Lukas 9
9
O Jesus bichalel e disipulonen te phenen e charoina e Devleki
Mt 10.5-15; Mk 6.7-13
1O Jesus chidia pe desuduie disipulonen, ta dia len zor ta o gazdaripe te traden suako llavolonen ta i te sastaren suako nasualipe. 2Bichalda len te phenen e lachi viasta katar e charoina e Devleki ta te sastaren e nasualen. 3Ta phenda lenge:#Lk 10.4-11.
Na inllaren niso e dromeke. Ni rovli, ni galavo ni marrno ni love, ni premena. 4Kana ka aven ande varesavo cher, achen kote lligo ni ka llantar katar gua than. 5A ande varesavo foro te na mukle tumen te achen, liken letar ta chinosaren o prajo katar tumare porrne, te dikhen kai ni avila tumenge drago so cherde tumenchar.#Mt 10.14; Ech 13.51.
6Von likiste ta llele kai sa e forichura, ta phenena e lachi viasta ta sastarena e nasualen.
O Erodes ni llanel ko si o Jesus
Mt 14.1-12; Mk 6.14-29
7O charo o Erodes asunda kai dena orba katar sa so cherela o Jesus ta ni llanela so ka mislil, soke nesave llene phenena kai o Juan ustiloia katar o meripe, 8aver llene phenena kai avilo o profeta o Elias, a aver llene phenena kai saia iek katar e purane poraukura kai ustiloia katar o meripe.#Mt 16.14; Mk 8.28; Lk 9.19. 9A o Erodes phenda:
Isto me bichaldem te chinen e Juaneko soro. ¿Ko si gava lleno?
Goleke o Erodes mangela te dikhel e Jesuse.
O Jesus del te jal iekhe bare sueto
Mt 14.13-21; Mk 6.30-44; Jn 6.1-14
10Kana e apostolura irisaile ta phende e Jesuseke sa so von cherde. Vou, ikharda len pe iek rig, inllarda len ande iek foro kai ikhardol Betsaida. 11A kana e llene llangle, llele pala le. Ta o Jesus avila lenchar pachivalo ta dia lenge orba katar e charoina e Devleki ta sastarda e nasualen.
12Kana lela te perel e riat, avile e desudui disipulura pasa o Jesus ta phende leke:
Phen e llenenge te llantar, te roden kai te nakhen e riat ta te roden so te jan ande forichura ta pe droma kai si pase, soke kate inai niso.
13O Jesus phenda lenge:
Den len tumen te jan:
Von phende leke:
Samo panch marrne ta dui mache si amen, a te jan sa gala llene morabi te lla te china.
14A kote sea preko panch milie murusa. A o Jesus phenda pe disipulonenge:
Thoven len te besen po pinda llene.
15Von cherde so phenda o Jesus, ta cherde te besen sa e llene. 16Ta o Jesus lia ande pe va e panch marrne ta e dui mache, dikhla ando miloso, molisailo pe lende, phagla len ta dia len kai pe disipulura te fulaven len maskar e llene. 17Saurre jale ta chalile, ta chidie ande desudui kotariche e kotora kai achile.
O Pedro phenel kai o Jesus si o Mesias
Mt 16.13-19; Mk 8.27-29
18Iek llive kana o Jesus molilape korkorre ta leke disipulura sea lea, puchla len:
¿Ko phenen e llene kai sem me?
19Von phende:#Mt 14.1-2; Mk 6.14-15; Lk 9.7-8.
Nesave llene phenen kai tu san o Juan gua kai kristil, aver llene phenen kai san o Elias, a aver llene phenen kai san iek katar e purane poraukura, kai ustilo katar o meripe.
20A tumen, ¿ko phenen kai sem me?#Jn 6.68-69.
O Pedro phenda leke:
Tu san o Mesias e Devleko.
O Jesus phenel kai si te merel
Mt 16.20-28; Mk 8.30—9.1
21A o Jesus mangla lendar te na phenen gua nikake. 22Ta phenda lenge:
O Chavo e Manuseko si te nakhel but patnia, ta e phure, ta e gazda e poponenge ta e kovacha e zakonoke ni ka mangen le. Ta ka mundaren le, a pala e trin llive ka ustel katar o meripe.
23Mapalal phenda saurrenge:#Mt 10.38; Lk 14.27; Jn 12.24.
Vareko te mangela te avel mo disipulo, si te bristarelpe vou petar, ta te inllarel po krusto suako llive ta te llal pala ma. 24Soke o lleno kai mangela te braduil po zivoto, ka jasarel le. A o lleno kai jasarel po zivoto pala ma, ka braduil le.#Mt 10.39; Lk 17.33; Jn 12.25. 25¿So blazil e manuseke te dobil sogo si po sueto, ta te jasaol ta te zatril isto vou pe? 26Vareko te avel leke lallao mandar ta katar me alava, i o Chavo e Manuseko ka avel leke lallao letar kana ka avel ande po blagosipe ta ando blagosipe leke Dadeko ta e santone suechonengo. 27Chachimaia phenav tumenge kai nesave llene kai si kate, mai anglal te meren ka dikhen e charoina e Devleki.
E Jesuseki esnaga cherdol aver
Mt 17.1-8; Mk 9.2-8
28Nakhle preko ojto llive katar goia orba, ta o Jesus likisto pe iek burdo te molilpe, llelo e Pedroia, e Santiagoia ta e Juanea. 29Kana molilape, leko mui cherdilo aver, ta leke patave cherdile but parrne ta klichina, 30ta dui llene dena orba lea, gola sea o Moises ta o Elias, 31ta truial lendar saia iek villelo blagosime ta phenena kai o Jesus ka llaltar katar gava sueto, ta goia ezgoda saia te avelpe ando Jerusalem. 32O Pedro ta leke amal saia lenge but lindri, a achile llungade, ta dikhle o blagosipe e Jesuseko ta e duie llenen kai sea lea. 33Kana gala llene llanatar katar o Jesus, o Pedro phenda leke:
Kovachi, ¡Gia sukar kai sam kate! Ka chera trin cherorra e patrenchar:
Iek chuke, aver e Moiseseke ta aver e Eliaseke.
A o Pedro dela orba ta ni llanela so phenel. 34Kana dela orba iek oblako ucharda len, ta kana dikhle kai i von sea andre ando oblako daraile. 35Ondaka katar o oblako likisto iek avazi kai phenda:#Is 42.1; Mt 3.17; 12.18; Mk 1.11; Lk 3.22; 2 P 1.17-18.
Gava si mo Chavo, kai me esvirisardem:
Asunen le.
36Kana asundilo gua avazi, o Jesus achilo korkorre. A von mukle maskar pete sa gala ezgode, ta ande gola llivesa ni phende nikake so von dikhlea.
O Jesus sastarel iekhe terne kai saia ande le iek duo bilacho
Mt 17.14-21; Mk 9.14-29
37Thiarinako, kana fuliste katar o burdo, but sueto likisto te maladol e Jesusea. 38Ta iek manus maskar e llene bare avazea phenda:
Kovachi, me moliv man chuke, dik pe mo chaurro kai si o edino kai si man, 39iek duo istarel le ta cherel le te urkil ta te perel bengendar ta te chudel katar po mui o chungar, chalavel le ta ni kamel mukel le. 40Manglem but katar che disipulura te traden letar gole duo, a von nasti cherde le.
41O Jesus phenda:
¡Ioi manusalen kai inai tumen pachape ta sen bilache! ¿Pe gachin ios si te avav tumenchar ta te terpiu tumen? An kate che chaurre.
42Kana o terno avela pasa le, o llavolo perada le pe phuv ta cherda pale te perel bengendar, a o Jesus dia po duo bilacho, sastarda e terne ta diale kai leko dad. 43Ta sa chudisaile katar e Devleki zor.
O Jesus pale phenel kai ka merel
Mt 17.22-23; Mk 9.30-32
Kana sa chudinape katar so cherela o Jesus, vou phenda pe disipulonenge:
44Asunen so ka phenav ta na bristaren tumen:
O Chavo e Manuseko si te avel dino ande va e manusenge.
45A von ni acharena so phenela lenge, soke ni ios ni putailoa lengo mislo te acharen le, ta darana te mangen letar te phenel lenge so saia gua.
¿Ko si o mai baro?
Mt 18.1-5; Mk 9.33-37
46Ondaka e disipulura thode te den pe orba te llanen ko ka avel o mai baro maskar lende.#Lk 22.24. 47O Jesus kana thoda sama so mislinape, lia pasa pe iekhe minone 48ta phenda:#Mt 10.40; Lk 10.16; Jn 13.20.
Ko lela gale minone ande mo anav, lel man. Ta ko lel man lel i gole kai bichalda man. Goleke o mai minono tumendar, gua si o mai baro.
Ko ni marelpe amenchar si amenchar
Mk 9.38-40
49O Juan phenda leke:
Kovachi, dikhlam iekhe llene kai tradela e llavolonen ande cho anav, ta amen achavaia le, soke gua lleno inai iek amarendar.
50O Jesus phenda leke:
Na achaven le, soke ko ni marelpe amenchar, si amenchar.
O Jesus del po Santiago ta po Juan
51Kana avela pase o vreme kai o Jesus saia te llal ando miloso, llelo karing o Jerusalem tromanimaia. 52Ta bichalda llenen te llan ande iek forichi katar e Samaria samo te roden kai te nakhel e riat. 53A e Samaritanura ni kamle te avel lende soke llanena kai llala karing o Jerusalem. 54Kana phende leke gua o Santiago ta o Juan kai sea leke disipulura dikhle so nakhlaia, phende leke:#2 R 1.9-16.
Gazda. ¿Mange te phene te fuliel iag katar o miloso, ta te mundarel len gia sar cherda o Elias?
55A o Jesus boldinailo ta dia pe lende. 56Mapalal llele ande aver forichi.
Te lla pala o Jesus
Mt 8.19-22
57Kana llana e dromea, iek lleno phenda e Jesuseke:
Gazda, mangav te llau pala tu kaigo te llaia.
58O Jesus phenda leke:
E lisiche si len kai te gurudon, ta i e chiriklia e milosoke si len kuibura, a o Chavo e Manuseko inai le kai te thovel po soro.
59O Jesus phenda avereke:
Aide pala ma.
A vou phenda leke:
Gazda, muk man mai anglal te prajou me dade.
60O Jesus phenda leke:
Muk e llenen kai si mule te prajon pire mulen, a tu lla ta de orba katar e charoina e Devleki.
61Aver lleno phenda leke:#1 R 19.20.
Gazda, mangav te llau pala tu, muk te llau mai anglal kai mi familia te phenav lenge kai ka llautar.
62O Jesus phenda leke:
Gua kai lel o kas te putarel lea e phuv ta dikhel pala pe, inai letar e charoina e Devleki.
Currently Selected:
Lukas 9: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
