Levitiko 5

Aver kurbanura pala o bilachipe

1Vareko te ikharen le pe iek kris te del orba chachi katar so dikhla o asunda, ta vou te ni kamela te phenel le, vou cherel iek bilachipe ta si dosalo.

2A vareko te dodila vareso pokalime, sargo iek zivirinia muli kai si pokalime, avela zivirinia divi o zivirinia kai zivil e manusenchar, o iek zivirinia kai terrilpe pokalime, ka achel pokalime ta ka avel dosalo, i te na llanela.

3Vareko te dodila vareso melalo kai likista katar e esnaga e manuseki, ka avel pokalime, i te na acharda so cherela.

4A vareko te jala sovel oma te cherel vareso lacho o bilacho, gola sovel kai ni mislinpe, ta ni acharel so cherda ta mapalal acharela so cherda, ka avel dosalo katar gala ezgode.

5Ko avela dosalo katar gala ezgode, morabi te phenel po bilachipe kai cherda 6ta ka del iek busni o iek bakri kurbano pala o bilachipe kai cherda. Sai avel iek bakri o iek busni, ta gale kurbanoia o popo ka lel o prostipe gole lleneke.

7A te na avela le te del iek bakro, morabi te inllarel e Devleke dui tortole o dui gulubura, iek lendar kurbano pala o bilachipe, a o gua sar ofrenda phabardi. 8Morabi te inllarel len kai o popo, ta vou ka del iek lendar sargo kurbano te avel prostime o bilachipe, ka bhagen leki korr a ni ka ikanel leko soro katar leki korr. 9Mapalal ka chordol o rat pe iek rig upre katar o altar ta so ka achel katar o rat ka chordol angla o altar. Gava si kurbano pala o bilachipe. 10A katar o gua ka cherel iek ofrenda phabardi gia sar cherdol. Gia o popo ka lel o prostipe gole lleneke kai cherda o bilachipe ta o bilachipe ka avel leke prostime.

11A te na avela le te chinel dui tortole o dui gulubura, morabi te inllarel dui kile katar e mai lachi arina sargo kurbano pala o bilachipe te avel prostime. Ta ni ka thovel pe late zeitino ta ni upral pe late taimano, soke gava si kurbano pala o bilachipe. 12Morabi te inllarel e arina kai o popo, ta o popo ka lel latar pherdo po va te denpe golli katar o Del, ta ka phabarel la po altar upral pe ofrende kai phabardon ando liubao e Devleko, soke si iek kurbano te len o prostipe katar o bilachipe, 13Gia o popo ka lel o prostipe katar varesavo bilachipe kai cherda gua lleno, ta o bilachipe ka avel prostime ta isto gia sai cherdol katar e ofrende katar e septelie, so achela ka avel e popoke.

E kurbanura katar o bilachipe

14O Del dia orba e Moisesea ta phenda leke:

15Vareko te cherela o bilachipe ta ni acharda so cherda pe ezgode sante e Devleke. Pala po bilachipe kai cherda e Devleke ka anel iek bakro katar pi stoka te na avel nasualo te del le kurbano pala po bilachipe, ta te inllarel le angla o Del. So mol o bkro ando rup, gia sar phariadol ando santuario. 16Gua lleno morabi te pochinel po bilachipe kai cherda pe ezgode sante, a o panllengo katar so dela ka del kai o popo. Mapalal, e bakrea kai delpe kurbano pala o bilachipe, o popo ka lel o prostipe katar o bilachipe gole lleneke, ta o bilachipe ka avel prostime.

17A vareko te cherela varesavo bilachipe kai o zakono e Devleko phenel te na cheren, i kana gua lleno ni acharda so cherela, ka avel dosalo ta ka inllarel pi dos. 18Goleke morabi te lel katar pi stoka iek bakro te na avel nasualo, ta tu ka phene so mol ta ka inllarel le kai o popo sargo kurbano pala o bilachipe, ta gia te lel o prostipe katar o bilachipe kai gua lleno cherda, i kana ni acharela so cherda ta o bilachipe ka avel prostime. 19Gava si iek kurbano pala o bilachipe, soke gua lleno si dosalo angla o Del.

Currently Selected:

Levitiko 5: BACHRO

Highlight

Copy