Markos 9

1Ta i phenda lenge o Jesus:

Chachimaia phenav tumenge kai nesave llene kai akana si kate, ni ka meren lligo ni ka dikhen sar ka avel zoriaia e charoina e Devleki.

E Jesuseki esnaga cherdol sargo aver

Mt 17.1-13; Lk 9.28-36

2Nakhle sou llive kotar, ta o Jesus llelotar pe iek burdo baro ta inllarda pea samo e Pedro, e Santiago ta e Juane. Kote angla lende cherdilo sargo aver.#2 P 1.17-18. 3Leke patave klichisarde ta cherdile gia parrne kai niko i mai te jalavel len nasti muklaia len gia parrne. 4Ta dikhle e Eliase ta e Moisese kai dena orba e Jesusea. 5Ondaka o Pedro phenda e Jesuseke:

Kovachi, ¡Gia sukar kai sam kate! Ka chera trin cherorra e patrenchar:

Iek chuke, aver e Moiseseke ta aver e Eliaseke.

6E disipulura daraile but, ta o Pedro ni llanela so phenela. 7Ondaka avilo iek oblako ucharda len. Ta asundilo iek avazi katar o oblako, kai phenela:#Mt 3.17; Mk 1.11; Lk 3.22.

Gava si mo Chaurro kai voliv le. Le asunen. 8Ondaka kana dikhle truial petar ni dikhle nika, samo e Jesuse.

9Kana fuliena katar o burdo, o Jesus phenda lenge te na phenen nikake so dikhle, lligo ni ka ustel katar o meripe o Chavo e Manuseko. 10Goleke gurude goia orba maskar pete, a puchena iek avere so sai avel goia orba kai ka ustel katar o meripe. 11Ondaka puchle e Jesuse:#Mt 11.14.

¿Soke e kovacha e zakonoke phenen kai mai anglal si te avel o Elias?

12O Jesus phenda lenge:

Gua si o chachipe, o Elias avel mai anglal ta ka lacharel sa e ezgode. ¿A soke e Devleke alava phenen kai o Chavo e Manuseko ka nakhel patnia ta, niko ni ka mangel le? 13A me phenav tumenge kai o Elias ia avilo, ta von ni pinllarde le, ta cherde lea sogo mangle, isto gia sar phenen e Devleke alava.

O Jesus sastarel iekhe chaurre kai saia ande le iek duo bilacho

Mt 17.14-21; Lk 9.37-43

14Kana irisaile kote kai sea e disipulura, dikhle kai truial lendar sea but llene, ta nesave kovacha e zakonoke janape e disipulonenchar. 15Kana dikhle e Jesuse, sa e llene veselisaile ta prastie lete te den lea orba. 16O Jesus puchla len:

¿Pala savi orba jan tumen lenchar?

17Iek katar e llene kai sea kote phenda:

Kovachi, andem tute me chaurre, soke ande lete si iek duo kai mukla le nemao. 18Kaigo te avela vou, o duo istarel le ta peravel le pe phuv, ta chudel o chungar katar po mui, kirchin leke danda, ta chapenilpe leki esnaga. Manglem katar che disipulura te traden letar gole duo, a von nasti cherde le.

19O Jesus phenda:

¡Manusalen bi pachamake! ¿Pe gachin ios morabi te avav tumenchar? ¿Pe gachin ios morabi te terpiu tumen? Anen mange kate e chaurre.

20Ondaka inllarde e chaurre kai o Jesus. A kana o duo dikhla e Jesuse, cherda e chaurre te perel bengendar, ta te taulilpe pe phuv ta te chudel chungar katar po mui. 21O Jesus puchla e chaurreke dade.

¿Sar kana si gua che chaurreke?

O dad e chaurreko phenda:

Sar kana saia minono. 22Ta but droma gua duo chudela le ande iag ta ando pai, te mundarel le. A te sai chere vareso pala le, te avel chuke zalba amendar ta pomozisar amen.

23O Jesus phenda leke:

¿Soke phene te sai chere? ¡Sa sai cherdol gole lleneke kai pachal!

24Ondaka o dad e chaurreko urkisarda:

Me pachau ¡Pomozisar man te pachau mai but!

25Kana dikhla o Jesus kai chidiniaona but llene, dia pe gua duo bilacho ta phenda leke:

Duo nemavo ta kasuko, me phenav chuke te like katar gava chaurro ta te na de ios ande lete.

26O duo urkisarda ta cherda e chaurre te perel pale bengendar. Ondaka likisto letar, ta mukla le sargo mulo, ta but llene phenena kai saia mulo. 27A o Jesus istarda le e vastetar, vazdia le ta o chaurro ustilo pe porrne.

28Mapalal o Jesus dia ande iek cher, ta leke disipulura puchle le korkorre ta phende leke:

¿Soke amen nasti tradiam gole duo?

29A o Jesus phenda lenge:

Gala duura sai tradiniaon samo e molimaia.

Pale o duito phenel o Jesus kai ka merel

Mt 17.22-23; Lk 9.43-45

30Kana lleletar kotar, nakhle katar e Galilea. A o Jesus ni kamla te llanel le niko, 31soke sikavela pe disipulonen ta phenela lenge gia:

O Chavo e Manuseko si te avel dino ande va e manusenge, ta ka mundaren le. A pala e trin llive ka ustel katar o meripe.

32Von ni acharena so phenela lenge o Jesus, ta darana te puchen le.

¿Ko si o mai glamno?

Mt 18.1-5; Lk 9.46-48

33Avile ando Kafarnaum. Ta kana sea ando cher, o Jesus puchla len:

¿Save orbe dena tumen e dromea?

34A von ni phende niso, soke e dromea janape ko saia maskar lende o mai baro.#Lk 22.24. 35Ondaka o Jesus beslo, ikharda e desuduien ta phenda lenge:#Mt 20.26-27; 23.11; Mk 10.43-44; Lk 22.26.

Vareko te mangela te avel o mai angluno, morabi te avel o mai paluno, ta te radil saurrenge.

36Mapalal thoda iekhe minone po maskaral lendar, istarda le ande pe va ta phenda lenge:

37Ko lela ande mo anav iekhe minone sargo gale, man lel, ta ko lel man, ni lel samo man, lel i gole kai bichalda man.#Mt 10.40; Lk 10.16; Jn 13.20.

Ko ni marelpe amenchar, si amenchar

Mt 10.42; Lk 9.49-50

38O Juan phenda leke:

Kovachi, dikhlam iekhe llene kai tradela e llavolonen ande cho anav, ta amen achavaia le, soke inai iek amarendar.

39O Jesus phenda leke:

Muken le, soke nisavo lleno kai cherel iek bari ezgoda Devlikani ande mo anav, ni del bilache orbe mandar mapalal. 40Ko ni marelpe amenchar, si amenchar.#Mt 12.30; Lk 11.23.

41Vareko te del tumen, makar avela iek taso pai, samo soke sen manusa e Kristoke, chachimaia phenav tumenge kai ka avel le so te dobil.#Mt 10.42.

O zumadipe

42A vareko te cherela te perel ando bilachipe iek katar gala minone kai pachan ande ma, avela leke mai lache te chuden le ande mora phanglo e korratar pe iek baro barr. 43Te si cho va kai cherel tut te pere ando bilachipe, chin le. Soke mai lache si te de ando zivoto iekhe vastea, neko te ave ando tufano e duie vastenchar, kote kai e iag nasti mundardol,#Mt 5.30. 44kote kai e cherme ni meren ta e iag nikada ni merel. 45A te cherela tut cho porrno te pere ando bilachipe, chin le. Soke mai lache si te de iekhe porrnea ando zivoto neko te ave chudino e duie porrnenchar ando tufano, kote kai e iag nikada nasti mundardol, 46kote kai e cherme ni meren ta e iag nikada ni merel, 47A chi iak te cherel tut te pere ando bilachipe, ikan la. Soke mai lache si te de iekhe akhaia ande Devleki charoina, neko e duie akhenchar te ave chudino ando tufano,#Mt 5.29. 48kote kai e cherme ni meren ta e iag ni merel.#Is 66.24.

49Soke sa e manusa si te aven londe e iagaia. 50O lon si lacho, a te jasarel po londipe, ¿sar ka cheren te avel londo pale? Isto gia si te avel lon ande tumende, ta ka avel tumen pas iek averea.#Mt 5.13; Lk 14.34-35.

Currently Selected:

Markos 9: BACHRO

Highlight

Copy