Eksodo 1
1
O Israel nakhel bare dukha ando Ejipto
1Kana o Jakob avilo ando Ejipto, avilo pe chaurrenchar. Suako chaurro avilo pe familiaia. Gala si lenge anava:
2O Ruben, o Simeon, o Levi, o Juda, 3o Isakar, o Zabulon, o Benjamin, 4o Dan, o Neftali, o Gad, ta o Aser. 5Ta sa o porodo kai likista katar o Jakob sea eftavardes llene. A o Jose zivila ando Ejipto.
6Nakhlo o vreme, ta mulo o Jose ta i sa gola llene kai avilea ando Ejipto. 7A sar e chave katar o Israel avila len but chaurre, lengo porodo cherdilo but baro ta zuralo. Ta ande sa o Ejipto sea e israelitura.
8Nakhlo o vreme, ta vazdinailo aver charo kai ni llanela so cherdaia o Jose pala o Ejipto, ta phenda pe foroke:
9Dikhen, o foro katar o Israel si mai but neko amen ta mai zuralo amendar, 10goleke morabi te chera fiso te na barion ios, soke sai avelpe kai amen te mara amen avere phuviaia, von sai thovenpe ande iek than amare dusmanonenchar te marenpe amenchar, ta ka llantar katar amari phuv.
11Ondaka te sai thoven len ando lallao, thode llenen te sai gazdarin pe lende ta te cheren len te radin but zurale. Ta cherde len te vazden o foro katar o Piton ta o Rameses. Ande gola forura o charo guruvela jape. 12A so mai but dukhavena len, von sa mai bariona. Goleke e ejipsiura but darana katar e israelitura.
13Ta suako drom sea mai bilache lenchar ta cherena len te radin but zurale. 14Ta cherkiarde lengo zivoto bare radoia, thode len te cheren glibo, te cheren chikle ta te cheren suako rado ande umalia. Ta pe sa gala radura silnonape pe lende ta cherena len te radin pe zor. 15Ta i o charo dia orba duie diskinienchar kai sea ebree. Von sea kai pomozina e diskinien katar o Israel te maladon lenge e minone. Iek lendar ikhardola Sifra, a ogoia ikhardola Fua. Ta phenda lenge:
16Tumen kana ka pomozin e diskinien ebree te maladon lenge, dikhen dal si murus o diskinia. Te biandola diskinia, muken la te zivil. A te biandola lenge iek murus, ¡Mundaren le!
17A e Sifra ta e Fua darana katar o Del, ta ni kandie e charo ta mukle te zivin e minonen. 18Ondaka o charo bichalda te ikharen len ta puchla len:
¿Soke muklen e minonen te zivin?
19A e dui diskinie phende leke:
Eke, e diskinie katar o Israel inai sargo e diskinie ejipsie. Von si gia zurale ta saste kai maladon lenge minone korkorre mai anglal te ava amen te pomozi len.
20A o Del arakhla gole duie diskinien, ta o foro barilo ta zurailo but. 21Ta sar gola diskinie daraile e Devletar, o Del mukla te avel len but minone ta te bariol lengi familia. 22Ondaka o Faraon phenda sa pe foroke so te cheren, ta phenda:
Chuden ando pai sa e minonen katar o Israel kai ka biandon te sai tason, a e minonen kai si diskinie muken len te zivin.#Ech 7.19.
Currently Selected:
Eksodo 1: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
