Juan 17
17
O Jesus molilpe pala pe disipulura
1Kana phenda gala ezgode, o Jesus vazdia pe akha karing o miloso ta phenda:
Dade, o vreme avilo: Blagosisar che Chave, te sai blagosil tut i vou. 2Soke thodan tala leko va suako manuse, te del zivoto ostade sa golen kai dian le. 3O zivoto ostade si te pinllaren tut, o edino Del chachuno, ta i e Jesukristo gole kai bichaldan.
4Me blagosisardem tut ando sueto, cherdem e buchi kai dian man te cherav. 5Akana, Dade, blagosisar man pasa tute, gole blagosimaia kai saia man tuia mai anglal te cherdol o sueto.
6Golen kai esvirisardan katar o sueto, sikadem cho anav. Chire sea, ta dian len mange, ta von cherde so phenen che alava. 7Akana llanen kai sogo phendan mange avel tutar. 8Soke e alava kai dian man, me diem len, ta von lie len. Llangle kai de istina avilem tutar ta pachaie kai tu bichaldan man.
9Me moliv man pala lende. Ni moliv man pala o sueto, ta pala gola kai dian man, soke chire si. 10Sogo si murno, chiro si. Ta so si chiro, si murno, ta mi dragostia si ande lende.
11Me ni sem ios ando sueto, a von si ando sueto ta me llau tute. Dade Santo, arak len ande cho anav, te aven iek gia sargo amen. 12Kana me sema lenchar ando sueto arakhava len golen kai dian len mange arakhlem len ta niko lendar ni jasailo samo o chavo jasardimako, te cherdol so si ando Pisipe.#Sal 41.9; Jn 13.18.
13Akana llau tute ta phenav gava ando sueto, te avel lenge isto goia veselia pherdi kai si man. 14Me diem len che alava, a o sueto murzil pe lende, soke von inai e suetoke, sargo me kai inai sem e suetoko. 15Me ni moliv man te le len katar o sueto, me mangav te arakhe len katar o bilachipe. 16Isto gia sargo me kai inai sem e suetoko i von inai e suetoke. 17Blagosisar len ande cho chachipe. Cho alav si chachipe. 18Gia sar tu bichaldan man ando sueto, isto gia me bichaldem len ando sueto. 19Ta pala lende me blagosiv isto me man, te sai aven i von blagosime ando chachipe.
20Me ni moliv man samo pala gala llene, me moliv man pala gola kai si te pachan ande mande kana ka asunen lengo alav. 21Te aven saurre ande iek than sargo tu, Dade, san ande mande a me ande tute, te aven i von iek amenchar, te sai pachal o sueto kai tu bichaldan man. 22E dragostia kai dian man, me diem len te sai aven iek, gia sar amen sam iek: 23me ande lende, a tu ande mande te aven de istina iek te sai llanel o sueto kai tu bichaldan man, ta kai voli len sargo kai voli man. 24Dade, tu dian len mange, a me mangav te aven manchar kote kai ka avav me te dikhen o blagosipe kai dian man, soke volisardan man mai anglal te cherdol o sueto. 25Dade chacho, o sueto ni pinllarda tut, A me pinllardem tut, a gola llanen kai tu bichaldan man. 26Cherdem te llanen ko san tu, ta ka cherav te pinllaren tut ios, te sai o volipe kai si tut pe mande i te avel lenchar ta me ande lende.
Currently Selected:
Juan 17: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
