Lukas 6

E disipulura ikanen lliu ando llive sabado

Mt 12.1-8; Mk 2.23-28

1Iek llive sabado o Jesus phirela maskar o lliu. Ta leke disipulura ikanena lliu ta jana e kuchorra.#Dt 23.25. 2Ondaka nesave fariseura puchle len:

¿Soke cheren so nasti cherdol ando llive sabado?

3O Jesus phenda lenge:

¿Tumen ni chitisarden so cherda o David kana vou ta leke amale sea bokhale? 4Dia ando cher e Devleko ta lia e marrne kai sea chinade e Devleke ta jala ta dia i pe amalen te jan, kana gola marrne saia te jan len samo e popura.#Lv 24.9; 1 S 21.1-6.

5Ta i phenda:

O Chavo e Manuseko si Gazda i po llive sabado.

O Jesus sastarel iekhe nasuale ando llive sabado

Mt 12.9-14; Mk 3.1-6

6Aver llive sabado, o Jesus dia ande khanlliri e judiononengi ta sikavela. Ta andre saia iek manus kai leko va o chacho saia suko ta bango, 7ta e kovacha e zakonoke ta i e fariseura prezona e Jesuse te dikhen dal ka sastarel le ando llive sabado, ta gia te avel len vareso te dosaren le. 8A vou, sar llanela so mislinpe, phenda e lleneke kai saia leko va bango:

Uste ta thov tut po maskaral.

O nasualo ustilo ta thodape pe porrne, 9ondaka o Jesus phenda ogole llenenge:

Ka puchau tumen iek ezgoda:

¿So sai cherdol ando llive sabado:

O lachipe o o bilachipe? ¿Te bradui iek zivoto o te zatri le?

10Dikhla pe sa e llene kai sea truial, ta phenda gole manuseke:

Inzar cho va.

Ta gua manus inzarda po va, ta leko va sastilo. 11A ogola llene jolaile but ta thode te denpe orba te sai cheren vareso bilacho e Jesuseke.

O Jesus esviril e desuduie apostolen

12Ande gola llivesa, o Jesus llelo pe iek burdo te molilpe, ta molisailo e Devleke sorro riat. 13Kana llivosaila, ikharda pe disipulonen ta esvirisarda desuduien lendar, ta thoda lengo anav apostolura. 14Gola llene sea:

O Simon, kai thoda leko anav i Pedro, o Andres, o phlal e Simonoko, o Santiago, o Juan, o Felipe, o Bartolome, 15o Mateo, o Tomas, o Santiago chavo e Alfeoko, o Simon, gua kai phenena leke Selote. 16O Judas, chavo e Santiagoko, ta o Judas Iskariote, gua kai phukada e Jesuse.

O Jesus sikavel bute llenen

Mt 4.23-25

17O Jesus fulisto katar o burdo lenchar ta achilo pe iek bari umal. Chidinailea but llene kai llana pala le ta but llene katar sa e forura e judeake, katar o Jerusalem ta katar o Tiro ta o Sidon kai si pasa e mora. 18Avilea te asunen e Jesuse ta te sastarel len katar lengo nasualipe. Ta i gola kai sea ande lende duura bilache sastona. 19Ta sa e llene mangena te dodin e Jesuse, soke suako lleno kai dodila le sastola pala e zor kai likela letar.

So mol chachimaia angla o Del

Mt 5.1-12

20O Jesus dikhla pe disipulura ta phenda lenge:

Blagosime tumen e chorre, soke tumari si e charoina e Devleki.

21Blagosime tumen kai akana sen bokhale, soke ka achen chalie. Blagosime tumen kai akana roven, soke mapalal ka asan.

22Blagosime te aven tumen kana e llene ka murzin pe tumende, kana ka traden tumen, kana ka kusen tumen kana ka murzin pe tumaro anav sargo kana si iek ezgoda bilachi, pala o Chavo e Manuseko.#1 P 4.14. 23Veselin tumen but, ande gua llive pherdon veselia, soke so si te dobin ando miloso si baro, soke isto gia cherde e profetonenchar lenge phure.#2 Kr 36.16; Ech 7.52.

24A ¡tesko tumenge barvalalen, soke ia saia tumen tumari veselia!

25¡Tesko tumenge kai akana sen chalie, soke ka avel tumenge bok!

¡Tesko tumenge kai akana asan, soke ka roven zalbatar!

26¡Tesko tumenge kana sa e llene ka blagosin tumen, soke isto gia cherena tumare purane e llenenchar kai sea poraukura kojamne!

O volipe pe dusmanura

27A tumenge kai asunen phenav:

Volisaren tumare dusmanonen, cheren o lachipe golenge kai murzin pe tumende, 28blagosisaren golen kai phenen tumenge bilache alava, molintumen pala gola kai kusen tumen. 29Te chalavela tut vareko pe chi cham, thov te chalavel tut i pe o goia. A vareko te lela tutar cho gertachi, muk te inllarel i cho gad. 30A vareko te mangela tutar vareso, de le leke, ta ko lela tutar so si chiro, na mangle letar. 31Cheren e llenenchar isto gia sar mangen te cheren tumenchar.#Mt 7.12.

32Te volina tumen samo e llenen kai si len volipe pala tumende, ¿savi bari ezgoda cheren? I e llene bilache cheren gia. 33A te cheren o lachipe samo e llenenge kai i von cheren o lachipe tumenchar, ¿savi bari ezgoda cheren? I e llene bilache cheren gia. 34A te den unllile samo golen kai mange te le lendar i tu vareso, ¿savi bari ezgoda cheren? I e bilache den pe unllile maskar pete, te len chari iek averetar. 35Tumen morabi te volisaren tumare dusmanonen, ta te cheren o lachipe, ta te na mangen chari kana den unllile, ta gia ka avel baro tumaro chari, ta tumen ka aven chave katar o Del e milosoko, kai si lacho i e llenenchar kai ni den fala ta e bilachenchar. 36Si te avel tumen zalba, sargo i tumaro Dad kai si leke zalba tumendar.

Na chin kris nikake

Mt 7.1-5

37Na krisin averen, ta ni o Del ni ka krisil tumen, na dosaren averen, ta o Del ni ka dosarel tumen. Prostin, ta o Del ka prostil tumen. 38Den averen, ta o Del ka del tumen. Ka del tumen so trubul tumen. Isto gia sar tumen den averen, o Del ka del i tumen.

39O Jesus phenda lenge iek paramichi:#Mt 15.14.

Iek korro nasti inllarel avere korre, soke e dui ka peren ande iek jar. 40Ni iek disipulo ni llanel mai but neko leko kovachi:#Mt 10.24-25; Jn 13.16; 15.20.

Kana ka getol po sikadipe ka avel sargo po kovachi.

41¿Soke dikhe e truña kai si ande che phlaleki iak, a ni dikhe o kas kai si ande chiri iak? 42A te na acharea kai si iek kas ande chi iak, ¿sar phene che phlaleke:

Phlala, muk te ikanav e truña kai si ande chi iak? ¡Manus kojamno san! mai anglal ikan o kas kai si ande chiri iak, ta ondaka ka dikhe sukar te ikane e truña katar e iak che phlaleki.

O kas pinllardol pala pe septelie

Mt 7.17-20; 12.34-35

43Ni iek kas lacho ni del bilache septelie, ni o kas bilacho ni del lache septelie. 44Suako kas pinllardol pala pe septelie, ni ikandon simochine katar e kasta karrnale, ni drakha katar e karrne.#Mt 12.33. 45O manus lacho del orbe lache soke o lachipe si ande leko lio, a o manus bilacho del orbe bilache soke o bilachipe si ande leko lio. Soke o manus del orba katar so mai but si ande leko lio.#Mt 12.34.

E dui chera

Mt 7.24-27

46¿Soke phenen mange tumen, Gazda, Gazda, a ni cheren so phenav tumenge? 47Ka phenav tumenge sar si o lleno kai avel mande ta asunel man a ni cherel so phenav: 48gua lleno si sargo iek manus kai mai anglal anada but te vazdel po cher, ta vazdiale po barr. Kana barili e len, o pai chalada zurale pe gua cher, a ni miskosarda le, soke vazdieale po barr. 49A vareko kai asunel me alava ta ni cherel so phenav, si sargo iek manus kai cherda po cher pe chisai ta ni anada te malavel e phuv zurali. Ta kana e len barili ta chalada zurale ando cher, pelotar ta achilo sa pe kotora.

Currently Selected:

Lukas 6: BACHRO

Highlight

Copy