Juan 18
18
Phanden e Jesuse
Mt 26.47-56; Mk 14.43-50; Lk 22.47-53
1Kana o Jesus phenda gala ezgode, llelotar pe disipulonenchar pe o goia rig katar o pai kai ikhardola Sedron, kote saia iek vostano, ta o Jesus dia andre pe disipulonenchar. 2Ta i o Judas leko dusmano, pinllarela gua than soke kote but droma o Jesus chidinailoa pe disipulonenchar. 3Ondaka o Judas avilo bute boñikonenchar ta sudonenchar katar e mai preche popura ta fariseura. Ta avena lacharde te marempe ta anena kasta phabarde. 4A o Jesus sar llanela so saia te avelpe, llelo lende ta puchla len:
¿Ka roden?
5Von phende leke:
E Jesuse katar o Nazaret.
O Jesus phenda lenge:
Me sem.
O Judas kai pukhadaia le, saia lenchar 6Kana o Jesus phenda lenge: Me sem, diepe palpale ta peletar pe phuv. 7O Jesus pale puchla len:
¿Ka roden?
A von pale phende:
E Jesuse katar o Nazaret.
8O Jesus pale phenda lenge:
Phendem tumenge kai me sem. Te roden man, muken te llantar gala llene.
9Gua phenda le te cherdol so phendaia vou: Dade, katar gola kai dian man ni jasardem ni iekhe. 10Ondaka o Simon Pedro kai saia le iek jarni, ikandale ta chinda o kan iekheko kai ikhardola Malko kai saia esluga katar o mai baro popo. 11O Jesus phenda e Pedroke:#Mt 26.39; Mk 14.36; Lk 22.42.
Guruv cho jarni. So dia man te nakhav mo Dad, ¿tu misi kai ni ka nakhav le?
O Jesus angla o Anas
Mt 26.57-58; Mk 14.53-54; Lk 22.54
12Ondaka e boñikura, o tribuno, ta e sudura katar o cher e Devleko istarde e Jesuse ta phangle le. 13Mai anglal inllarde le angla o Anas, soke saia o sastro e Kaifaseko, kai saia o mai baro popo gua burs. 14O Kaifas saia gua kai phendaia e judionenge kai avela mai lache lenge te merel samo iek lleno pala sogo si o foro.#Jn 11.49-50.
O Pedro phenel kai ni pinllarel e Jesuse
Mt 26.69-70; Mk 14.66-68; Lk 22.55-57
15O Simon Pedro ta aver disipulo liepe pala o Jesus. Gale disipulo pinllarela le o mai baro popo, goleke dia andre e Jesusea ando cher e Anaseko; 16A o Pedro achilo avri po udar, goleke o disipulo kai pinllarela e mai bare popo avilo ta dia orba e diskiniaia kai arakhela o udar ta cherda te nakhel o Pedro. 17Ondaka voi kai arakhela o udar phenda e Pedroke:
¿I tu san iek katar e disipulura gale lleneke?
O Pedro phenda:
Iok, inai sem.
18Cherela sil, ta e esluge ta e sudura thodea iag ta kote achena pasa e iag. Ta i o Pedro tatola lenchar pasa e iag.
O mai baro popo puchel e Jesuse
Mt 26.59-66; Mk 14.55-64; Lk 22.66-71
19O mai baro popo puchla e Jesuse cheres leke disipulura ta i so sikavela. 20O Jesus phenda leke:
Me diem orba e suetoke angla sa. Suako llive sikadem ande khanllira e judionenge ta i ando cher e Devleko kote kai chidiniaon sogo si e judiura. Niso ni phendem po chorial. 21¿Soke puche man? Puch golen kai asunde cheres so phendem lenge. Von llanen so phendem.
22Kana o Jesus phenda gava iek katar e llene kai arakhena o cher e Devleko kai saia kote chalada le po mui, ta phenda leke:
¿Gia phene e mai bare popoke?
23O Jesus phenda leke:
Te phendem bilache, phen ande so si o bilachipe. A te phendem sukar, ¿soke chalave man?
24Ondaka o Anas bichalda le phanglo kai o Kaifas, o mai baro popo.
O Pedro pale phenel kai ni pinllarel e Jesuse
Mt 26.71-75; Mk 14.69-72; Lk 22.58-62
25A i o Pedro saia kote pe porrne ta tatola pasa e iag. Ondaka puchle le:
¿Tu san katar leke disipulura?
A vou phenda:
Inai sem.
26Mapalal iek katar e esluge e mai bare popoke kai saia bariardo katar gua kai o Pedro chindaia leko kan, phenda leke:
¿Ni dikhlem tut me ando vostano lea?
27Ta o Pedro pale phenda kai iok, ondaka baslo o basno.
O Jesus angla o Pilato
Mt 27.1-2,11-14; Mk 15.1-5; Lk 23.1-5
28Inllarde e Jesuse katar e Kaifaseko cher kai o than e krisako. Saia rano a von ni die andre ando than e krisako te na achen melale soke saia te jan pe Paskua. 29Ondaka o Ponsio Pilato likisto lende ta phenda lenge:
¿Ande so gava lleno si dosalo?
30Von phende leke, te na aviloa bilacho ni andama le tute.
31O Pilato phenda lenge:
Len le tumen ta krisisaren le prema tumaro zakono.
Von phende leke:
Amen nasti mundara nika. 32Gia cherdilo o alav kai phendaia o Jesus: Sar saia te avel leko meripe.#Jn 3.14; 12.32.
33O Pilato pale dia ando than e krisako ikharda e Jesuse ta puchla le:
¿San tu o charo e judionengo?
34O Jesus phenda leke:
¿Tu tutar phene gava, o soke aver phendele chuke?
35O Pilato phenda leke:
¿So sem me, judio? Chi phuv ta e mai preche popura die tut mande. ¿So cherdan?
36O Jesus phenda leke:
Mi charoina inai gale suetoki. Te avilaia gale suetoki me esluge mardeape te na phanden man, A mi charoina inai katar.
37O Pilato puchla le:
¿Gua si kai de istina san charo?
O Jesus phenda leke:
Tu phendanle: Me sem charo. Me pala gava biandilem te phenav so si o chachipe. Suako lleno kai si e chachimako, asunel mo avazi.
38O Pilato phenda leke:
¿So si o chachipe?
O Jesus krisime te merel
Mt 27.15-31; Mk 15.6-20; Lk 23.13-25
Kana phenda gava o Pilato pale avilo kai e judiura, ta phenda lenge:
Pe gava lleno me ni malavav ni iek bilachipe. 39A tumen sen sikade te mukliarav iekhe pe Paskua: ¿Mangen te mukliarav tumenge o Charo e judionengo?
40Ondaka saurre pale ando baro avazi urkisarde:
¡Gale iok! ¡Muk e Barrabase!
A o Barrabas saia chor.
Currently Selected:
Juan 18: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
