. 49Gia sar o Del phendaia e Moiseseke te cherel sea llinde, suako lleno prema po rado ta pe so saia thodo te radil.

Currently Selected:

Numeros 4: BACHRO

Highlight

Copy