Levitiko 17

O edino santuario

1O Del dia orba e Moisesea ta phenda leke:

2Phen e Aaronoke ta leke chaurrenge, ta sa e israelenge, kai o Del phenda gala ezgode te cheren:

3Varesavo israelita kai mundarela iek guruv, iek bakro o iek busni, ando pero o avri katar o pero, 4ta te na anela le kote katar delpe ande chara kai chidiniaon te del le ofrenda e Devleke angla o santuario, ka avel dosalo katar o rat kai peradol, ta goleke morabi te traden le katar tumari phuv. 5Gava si te sai e israelitura den e Devle e zivirinie kai mundaren ande umalia, te sai anel len kai o Del kote katar delpe ande chara kai chidiniaon, te ka del len kai o popo te sai o popo del len kurbano pala e pas e Devleke. 6Ta o popo ka chudel o rat upral po altar e Devleko, kote katar delpe ande chara kai chidiniaon, ta ka phabarel e khoi sargo e khan kai si drago e Devleke. 7Ta nikada ios ni ka denpe kurbanura gole llavolonenge, kai von blagosisarde, kai pala lende von kurvisaile. Gava ka avel iek zakono ostade tumenge sa e bursenchar.

8Ta i ka phene lenge kai vareko katar e israelitura, o o lleno kai si katar aver phuvia ta kai zivil maskar tumende, te dela kurbano phabardo, o iek kurbano, 9ta te na inllarela le kote katar delpe ande chara kai chidiniaon te del le e Devleke, ka traden le katar tumari phuv.

O zakono te na jan rat

10Vareko katar e israelitura o katar e llene kai si katar aver phuvia kai zivin maskar tumende, jala varesavo rat me ka joliaivav gole llenea kai jala rat, ta ka tradav le katar tumari phuv.#Jen 9.4; Lv 7.26-27; 19.26; Dt 12.16,23; 15.23. 11Soke o zivoto e maseko ando rat si, ta me diem le te cheren kurbano upral po altar pala tumaro zivoto, ta isto o rat cherdol kurbano pala o lleno.#Ebr 9.22.

12Goleke phenav e israelenge: Niko tumendar, ni e llene kai si katar aver phuvia kai zivin maskar tumende morabi te na jan rat. 13Varesavo israelita o lleno kai avel katar aver phuvia kai zivil maskar tumende, te istarela iek zivirinia o iek chirikli kai sai jalpe, morabi te peravel lako rat ta te ucharel gua rat e chikaia. 14Soke o zivoto katar suako mas si leko rat. Goleke phendem tumenge te na jan rat, soke o zivoto katar suako mas si leko rat, ta vareko te jala le ka avel tradino katar tumari phuv.

15A kana iek israelita o iek lleno kai avel katar aver phuv jala mas katar iek zivirinia muli kai chindala pe kotora iek zivirinia divi, gua lleno morabi te jalavel pe patave ta pi esnaga e paiea, ta ka achel pokalime lligo ni ka perel e riat. Mapalal ka achel chisto. 16A te na jalavela pe patave ta pi esnaga e paiea, ka inllarel po bilachipe.

Currently Selected:

Levitiko 17: BACHRO

Highlight

Copy