Lukas 8

E diskinie kai pomozin e Jesuse

1Mapalal, o Jesus llelo ande but forura ta forichura minone ta phenela e lachi viasta katar e charoina e Devleki. E desudui apostolura llana lea, 2ta i nesave diskinie kai vou sastardaia katar e duura bilache ta katar o nasualipe. Lenchar llala e Maria, kai phenena lake Magdalena, 3ta i e Juana, kai saia pala o Kusa, kai radila e Erodeseke. Ta e Susana, ta aver but diskinie kai pomozina le e lovenchar kai saia len.#Mt 27.55-56; Mk 15.40-41; Lk 23.49.

E paramichi katar o simichari

Mt 13.1-9; Mk 4.1-9

4But llene likiste katar e forura te dikhen e Jesuse, ta chidiniaona but llene. Ondaka phenda lenge gaia paramichi: 5Iek simichari llelo te thovel e simiche ande phuv. Ta kana thovela e simiche, nesave simiche peletar po drom, ta ustadelen ta jalelen e chiriklia. 6Nesave peletar maskar e barra. Ta kana lie te barion, sukile soke ni saia len pai. 7Aver simiche peletar maskar e karrne. Ta bariona lenchar, ta e karrne tasade len. 8A nesave peletar pe lachi phuv ta barile, ta die petar but lliu, stotina katar iek.

Gava phenda o Jesus ando baro avazi:

¡Ka si len kan te asunen! 9E disipulura puchle e Jesuse so mangela te phenel gole paramichaia. 10Vou phenda lenge:#Is 6.9-10.

Tumenge sikadol so si gurudino katar e charoina e Devleki, a ogole llenenge dav orba ande paramiche, gia mai te dikhen, ni ka dikhen, ta mai te asunen, ni ka acharen.

O Jesus sikavel lenge so phenel e paramichi

Mt 13.18-23; Mk 4.13-20

11Gava si so phenel e paramichi:

E simicha si o alav e Devleko. 12A e simiche kai peletar po drom si e llene kai asunen o alav, a avel o llavolo ta ikanel o alav katar lengo lio te na pachan ta te na braduinpe. 13E simicha kai peli maskar e barra si sargo gola llene kai asunen e lachi viasta ta len la veselimaia, a inai len but zile. Pachan nesavo vreme, a kana avel o zumadipe jasaon. 14E simiche kai peletar maskar e karrne si e llene kai asunen, a sa poloke muken te tason pala e brige, o barvalipe ta o lachipe e zivotoko, ta ni resen te den septelie. 15A e simiche kai peletar pe lachi phuv, si e llene kai iekhe lache liea mangen te asunen ta cheren so phenel o alav ta llan orta, ta den petar lache septelie.

E paramichi e memeliaki

Mk 4.21-25

16Niko ni phaberel iek memeli te uchare la varesoia o te thovel la telal tala o kerveto, kai morabi te thodol si upre te kletosarel, ta gola kai ka den andre ka dikhen o villelo.#Mt 5.15; Lk 11.33. 17Isto gia, sogo si uchardo ka sikadol, ta sogo si gurudino, ka avel pinllardo ta ka sikadol.#Mt 10.26; Lk 12.2. 18Goleke, asunen, soke gole kai si le ka avel le dino mai but, a gole kai inai le, so mislil kai si le ka avel letar ikando.#Mt 25.29; Lk 19.26.

E dei ta e phlal e Jesuseke

Mt 12.46-50; Mk 3.31-35

19E dei ta e phlal e Jesuseke llele kote kai vou saia, a nasti avile pasa le soke sea but llene. 20Vareko phenda e Jesuseke:

Chi dei ta che phlal etalen avri ta mangen te dikhen tut.

21Vou phenda:

Gola kai asunen ta cheren so phenen e Devleke alava, gola si mi dei ta me phlal.

O Jesus achavel o bursin

Mt 8.23-27; Mk 4.35-41

22Iek llive o Jesus likisto ande iek llimia pe disipulonenchar, ta phenda lenge:

Aven pe o goia rig e paieki.

Ta lleletar, 23ta kana nakhena o pai, o Jesus sovtotar. Ta avilo iek baro bursin po pai, ta o pai dela andre ande llimia ta e disipulura mislina kai ka tason. 24Ondaka llele te llungaven e Jesuse, ta phenena:

¡Kovachi! ¡Kovachi! ¡Ka tasiva!

O Jesus ustilo ta dia pe balav ta pe valura, ta sa achilo esmiro. 25Mapalal phenda e disipulonenge:

¿A tumaro pachape kai talo?

A von, daraile ta chudinape, ta phenena iek avereke:

¿Ko si gava lleno, kai del pe balav ta po pai, ta kanden le?

Iek lleno katar e Gerasa kai saia ande le llavolura

Mt 8.28-34; Mk 5.1-20

26Avile ando foro katar e Gerasa, kai si pe o goia rig e paieki, angla e Galilea. 27Kana o Jesus fulisto pe phuv, likisto katar o foro iek lleno kai ande le sea llavolura, ta avilo pasa le. Cherela but vreme kai gua lleno llala bi patavengo ta ni zivila ande iek cher, vou zivila maskar e limoria. 28Kana dikhla e Jesuse, pelotar pe pe changa angla le, ta urkila:

¡Na amisao manchar, Jesus, Chavo katar o Del e milosoko! ¡Mangav tutar te na pati man!

29Vou phenda gua soke o Jesus phendaia e bilache duoke te likel letar. A but droma o llavolo gazdarisardaia pe gua lleno a llene phandena leke va ta i leke porrne lanchonenchar te istaren le, a vou chinela e lanchura ta o llavolo cherela le te nasel ta te llal pe iek thana puste. 30O Jesus puchla le:

¿Sar ikhardo?

Ta vou phenda:

Mo anav si Lejion.

Vou phenda gua soke sea but e llavolura kai diea ande le, 31ta mangle letar te na chudel len ande bari jar 32Sar sea but bale kai jana po burdo, e duura mangle letar te den ande gola bale ta o Jesus mukla len. 33Ondaka e llavolura likiste katar gua lleno ta die ande bale, ta e bale prastie katar o burdo tele llik kai o pai, ta kote tasile.

34E llene kai arakhena e balen, kana dikhle so nakhla kote, nasle kotar ta llele ando foro ta ando vos ta phende sa so nakhle. 35E llene likiste avri te dikhen so saia. Ta kana avile kote kai saia o Jesus, dikhle kai besela pasa e Jesuseke porrne o lleno kai likistea letar e llavolura, furiado ta ande pi golli. Ta daraile. 36Ta e llene kai dikhlea so nakhlaia, phende sa e llenenge sar sastiloia o lleno kai saia ande le e llavolura. 37Ondaka sa e llene katar e Gerasa mangle katar o Jesus te llaltar kotar, soke darana but. Ondaka o Jesus likisto ande llimia ta llelotar. 38O lleno kai likistea letar e llavolura mangla letar te llal lea, a o Jesus phenda leke te achel, ta phenda leke:

39Lla kai cho cher ta phen sa so cherda o Del pala tu.

Gua manus llelo ta phenda sa e foroke so cherda o Jesus pala le.

E diskinia nasuali ta e chorri e Jairoki

Mt 9.18-26; Mk 5.21-43

40Kana o Jesus irisailo pe o goia rig e paieki, e llene sea pachivale lea ta vesele soke sa aduricharena le. 41Ondaka avilo iek lleno kai ikhardola Jairo, kai saia gazda katar e khanlliri e judionengi. Gava lleno dia changa kai e porrne e Jesuseke ta mangla letar te llal kai leko cher, 42soke leki edini chorri desuduie bursengi saia po meripe. Ta kana o Jesus llala, but sueto kai llala pala lete chidinailo truial lete ta chichidena le. 43Maskar e llene saia iek diskinia kai cherela desudui burs kai saia nasuali ta peravela rat, ta sa pe love diaialen ande doktoria, ta ni iek katar gola doktoria nasti sastarda la. 44Gaia diskinia avili pase pala o Jesus ta dodisarda leko gertachi, ta isto kote o rat achilo. 45Ondaka o Jesus puchla:

¿Ko dodisarda man?

Ta sar niko ni phenela kai dodisarda le, o Pedro phenda:

Kovachi, e llene chichiden tut ta espiden tut katar suako rig.

46A o Jesus pale phenda:

Vareko dodisarda man, soke achardem kai likista mandar zor.

47Kana e diskinia dikhla kai nasti gurudola, izdrala ta lleli te del changa kai e Jesuseke porrne. Ta phenda leke angla sa e llene soke dodisarda le, ta sar sastili isto kote. 48O Jesus phenda lake:

Chorrie, pala cho pachape sastilan. Llatar esmiro.

49Ta kana o Jesus dela orba, avilo iek lleno bichaldo ta phenda e gazdake katar e khanlliri e judionengi:

Chi chorri muli. Na joliar ios e Kovache.

50A o Jesus asunda le ta phenda leke:

Na dara samo pacha, ta chi chorri ka braduilpe.

51Kana avilo kai o cher, ni mukla te del andre nika samo e Pedro, e Santiago ta e Juane, ta die andre lenchar o dad ta e dei e minonake. 52Sa rovena ta kukina cheres e minoni, a o Jesus phenda lenge:

Na roven, e chorri inai muli, voi sovel. 53Sa asaie letar, soke llanena kai e minoni mulia. 54Ondaka o Jesus istarda lako va ta phenda zurale:

¡Chorrie, uste!

55Ta voi zivisarda pale, ta isto kote ustili. Ta o Jesus phenda te den la te jal. 56Lako dad ta laki dei chudisaile but, a o Jesus phenda lenge te na phenen nikake so nakhla.

Currently Selected:

Lukas 8: BACHRO

Highlight

Copy