Jenesis 50
50
1Ondaka o Jose abrasisarda e esnaga pe dadeki, ta rovindo chumidia le. 2Mapalal phenda e doktorenge kai radina leke te lacharen leke dadeki esnaga e Israeleki, ta gia cherde le. 3Ta cherde le ande saranda llive soke ande gola llivesa trubulpe te cheren le. Ta e ejipsiure tradie o zalosno pala o Israel eftavardes llivesa. 4Ta kana nakhle gola llivesa katar o zalosno, o Jose dia orba e llenenchar kai radin ando cher e Faraonoko, ta phenda lenge:
Te volisarden man, cheren mange iek sebapi te phenen e Faraonoke 5kai mo dad mai anglal te merel cherda te jav leke sovel te prajou le isto ando limori kai vou lachardaia peke, kai si ande phuv katar o Kanaan. Goleke me molivman chuke, muk man te llav te prajou me dade, ta kana ka prajou le, ka iriu man.#Jen 47.29-31.
6A o Faraon phenda leke:
Lla te prajosar che dade, gia sar vou manglale tutar.
7Ondaka o Jose llelo te prajol pe dade, ta llele lea sa e llene kai radina e Faraonoke, e phure katar leko cher ta sa e phure katar e phuv katar o Ejipto, 8ta i lleli e familia e Jakobeki, e Joseeki, ta leke phlal. Ande phuv katar o Gosen mukle samo e minonen, pe bakren ta pe guruven. 9Ta i llana e Joseea llene pe bordona ta pe gra, ta o sueto kai llala saia but baro. 10Kana avile kai e umal katar o Atad, kai si pe ogoia rig katar o Jordan, o Jose guruda efta llive zalosne pe dadeke, ta sa gola llene rovde bare zaoia leko meripe.
11Kana e kananeura kai zivina ande goia phuv dikhle sar rovena e ejipsiura, phende:
Prema sar roven mula lenge iek lleno but baro maskar lende. Goleke e umal katar o Atad thode lako anav Umal katar e ausa e ejipsionenge.
12Ta leke chaurre cherde lea gia sar vou phendaia lenge te cheren. 13Goleke inllarde le ande phuv katar o Kanaan, ta prajosarde le ando limori kai si anado ande umal katar e Makpela. Goia umal kai chindaiala o Abraam katar o Efron o jitita te cherel la limori si pasa o vos katar o Mamre.#Jen 23.19-20. 14Kana prajosarda pe dade, o Jose irisailo ando Ejipto pe phlalenchar ta sa e llenenchar kai llelea lea.
E phlal e Joseeke
15Kana o Jakob mulo, e phlal e Joseeke phende:
Sai avelpe kai akana o Jose ka murzil pe amende, ta ka ikanel pi joli pe amende pala sa o bilachipe kai cherdam leke. 16Ondaka bichalde te phenen e Joseeke, gala alava:
Mai anglal te merel cho dad, phenda amenge te chera iek ezgoda, 17te phena chuke gala alava: Moliv man chuke, mangav tutar te prosti o bilachipe che phlalengo, kai gia bilache sea tuia. Goleke moli amen chuke prostisar amaro bilachipe, soke sam sluge e Devleke o Del che dadeko. Kana e llene phenena leke gaia orba o Jose rovela. 18Ondaka leke phlal llele te dikhen le, ta bangile angla lete lligo lengo chikat dodisarda e phuv, ta phende leke:
Akana amen san che sluge.#Jen 37.5-11; 42.6.
19A o Jose phenda lenge:
Na daran kai me ni sem po than e Devleko. 20Tumen mislisailen te cheren mange o bilachipe, a o Del parruda gua bilachipe ando lachipe te cherel so allive dikha: Te sai braduil o zivoto bute llenengo. 21Goleke na daran. Me ka dav tumen te jan ta i tumare chaurren. Gia o Jose dia len zor, soke dia lenchar orba bare volimaia.
O meripe e Joseeko
22O Jose achilo te zivil ando Ejipto sa e familiaia leke dadeki. Ta zivisarda stotina ta des burs. 23Ta reslo te dikhel e paraonukonen e Efraineke. Ta i e chaurren katar o Makir chaurro e Manaseseko, ta o Jose bariada len pe pe changa.
24Iek llive o Jose phenda pe phlalenge:
Cherricha vreme ios me ka merav. A o Del ka avel te pomozil tumen ta ka cherel te irin tumen kai e phuv kai sovlienchar phenda kai ka del la e Abraameke, e Isaakeke ta e Jakobeke. 25Ondaka o Jose cherda e chaurre e Israeleke te jan leke sovel ta phenda:
Chachimaia o Del ka avel te pomozil tumen. Kana ka avenpe gala ezgode, tumen morabi te inllaren me kokala katar.#Ek 13.19; Jos 24.32.
26O Jose mulo ando Ejipto kana saia leke stotina ta des burs. Leki esnaga lachardela ta thodela ando sanduko ando Ejipto.
Currently Selected:
Jenesis 50: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
