Levitiko 8
8
O chinadipe katar o Aaron ta leke chaurre
Ek 29.1-37
1O Del dia orba e Moisesea ta phenda leke:
2Le e Aarone ta leke chaurren, ta e patave, ta o zeitino te chinaven o telcho kai delpe kurbano pala o bilachipe, e dui bakre, ta e kotaricha katar e marrne kai ande lende inai levadura, 3ta chide sa e foro katar o Israel angla e chara kai chidiniaon.
4O Moises cherda so o Del phendaia leke te cherel, ta o foro katar o Israel avilo angla e chara kai chidiniaon. 5Ondaka o Moises phenda e israelenge:
Gava si so o Del phenda te cherdol.
6Ondaka o Moises cherda te aven mai pase o Aaron ta leke chaurre, ta jalada len e paiea. 7Mapalal thoda pe lete o fistano, phangla o kavisi ta thoda pe lete o gertachi. Mapalal thoda upral o efod ta phangla le zurale isto e kavisea katar o efod. 8Mapalal thoda upral o pektoral, ta ando pektoral thoda o Urim ta o Tumim. 9Mapalal thoda e mitra upral pe leko soro, ta upral katar e mitra anglal thoda e corona santa sunakuni, gia sar o Del phendaia e Moiseseke te cherel.
10Mapalal o Moises lia o zeitino ta thoda le pe chara e Devleki ta pe sa e ezgode kai si andre, ta chinada len e Devleke. 11Ta e zeitinoia makhla efta droma o altar ta mapalal thoda o zeitino po altar ta pe sa leke ezgode, ta po lelleno ta pe rig kai thodol, te sai chinavel len e Devleke.
12Mapalal thoda o zeitino santo po soro e Aaronoko, ta e zeitinoia chinada le e Devleke. 13Mapalal cherda te aven pase e chaurre e Aaronoke ta thoda pe lende e fistanura, phangla pe lende e kavisura ta thoda pe lende e challa chiteke, gia sar o Del phendaia e Moiseseke te cherel.
14Mapalal cherda te anen o telcho kai delpe pala o bilachipe, ta o Aaron ta leke chaurre thode pe va upral po soro e telchoko kai delpe kurbano pala o bilachipe. 15Ondaka o Moises mundarda le ta o Moises lia o rat, ta makhla pe naiea e singa truial katar o altar, te sai chinavel le e Devleke, ta katar o rat kai achila thoda angla o altar, gia o altar achilo chinado e Delveke te sai kote len o prostipe katar o bilachipe.#Ek 40.9-11.
16Mapalal lia sa e khoi kai ucharel e porra, e khoi kai si upral po buko, e dui bubreskura ta lengi khoi, ta phabarda len sa po altar. 17A o telcho, leki morchi, leko mas ta leke gosnia, phabarda len avri katar o pero, gia sar o Del phendaia e Moiseseke te cherel.
18Mapalal cherda te anen o bakro katar o kurbano, ta o Aaron ta leke chaurre thode pe va upral po soro e bakreko. 19Mapalal o Moises mundarda le, ta e ratea makhla e riga truial upre katar o altar, 20ta chinda e bakre pe kotora. Ta phabarda o soro, e kotora, ta e khoi. 21Mapalal jalada e paiea e porra ta e porrne e bakreke, ta phabarda le sa po altar sargo kurbano phabardo kai khandel sukar e Devleke, gia sar o Del phendaia e Moiseseke te cherel.
22Mapalal o Moises phenda te anen ogole bakre te cheren o zakono katar chinadipe, ta o Aaron ta leke chaurre thode pe va upral po soro katar o bakro. 23Mapalal o Moises mundarda le, lia cherricha rat, ta makhla e Aaroneko kan chacho telorre, ta makhla leko palcho katar leko va o chacho, ta i makhla leko palcho katar leko porrno o chacho. 24Mapalal cherda te aven pase e chaurre e Aaronoke, ta i lenge makhla e ratea lengo kan o chacho telorre, ta o palcho katar lenge va e chache, ta pe lenge palchura katar lengo porrno o chacho. Ta mapalal makhla e ratea e riga truial upre katar o altar.
25Mapalal o Moises lia e khoi, e pori, ta sa e khoi kai ucharel e porra, e khoi kai si upral po buko, e dui bubreskura ta lengi khoi ta e plieska e chachi. 26Ta katar e kotaricha e marrnengi kai ande lende inai levadura kai thodol angla o Del, lia o Moises iek marrno kai inai levadura andele, ta iek marrno cherdo e zeitinoia ta lia iek katar e phalia ta thoda len pasa e khoi ta e plieska e chachi. 27Mapalal thoda sa gala ezgode ande va e Aaronoke ta leke chaurrenge, ta cherda te miskol len sargo e ofrenda kai miskolpe angla o Del.#Ek 29.24. 28Mapalal o Moises lia sa gala ezgode katar lenge va, ta phabarda len upral po kurbano sargo e ofrenda katar o chinadipe kai khandel sukar phabardi ando liubao e Devleke.
29Mapalal o Moises lia o brek e bakreko ta miskosarda le soke si ofrenda kai miskolpe angla o Del. Gua kotor katar o bakro kai delpe pala o chinadipe, saia dino e Moiseseke, gia sar o Del phendaia e Moiseseke te cherel.
30Mapalal o Moises lia cherricha zeitino katar chinadipe ta katar o rat kai saia upral po altar, ta chudia le upral po Aaron, upral pe leke patave, upral pe leke chaurre ta upral pe patave leke chaurrenge. Gia chinada e Devleke e Aarone, leke chaurren ta lenge patave poponenge.
31Mapalal o Moises phenda e Aaronoke ta leke chaurrenge: Chiraven o mas kote katar delpe ande chara kai chidiniaon, ta jan le kote e marrnea kai si ande kotaricha katar o chinadipe, gia sar o Del phenda mange te charav kana phenda:
O Aaron ta leke chaurre ka jan gava mas. 32Mapalal phabaren so achela katar o mas ta katar o marrno. 33Ta efta llive na durion kotar katar delpe ande chara kai chidiniaon, soke gava si o vreme kai cherdol tumaro chinadipe e Devleke. 34O Del phenda kai o zakono te lelpe o prostipe katar o bilachipe kai cherden tumen, morabi te cherdol isto gia sar cherdila allive. 35Goleke tumen morabi te achen ollivesea ta orachaia efta llive kote kai delpe ande chara kai chidiniaon. Kanden so phenda o Del ta ni ka meren, soke gola si e alava kai o Del dia man.
36Ta o Aaron ta leke chaurre cherde sa so o Del phendaia e Moiseseke te cheren.
Currently Selected:
Levitiko 8: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
