Levitiko 13

O zakono katar e lepra

1O Del dia orba e Moisesea ta e Aaronea, ta phenda lenge:

2Kana vareko avela le pe leki esnaga suvlipe, phunia o parrniol leko mas ta phunia kai dikhon sargo lepra, morabi te inllaren le kai o popo o Aaron, o kai iek katar leke chaurre kai si popura. 3O popo morabi te dikhel e phunia kai si pe le ki esnaga. A e bal kai si pe phunia te cherdile parrne, ta o mas kai si nasualo te llelotar mai andre ando mas, gua si kai si e lepra. Mapalal kana o popo dikhela gole lleneko mas nasualo ka phenel kai si pokalime.

4A o parrnipe kai si pe leko mas te na avela mai andre neko leko mas, ta leke bal te na cherdile parrne, ondaka o popo ka phandel gole llene nasuale efta llive. 5Pala e efta llive pale ka dikhel le, ta leko mas te avela pale nasualo ta te na barila gua nasualipe pe ios katar leki esnaga, pale ka phandel le ios efta llive. 6Pala e efta llive ka dikhel le pale, ta te avelape kai leko nasualipe katar leko mas lel te llaltar ta ni barila ios pe leki esnaga, ondaka o popo ka phenel kai o nasualo achilo chisto ta kai saia samo iek nasualipe minono katar leko mas. Ondaka o nasualo ka jalavel pe patave ta ka achel chisto.

7A gua nasualipe katar leko mas te bariola ios pe leki esnaga mapalal kana o popo dikhla le ta phenda kai vou si chisto, morabi te llal pale kai o popo te sai dikhel le. 8Kana o popo dikhela kai leko nasualipe katar leko mas ios mai barilo pe leki esnaga, ondaka ka phenel kai vou si pokalime, soke si nasualo katar e lepra.

9Kana iek lleno si leko mas nasualo katar e lepra, morabi te inllaren le kai o popo. 10O popo ka dikhel le, ta o suvlipe katar o mas te avela parrno ta pala gua nasualipe e bal cherdile parrne, ta te dikhola o mas putardo ando suvlipe, 11gua si kai o nasualipe si e lepra kai suako drom avel po mas. O popo morabi te phenel kai gua lleno si pokalime, ta inai soke te phandel le, soke si pokalime.

12Gava nasualipe katar e lepra te bariola but oma, ta te resela te ucharel e porrne llik kai o soro, llik so sai resela te dikhel o popo, 13o popo ka dikhel le, ta e lepra te ucharda sa leki esnaga, o popo ka phenel kai gua lleno si chisto, soke e lepra cherdili parrni ta vou achilo chisto. 14A o llive kai sikadola o mas ialo pe lete ka achel pokalime. 15Ondaka o popo ka dikhel o mas putardo ta ka phenel kai vou si pokalime, soke o mas putardo si pokalime, gua si e lepra.

16A te avelape kai o mas putardo cherdola pale parrno, o nasualo morabi te llal kai o popo 17te sai dikhel le, ta o popo te dikhela kai o nasualipe e maseko cherdilo parrno, ka phenel kai o nasualo achilo chisto, soke ia achilo chisto.

18Kana vareko te avela le iek phunie po mas, ta te sastola, 19ta te achela iek suvlipe parrno, ta o mas te achela parrno o lolo gua lleno morabi te llal kai o popo. 20A o popo te dikhla kai o mas kai si nasualo si mai andre katar o gua mas, ta kai e bal cherdile parrne, ondaka ke phenel kai gua lleno si pokalime, soke gua nasualipe si e lepra. 21A o popo te dikhla kai o mas nasualo inai le ni iek bal parrno, ta kai o mas nasualo inai mai andre katar o gua mas, ta kai sa polokorre sastol, ondaka ka phandel gole llene efta llive. 22A o nasualipe te bariol ios po mas, ondaka o popo ka phenel kai gua lleno si pokalime, soke leko nasualipe pe leki esnaga si e lepra. 23A leko nasualipe maseko te na bariol, ondaka gua si samo leko chindepe po mas katar leko nasualipe, ta o popo ka phenel kai vou si chisto.

24Kana vareko avela le iek phabardipe iagako pe po mas, iagako, ta o mas kai sastilo iagatar avela iek parrnipe, lolo o parrno, 25o popo ka dikhel, ta e bal te cherdile parrne ta o mas kai achilo makhlo katar o phabardipe si mai andre katar o gua mas, gua si e lepra kai likisti po phabardipe, goleke o popo ka phenel kai si pokalime soke o nasualipe katar leko mas si e lepra. 26A te dikhela o popo kai inai ni iek bal parrno po mas nasualo, ta kai leko nasualipe inai mai andre neko o gua mas, ta kai sa poloke sastol, ondaka ka phandel gole llene efta llive. 27Pala e efta llive o popo te dikhela kai leko nasualipe bariol pe leko mas, ondaka o popo ka phenel kai gua lleno si pokalime, soke leko nasualipe maseko si e lepra. 28A te avelape kai leko nasualipe maseko kai si makhlo ni bariol pe leko mas ta sa poloke sastol, ondaka inai mai but katar iek suvlipe katar o phabardipe. Ondaka o popo ka phenel kai gua lleno nasualo si chisto, soke si samo o makhlipe kai achila katar o phabardipe.

29Kana iek murus o iek diskinia si le iek chindipe po soro o pe po mui, 30o popo ka dikhel o chindipe. Ta o chindipe te avela mai andre katar o gua mas ta si le bal galbene ta cherricha bal, ondaka o popo ka phenel kai gua lleno si pokalime, soke gua si e lepra e soreki ta e muieki. 31A o popo te dikhela kai o nasualipe katar o mas inai mai andre katar o gua mas, ta ande gua mas inai bal kale, o popo ka phandel gole nasuale efta llive, 32ta pala e efta llive o popo ka dikhel o mas o nasualo, ta te dikhela kai gua mas nasualo ni barilo, ta inai mai andre katar o gua mas, ta inai bal galbene ande gua mas nasualo, 33ondaka o popo ka phenel leke te rrandelpe, a na pe goia rig katar o mas kai si nasualo, ta ka phandel le efta llive ios. 34Ta kana ka nakhen gola efta llive, pale o popo ka dikhel o mas nasualo, ta te dikhela kai o nasualipe katar leko mas ni barila ta inai andre ando o gua mas, ondaka o popo ka phenel kai gua lleno nasualo si chisto, ta gua lleno ka jalavel pe patave ta ka achel chisto. 35A te avela kai gua nasualipe maseko bariola i te phendaia o popo kai vou si chisto, 36o popo morabi te dikhel pale gole llene nasuale, ta leko nasualipe katar o mas te bariola, ni ka avel soke te rodel bal galbene. Gua lleno si pokalime. 37A o popo te mislila kai leko nasualipe maseko achila, ta kai likista bal kale, gua si kai leko nasualipe maseko sastilo ta gua lleno si chisto. Ondaka o popo ka phenel kai gua lleno si chisto.

38Kana iek murus o iek diskinia liken pe lenge esnage but parrnipe, 39o popo ka dikhel lengo mas, ta te dikhla kai pe lengo mas likista but parrnipe ta nesavo makhlipe kalo, gua si kai likista lenge sargo iek ller po mas, te avelape gia, gua lleno si chisto.

40A iek lleno te perena leke bal ta te achela jalo, vou si chisto. 41A leke bal anglal te perena ta achela jalo anglal, vou si chisto. 42A te likela pe leko mas iek parrnipe ta lolipe pe riga kai inai le bal palal katar leko soro o anglal, gua si kai kote thoda te likel e lepra. 43Ondaka o popo ka dikhel le, ta o suvlipe katar leko mas pe riga kai inai le bal si parrno ta lolo, isto gia sar dikhol e lepra po mas katar e esnaga, 44gua si kai gua lleno si nasualo katar e lepra, mapalal o popo ka phenel kai gua lleno si nasualo katar e lepra ta ka phenel kai si pokalime, soke pe leko soro si e phunia.

45A o leproso te si phunia pe liki esnaga, morabi te thovel pe pete patave pharrade ta puchardo leko soro, ta pe muiea uchardo ka urkil: ¡Pokalime! ¡Pokalime! 46Ta so avela pe lete gua nasualipe ka avel iek lleno pokalime, ta ka zivil korkorre avri katar o pero.

47Kana pe iek patave likela o nasualipe katar e lepra, te avena e patave cherde katar e morchi bakrengi o katar o lino, 48o ande iek khuvdipe katar o lino, o katar e morchi e bakrengi, o ande iek morchi, o pe varesavi ezgoda cherdi katar e morchi, 49ta o nasualipe pe gola ezgode si zelene o lole, gua si o nasualipe katar e lepra, ta morabi te sikadol e popoke. 50O popo ka dikhel o nasualipe pe gola ezgode ta ka phandel efta llive gola ezgode kai pe lende si o nasualipe. 51Pala e efta llive ka dikhel o nasualipe ta te barila pe patave o po khuvdipe, o ande vareso cherdo katar e morchi, gua si e lepra, iek nasualipe bilacho ta gola ezgode si pokalime. 52Goleke varesavi ezgoda kai si gua nasualipe pe late, morabi te phabaren la sa, soke si e lepra, iek nasualipe bilacho. 53A o popo te dikhela kai gua nasualipe ni barila pe gola ezgode, 54ondaka o popo ka phenel te jalaven kote kai si o nasualipe, ta ka phandel gola ezgode efta llive ios.

55Mapalal kana o makhlipe katar o nasualipe jaladola, o popo ka dikhel, ta te dikhla kai o makhlipe katar o nasualipe ni llelotar, gua si kai si pokalime ta goia ezgoda morabi te phabardol, i te avela kai gua nasualipe ni barilo, soke si cherno, i te avela andral o avrial. 56Kana ka dikhel gua nasualipe o popo, te dikhela kai o nasualipe llelotar kana jalade le, ka chinel cua makhlipe katar e patave, o katar e morchi o katar o khuvdipe. 57A te avela pale gua nasualipe ta te bariola pe patave o po khuvdipe o pe varesavi ezgoda morchaki, ka phabardol goia ezgoda kai si pe late gua nasualipe. 58A katar e patave, o khuvdipe o vareso cherdo katar e morchi, kai letar liape gua nasualipe kana jalade le, ka jaladol pale ta ondaka ka achel chisto.

59Gava si o zakono katar e lepra kana si pe patave cherde katar e morchi o katar o lino, o katar o khuvdipe o katar e ezgode cherde katar e morchi, te sai phendol o si chisto o pokalime.

Currently Selected:

Levitiko 13: BACHRO

Highlight

Copy