Levitiko 6

E kurbanura pala o kojaipe

1O Del dia orba e Moisesea ta phenda leke:

2Kana vareko cherela o bilachipe angla o Del ta achela e ezgodenchar kai die lete te guruven len, ta vou phenela kai ni die lete gola ezgode ta chorela ta kanela orbe kojamne pe llene, 3o kana malavela vareso ta phenela kai ni malada le, o kana jala sovel bange pe varesave katar gala ezgode bilache kai cherel, 4ka avel dosalo pala gua bilachipe. Ta morabi te lacharel e duk kai dia pala pe orbe kojamne kai phenda, ta morabi te iril so chorda o liaia peke pe zor o e ezgode kai diea lete te guruvel, o e ezgode kai maladaia kai sea jasarde, 5o pe varesavi ezgoda kai jala sovel bange, morabi te iril gola ezgode e lleneke kake si gola ezgode, ta ka thovel upral o panllengo katar so liaia kana ka del kurbano pala po bilachipe. 6Ta o kurbano kai ka del e Devle ka avel iek bakro te na avel nasualo, ta tu ka phene so mol, ta vou morabi te anel le katar pi stoka ta te inllarel le kai o popo te avel kurbano pala o bilachipe. 7Ta o popo ka del le kurbano pala le angla o Del, ta gia ka lel o prostipe katar varesavo bilachipe kai cherda.#Nm 5.5-8.

O zakono katar e kurbanura

8O Del dia orba e Moisesea ta phenda leke:

9Phen e Aaronoke ta leke chaurrenge so morabi te cheren katar o zakono katar e kurbanura:

O kurbano morabi te avel upral pe iag phabardi upral po altar sorro riat te sai phabarel le e iag.#Lv 1.3. 10O popo ka thovel pe pete e patave katar o lino, ta e sostea katar lino upral pe pi esnaga, mapalal ka chidel o prajo katar e zivirinia kai phabili upral po altar ta ka thovel o prajo pe iek rig katar o altar. 11Mapalal ka thovel aver patave pe pete ta ka ikanel o prajo avri katar o pero pe iek than jalado.

12E iag ka phabol po altar, nikada morabi te na mundaren la. O popo morabi te thovel kasta suako thiarin ta te lacharel upral pe iag e zivirinia kai ka phabardol, ta ka phabarel upral pe lete e khoi katar e kurbanura pala e pas. 13E iag ka phabol suako drom po altar, ta nikada ni ka mundardol.

O zakono katar e ofrende katar e septelie

14Gava si o zakono katar e ofrende katar e simiche:

E popura ka den la angla o altar, angla o Del. 15Iek katar e popura ka pherel po va katar e arina kai die ta i ka lel katar lako zeitino, ta sa o taimano kai si upral pe ofrenda, ta ka phabarel la upral po altar te sai denpe golli ande khan kai si drago e Devleke. 16Ta so achela katar e ofrenda ka jan la o Aaron ta leke chaurre, bi te avel ande late levadura pe iek than santo, ande bar katar e chara kai chidiniaon. 17Nasti chiraven la ta te thoven ande late levadura. E popura ka jan so achela katar e ofrenda phabardi soke si dine lenge. Gaia ezgoda si but santa, sargo o kurbano pala o bilachipe, ta sargo o kurbano pala e dos. 18Sa e murus katar e chaurre e Aaronoke ka jan latar. Gava ka avel iek zakono ostade tumare porodoke katar e ofrende phabarde e Devleke, varesavi ezgoda kai dodila gaia ofrenda ka achel santa.

E ofrenda e poponenge

19O Del dia orba e Moisesea ta phenda leke:

20Gaia si e ofrenda kai o Aaron ta leke chaurre morabi te den e Devle kana ka aven chinade te aven popura e Devleke: Dui kile katar e mai lachi arina sargo e ofrenda katar e simiche. Dopas thiarinako rano ta o gua dopas pasa racha, ta gia suako llive. 21Morabi te lacharen e ofrenda ande iek chiai amime e zeitinoia, ta mapalal ka anel la phagi pe kotora sargo ofrenda kai khandel sukar e Devleke. 22Gia morabi te lacharel e ofrenda o mai baro popo maskar o porodo e Aaronoko kai si thodo pe leko than. Gaia ofrenda ka avel ostade e Devleke, ta morabi te phabardol sa. 23Sa e ofrende e poponenge ka phabardon sa, ta niko nasti ka jal lendar.

O zakono katar e kurbanura pala o bilachipe

24O Del dia orba e Moisesea ta phenda leke:

25De orba e Aaronoia ta leke chaurrenchar, ta phen lenge: Gava si o zakono katar e kurbanura pala o bilachipe:

E zivirinia kai ka den la kurbano pala o bilachipe morabi te mundaren la angla o Del. Gaia ezgoda si but santa.#Lv 4.1-35. 26O popo kai ka anel o kurbano pala o bilachipe, sai ka jal katar gua kurbano ande bar katar e chara kai chidiniaon. 27Sa so dodila o mas katar o kurbano ka achel santo, a e patave te achen makhle katar o rat, morabi te jaladon po than santo. 28A e kavi barrastuni kai chiradola o mas katar gua kurbano morabi te phagol, a te chiradela ande iek kavi tucheki, samo morabi te mordol ta te jaladol paiea.

29Gava kurbano si santo. Samo e popura sai ka jan letar. 30A nasti ka jalpe ni iek zivirinia kai diape kurbano pala o bilachipe ta kai leko rat inllarde le ande chara kai chidiniaon. Gava kurbano morabi te phabardol ande iag.

Currently Selected:

Levitiko 6: BACHRO

Highlight

Copy