Lukas 7
7
O Jesus sastarel iekhe sudoko sluga
Mt 8.5-13; Jn 4.43-54
1Kana o Jesus dia orba e llenenge, llelo ando Kafarnaum. 2Ande gua foro zivila iek sudo rromano kai saia le iek sluga kai vou volila but, ta saia nasualo po meripe. 3Kana o sudo asunda kai dena e Jesuseki orba, bichalda nesave phuren katar e judiura te molinpe leke te llal te sastarel leke sluga. 4Von llele kai o Jesus ta molisaile leke but ta phenena:
Gale sudoke blazil te pomozi le, 5soke volil amare phuvia ta cherda amenge iek khanlliri.
6O Jesus llelo lenchar, ta kana sea pasa o cher, o sudo bichalda nesave amalen te phenen leke:
Gazda, na brigisao, soke ni sem lacho te de ande mo cher. 7Ni kamlem ni te avav te maladivav tuia. Samo phen te sastol mo sluga. 8Soke i me sem manus kai si man zor, ta si tala mo va boñikura, ta phenav goleke:
Lla, ta vou llal, a ogoleke:
Aide, ta vou avel. Ta kana me phenav me slugake:
Cher gaia ezgoda, vou cherel la.
9O Jesus chudisailo kana asunda gaia orba, ta dikhla pe llene kai llana pala le ta phenda:
Chachimaia phenav tumenge ka ni ando Israel ni maladem pe gachin pachape sargo ande gava manus.
10Kana irisaile kai o cher e llene kai o sudo bichaldaia, dikhle kai o sluga ia sastiloia.
O Jesus cherel te ustel katar o meripe iekhe phivliake chaurre
11Mapalal, o Jesus llelo karing o foro o Nain. Llana lea leke disipulura ta but llene. 12Kana avile pasa o foro, dikhla kai inllarena te prajon iekhe llene, edino chavo pe dako, kai saia phivli. Ta but llene katar o foro avena laia. 13Ta kana o Jesus dikhla la, avila leke zalba latar ta phenda lake:
Na rou.
14Avilo pase ta istarda e postelia kote kai inllarena e mule, ta e llene kai inllarena le achile. Ondaka o Jesus phenda e lleneke kai muloa:
Ternea, chuke phenav:
¡Uste!
15Ondaka o lleno kai saia mulo beslo ta dia orba, ta o Jesus diale kai leki dei. 16Sa e llene kai sea kote daraile ta blagosina e Devle, ta phenena:
Avilo iek baro profeta maskar amende.
Ta i phenena:
O Del avilo te pomozil pe foro.
17Ta ande sa e Judea ta ande forura kai sea truial llangle so cherda o Jesus.
E bichalde e Juaneke
Mt 11.2-19
18O Juan llangla katar sa gola ezgode, soke e llene kai llana pala le phenena leke so cherela o Jesus, goleke Ikharda duien katar pe disipulura 19ta bichalda len kai o Gazda, te puchen le:
¿San tu gua kai saia te avel o si te adurichara avere? 20E llene kai bichaldaia o Juan avile pasa o Jesus ta phende leke:
O Juan gua kai kristil bichalda amen te pucha tut dal san tu gua kai saia te avel o si te adurichara avere.
21Isto kote o Jesus sastarda bute llenen katar lengo nasualipe ta katar lengi patnia, ta katar e duura bilache, ta cherda bute korren te dikhen. 22Ta phenda lenge:#Is 35.5-6; Is 61.1.
Llan ta phenen e Juaneke so dikhlen ta so asunden. Phenen leke kai e korre dikhen, e bange phiren, e leprosura saston, e kasuke asunen, e mule llundinpe ta e chorrenge phendol e lachi viasta. 23¡Ta blagosime gua kai ni jasarel po pachape ande ma!
24Kana lleletar e llene kai bichalda o Juan, o Jesus dia orba e llenenge katar o Juan, ta phenela:
¿So llelen tumen te dikhen po pusto? ¿Iek ran chinome e balaviatar? 25A te inai gia ¿So llelen te dikhen? ¿Iekhe manuse furiado barimaia? Tumen llanen kai e llene kai furiadon gia ta si ande dragostia zivin samo ande chera e charoke. 26A ¿So llelen te dikhen? ¿Iekhe profeta? Ea, chachimaia, ta mai but neko iek profeta. 27Soke o Juan si kai si pisime letar:#Mal 3.1.
Me bichalav me profeta angla tu,
te lacharel chuke o drom.
28Phenav tumenge kai maskar sa e manusa, ni iek ni saia mai baro neko o Juan. A o mai minono ande charoina e Devleki si mai baro neko vou.
29Sa e llene kai asunde e Juane ta i e publikanura, kristisarda len vou, ta cherena so mangela lendar o Del, 30a e fariseura ta e kovacha e zakonoke ni kamle te kristil len o Juan ta ni kamle te cheren so mangela lendar o Del.#Mt 21.32; Lk 3.12.
31¿A pe ka ka phenav kai si chuti gaia vicha? ¿Pe so mizil? 32Von si sargo e minone kai besen po maskar katar o foro ta urkin ogole minonenge kai llan lenchar ta phenen lenge. Basaldan tumenge ande firura ta ni chelden, llilabiam tumenge llilia zalbake ta ni rovden. 33Soke avilo o Juan gua kai kristil kai ni jal marrno ta ni piel mol, a tumen phenen kai ande le si iek llavolo. 34Mapalal avilo o Chavo e Manuseko kai jal ta piel ta phenen letar, gava si iek lleno kai samo jal ta piel mol ta kai si amal e llenenchar kai si publikanura ta e manusenchar kai si bilache. 35A o chachipe e Devleko dikhol ande leke chave.
O Jesus ande Simonoko cher
36Iek fariseo ikharda e Jesuse te jal, ta o Jesus llelo ande leko cher. Ta beslo pe sinia, 37ondaka avili iek diskinia kai zivila isto ande gua foro ta llanglaia kai o Jesus lleloia te jal ando cher e fariseoko, anda pea iek taso alabastroko pherdo meriso. 38Rovindo thodape kai e porrne e Jesuseke, pegachin rovela kai lake ausa perena pe jesuseke porrne. Ta mapalal sukarda len pe balenchar, chumidia len ta thoda pe lende meriso.#Mt 26.7; Mk 14.3; Jn 12.3. 39O fariseo kai ikhardaia e Jesuse te jal, kana dikhla gua, mislisailo: Gava lleno te aviloia chachimaia iek profeta, llanglaia savi diskinia bilachi si gaia kai dodil le. 40Ondaka o Jesus phenda e fariseoke:
Simon, si te dav tuia iek orba.
O fariseo phenda leke:
Phen mange, Kovachi.
41O Jesus phenda leke:
Dui llene sea unllile iekhe lleneke kai dela unllile ta pe gua radila. Iek saia leke unllile panch stotine denariura, a o gua pinda, 42ta sar nasti pochinena leke, o lleno kai dela unllile prostisarda e duienge lengo dugo. Akana phen mange tu:
¿Savo katar e dui ka del le mai but fala? 43O Simon phenda leke:
Me acharav kai gua kai saia leke unllile mai but.
O Jesus phenda leke:
O chachipe phendan.
44Ondaka, o Jesus dikhla pe diskinia ta phenda e Simonoke:
¿Dikhe gale diskinia? Kana diem ande cho cher tu ni diam man pai me porrnenge, a gaia diskinia jalada me porrne pe ausenchar ta sukarda len pe balenchar. 45A tu ni phendan mange sar san ta ni chumidian man, a voi sar kai diem ande cho cher, ni achile te chumidel me porrne. 46Ni thodan pe mo soro zeitino, a voi thoda meriso pe me porrne. 47Goleke phenav chuke kai lako bilachipe kai si but si prostime, soke dia mai but fala. A o manus kai inai but prostime ni del but fala.
48Mapalal phenda e diskiniake:
Cho bilachipe si prostime.
49Ogola llene kai sea gostura kote, phenena iek avereke:
¿Ko si gava, kai llik o bilachipe prostil?
50A o Jesus phenda e diskiniake:
Tu avilan braduime soke pachaian. Lla esmiro.
Currently Selected:
Lukas 7: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
