Markos 8

O Jesus del te jan bute llenen

Mt 15.32-39

1Iek llive kana chidinailea pale but llene ta ni saia len so te jan, o Jesus ikharda pe disipulonen ta phenda lenge:

2Si mange zao katar gala llene, soke cherel trin llive kai von si kate manchar ta inai len so te jan. 3A te bichaldem len bokhale kai pe chera, sai baldinpe e dromea, soke nesave llene avile duratar.

4Leke disipulura phende leke:

¿A sar ka da len te jan pe iek than sargo gava, kana kate ni zivil niko?

5O Jesus puchla len:

¿Pe gachin marrne si tumen?

Von phende:

Efta.

6Ondaka o Jesus phenda e llenenge te besen pe phuv, lia ande pe va e efta marrne ta dia fala e Devle, phagla len, ta dia len kai pe disipulura, te fulaven len von maskar e llene, ta von cherde sar phenda lenge o Jesus. 7Ta i saia len nesave machorre. Molisailo pe lende ta phenda te fulaven i gola machorre. 8Saurre jale ta chalile, ta chidie e kotora kai achile ande efta kotariche. 9Gola kai jale sea preko star milie llene. Mapalal o Jesus phenda lenge te llantar, 10likisto ande llimia pe disipulonenchar ta llelotar ande phuv katar e Dalmanuta.

E fariseura mangen iek bari ezgoda Devlikani

Mt 16.1-4; Lk 12.54-56

11Avile e fariseura ta thode te janpe e Jesusea, te sai cheren le te kojadol, ta mangle letar te cherel iek bari ezgoda Devlikani ta gia te sikavel kai vou avela bichaldo e Devletar.#Mt 12.38; Lk 11.16. 12O Jesus lia peke duo zurale ta phenda:#Mt 12.39; Lk 11.29.

¿Soke mangen gala llene iek bari ezgoda Devlikani? Chachimaia phenav tumenge kai ni ka cherav so von mangen.

13Ondaka mukla len kote, likisto ande llimia ta llelotar pe o goia rig katar e mora.

E levadura e fariseonengi

Mt 16.5-12

14E disipulura bristrailea te inllaren vareso te jan, ta saia len samo iek marrno ande llimia. 15O Jesus phenda lenge:#Lk 12.1.

Arakhen tumen katar e levadura e fariseonengi ta katar e levadura e Erodeki.

16E disipulura denape orba maskar pete ta phenena kai ni saia len marrno.

17O Jesus acharda ta phenda lenge:

¿Soke phenen kai inai tumen marrno? ¿Llik akana ni acharen? ¿Gia phangle si tumare mislura? 18¿Si tumen akha ta ni dikhen? ¿Si tumen kan ta ni asunen? ¿Ni den tumen golli?#Jer 5.21; Ez 12.2; Mk 4.12. 19Kana fuladem e panch marrne maskar e panch milie llene, ¿pe gachin kotariche pherdem e kotorenchar kai achile?

Von phende:

Desudui.

20Ta kana fuladem e efta marrne maskar star milie llene, ¿pe gachin kotariche pherde chidien?

Von phende:

Efta.

21Ondaka o Jesus phenda lenge:

¿Ni ios ni acharen?

O Jesus sastarel iekhe korre ande Betsaida

22Kana avile ande Betsaida, nesave llene inllarde iekhe korre kai o Jesus, ta molisaile leke te dodil le. 23O Jesus istarda e korre e vastetar ta inllarda le avri katar o foro. Chingarda leke akha e chungarea, thoda pe va pe lete ta puchla le dal dikhela vareso. 24O korro lia te dikhel, ta phenda:

Dikhav e manusen, kai dikhon sargo kasta kai phiren.

25O Jesus thoda pale pe va pe leke akha, ta o korro thoda sama, ta dikhla ta sastilo. Ta dikhla sa bristomaia. 26Ondaka o Jesus bichalda le chere, ta phenda leke:

Na irisao ando foro.

O Pedro phenel kai o Jesus si o Mesias

27O Jesus ta leke disipulura llele ande forichura kai sea pasa phuv katar e Sesarea katar o Filipo. E dromea o Jesus puchla pe disipulonen ta phenda lenge:

¿Ko phenen e llene kai sem me?

28Von phende leke:#Mk 6.14-15; Lk 9.7-8.

Nesave llene phenen kai tu san o Juan, gua kai kristil, aver llene phenen kai tu san o Elias, a aver llene phenen kai tu san iek katar e poraukura.

29Ondaka o Jesus puchla len A tumen ¿ko phenen kai sem me?#Jn 6.68-69.

O Pedro phenda leke:

Tu san o Mesias.

30A o Jesus phenda lenge te na den leki orba nikake.

O Jesus phenel kai si te merel

Mt 16.21-28; Lk 9.22-27

31O Jesus thodape te sikavel kai o Chavo e Manuseko ka nakhel but bari patnia, ta kai ka avel tradino katar e phure, katar e gazda e poponenge ta i katar e gazda e zakonoke. Ta phenda lenge kai ka mundaren le, ta kai pala e trin llive ka ustel katar o meripe. 32Sa goia orba dia lenge bristomaia. Ondaka o Pedro inllarda e Jesuse pe iek rig, ta thoda te del pe lete. 33A o Jesus boldinailo, dikhla pe disipulura ta dia po Pedro, ta phenda leke:

¡Le tut mandar Satanas! Tu ni dikhe e ezgode sargo o Del, tu dikhe len sargo manus.

34Ondaka o Jesus ikharda pe disipulonen ta e llenen, ta phenda lenge:#Mt 10.38; Lk 14.27; Jn 12.24.

Vareko te mangela te avel mo disipulo, si te bristarelpe vou petar, ta te inllarel po krusto ta te llal pala ma. 35Soke o lleno kai mangela te braduil po zivoto, ka jasarel le, a o lleno kai jasarel o zivoto pala ma ta pala e lachi viasta kai lia, ka braduil po zivoto.#Mt 10.39; Lk 17.33; Jn 12.25. 36¿So blazil e manuseke te dobil sogo si po sueto, ta te jasarel po zivoto? 37O ¿pe gachin sai pochinel o manus pala po zivoto? 38Vareko te avel leke lallao mandar ta katar me alava angla gala llene kai inai chache ta si bilache, i o Chavo e Manuseko ka avel leke lallao lendar kana ka avel ando blagosipe leke Dadeko ta e santone suechonenchar.

Currently Selected:

Markos 8: BACHRO

Highlight

Copy