Jenesis 30

1Kana e Rakel dikhla kai voi nasti dela minone e Jakobe, istarda murzania pe pi phiorri, ta phenela e Jakobeke:

De man chaurre, soke te na me ka merav.

2A o Jakob jolailo laia ta phenda lake:

¿A so me sem o Del? Vou si kai ni mukel te aven tut minone.

3Ondaka voi phenda leke:

Dik, sov me slugaia e Bilaia, ta lake ka maladol pe me changa, ta gia ka avel sargo kana mange maladila latar.

4Gia e Rakel dia e Jakobe pe sluga e Bila. Ta o Jakob sovto laia. 5Ta e Bila achili khamni ta dia iek minono e Jakobe. 6Ondaka e Rakel phenda:

Gava minono ka ikhardol Dan, soke o Del asunda mo molipe ta cherda mange kris, goleke dia man iek minono.

7Mapalal e Bila achili pale khamni, ta dia aver minono e Jakobe, 8ta e Rakel phenda:

Gava minono ka ikhardol Neftali, soke e marimaia Devlikani marde man me phiorraia, ta dobisardem.

9A kana e Lea dikhla kai nasti avena la ios minone, lia pe sluga e Zilpa ta dia la e Jakobeke, te sai avel leki diskinia. 10Ta kana e Zilpa bianda ta dia iek minono e Jakobe, 11e Lea phenda:

¡Savi baj! Goleke o minono ka ikhardol Gad.

12Mapalal e Zilpa e sluga e Leaki, achili khamni ta dia aver minono e Jakobe. 13Ondaka e Lea phenda:

¡Savi veselia! Akana e diskinie ka phenen kai sem veseli. Goleke o minono ka ikhardol Aser.

14Iek llive llelo o Ruben ando vostano kana chidiniaol o lliuv, ta malada mai but septelie kai ikhardon mandragoras, ta inllarda len kai pi dei e Lea. Kana e Rakel dikhla e septelie phenda e Leake:

Moliv man chuke, de man katar e mandragoras kai cho chaurro anda chuke.

15A e Lea phenda lake:

¿A so inai chuke but kai lian me rrome, ta i mange te le e mandragoras me chaurreke? Ondaka phenda e Rakel:

Te dian man gala septelie che chaurreke, gaia riat o Jakob ka sovel tuia.

16Orachaia kana o Jakob irilape katar e umalia, e Lea avili lete ta phenda leke:

Gaia riat ka sove manchar soke diem me chaurreke mandragoras te sai muken man te sovav tuia. Ta goia riat o Jakob sovto e Leaia. 17Ta o del asunda e Lea, ta achili khamni ta maladila lake lako panchto minono kai dia e Jakobe.

18Ondaka e Lea phenda:

Gava minono ka ikhardol Isakar, soke o Del dia man so te dobiu, soke diem me rrome me sluga.

19Mapalal e Lea achili pale khamni ta maladila lake lako sovto minono kai dia e Jakobe. 20Ta phenda:

O Del dia man iek sukar ezgoda. Akana mo rrom ka volil man mai but, soke diem le sov chaurre. Goleke gava minono ka ikhardol Zabulon.

21Mapalal maladila lake iek minoni kai thoda lako anav Dina. 22A o Del diape golli katar e Rakel ta o Del asunda lako molipe, ta dia la te aven la minone. 23Kana biandilo lako purvo minono phenda:

O Del ikanda o lallao kai nasti avena man minone. 24Ta thoda leko anav Jose ta phenda:

Te del man o Del aver minono.

E joli maskar o Jakob ta o Laban

25Ondaka kana e Rakel bianda e Josee, o Jakob phenda e Labaneke:

Muk man te iriv man kai mi phuv. 26De man me chaurren ta me rromien, soke pala lende radisardem tuia, ta muk man te llautar, soke tu llane sar radisardem chuke.

27A o Laban phenda leke:

Moliv man chuke, achi manchar. Me llanglem kai cheres tu o Del blagosisarda man. 28Phen mange pe gachin mange te pochinav chuke, ta me ka pochinav.

29Ondaka o Jakob phenda leke:

Tu mai llane sar radisardem chuke, ta sar arakhlem che zivirinien.

30Soke kana avilem tute tut ni saia tut but ta akana si tut but, soke sar kai avilem o Del blagosisarda tut, ¿a kana ka radiu me mange ta me porodoke?

31O Laban pale phenda leke:

¿Pe gachin mange te pochinav chuke? O Jakob phenda leke:

Na pochin mange niso. Me pale ka arakhav che bakren te cherea so ka mangav tutar: 32Muk man te nakhav allive maskar che bakre, te thovav pe iek rig sa e bakrorren kale ta sa e busnia makhle. Von ka aven mo pochindipe. 33Gia mai angle kana ka ave te dikhe so dobisardem, isto tu ka dikhe kai sem chacho, soke maskar me zivirinie o maskar me busnia, te na avena makhle o maskar e bakre te na avena kale, gua si kai ogola zivirinie chordem len tutar.

34Ondaka o Laban phenda:

Te avelpe gia sar phene tu.

35Ta isto ande gua llive o Laban thoda pe iek rig e busnen makhle, ta sa golen kai sea makhle ande fisie. A sa gola kai saia len vareso parrno ta sa e bakre kale, dia len kai pe chaurre te sai arakhen len. 36Mapalal llelotar gale bakrenchar pinda kilometrura kotar katar saia o Jakob, a o Jakob arakhela ogole bakren e Labaneke.

37A o Jakob chinda kastorra zelene katar o alamo, katar o almedro, ta katar o kastaño, ta jaliarda len te sai dikhol e fisie parrne e kastenge. 38Mapalal thoda e kastorra jale angla e zivirinie kote kai piena pai e bakre, ta kote von aminape maskar pete ta achena khamne. 39Ta kote maladona e bakrenge angla e kastorra, bakre makhle. 40Ondaka o Jakob thovela pe iek rig e bakren, a gola kai sea makhle ta kale, thovela len pe aver rig pire bakrenchar te na aven e bakrenchar kai sea e Labaneke. 41Ta kana e bakre mai thule lela len te thovenpe ande iek than te avel len minone, o Jakob thovela e kastorra angla e bakre kote kai avena te pien pai, te sai dikhen e kastorra kana von thovenape ande iek than. 42A kana avena e bakre mai suke, vou ni thovela e kastorra, goleke e bakre mai suke sea e Labaneke, a e mai thule sea e Jakobeke. 43Ta gia o Jakob but barvalio ta avila le but bakre, ta i sluge diskinie, ta i sluge murusa, ta i deve, ta magarchura.

Currently Selected:

Jenesis 30: BACHRO

Highlight

Copy