Jenesis 29
29
O Jakob ando Jaran
1O Jakob pale thoda te llal pe po drom ta llelo kai e llene kai zivin pe rig katar likel o kham.
2Ta ande goia umal dikhla iek bunari ta trin stoke bakrenge kai sea pasa o bunari, soke katar gua bunari piena e zivirinie, ta upral pe lete saia iek barr. 3Ta chidena sa e stoke, ta ikanena o barr kai saia upral po bunari te sai den te pien e bakren ta mapalal thovena pale o barr upral po bunari: 4Ondaka o Jakob phenda e chobanonenge:
Phlalalen, ¿katar sen tumen? Von phende leke:
Amen sam katar o Jaran.
5O Jakob phenda lenge:
¿Pinllaren tumen e Labane, o chaurro katar o Najor? Von phende:
Ea, pinllara le. 6O Jakob phenda lenge:
¿Sar si sastimaia? E chobanura phende:
Ea, vou si sasto. Dik kote avel leki chorri e Rakel pe bakrenchar. 7Ondaka o Jakob phenda lenge:
Ollivesea si ta rano te phanden e bakren, ¿soke ni den len pai ta inllaren len te jan char?
8Von phende leke:
Nasti cherale, morabi te adurichara te chidiniaon sa e stoke ta e chobanura te ikanen o barr kai si upral po bunari, te sai da te pien e bakren.
9So vou dela orba lenchar, e Rakel avili pe dadeke bakrenchar, soke voi saia kai arakhela len. 10Ta avilape kai samo kana o Jakob dikhla e Rebeka, e chorri katar o Laban, o phlal katar leki dei ta dikhla e bakre katar o Laban, ikanda o barr kai saia upral po bunari, ta dia te pien e bakren. 11Mapalal chumidia e Rakela ta thoda te rovel. 12Ta kana o Jakob phenda lake kai vou saia o phlal lake dadeko ta kai saia chavo katar e Rakel, ondaka e Rakel llelitar prastindo ta phenda pe dadeke sa so nakhlaia.
13Kana o Laban asunda cheres o Jakob o chaurro leke pheako, llelo prastindo te lel le ta abrasisarda le ta chumidia le ta inllarda le kai po cher, ta mapalal o Jakob phenda leke sa so nakhlaia. 14A o Laban phenda leke:
Chachimaia tu san iek katar mo rat, ta o Jakob achilo lea iek chon.
O Jakob radil pala e Rakel ta pala e Lea
15Ondaka o Laban phenda e Jakobeke:
Tu ni ka radi mange samo gia, samo soke san mo sinoucho. Phen mange pe gachin mange te pochinav chuke.
16O Laban saia le dui chorra, e mai purani ikhardola Lea, a e mai terni ikhardola Rakel. 17E Lea saia la iek akha sukar, a e Rakel saia but sukar. 18A o Jakob volila e Rakela, ta phenda:
Pala chi chorri e Rakel e mai terni, ka radiu chuke efta burs.
19Ondaka o Laban phenda:
Mai sukar te dav la chuke neko avere lleneke, achi manchar.
20Ta gia o Jakob radisarda e Labaneke efta burs pala e Rakel, a Jakobeke ni saia leke but vreme soke but volila la. 21Ta kana nakhle e efta burs, o Jakob phenda e Labaneke:
De man akana e Rakela te ziniuman laia soke getosailo o vreme kai phendem te radiu chuke te sai laula.
22Ondaka o Laban chidia sa e llenen katar gua than, ta vazdia o biav. 23Ta kana peli e riat o Laban inllarda kai o Jakob pe chorra e Lea, ta o Jakob sovto laia. 24Ta o Laban dia pe chorra iek sluga kai ikhardola Zilpa, te sai pomozil la. 25Thiarinako rano llangla o Jakob kai sovtoia e Leaia, ta phenda e Labaneke:
¿So si gava kai cherdan mange? ¿Ni ratisardem chuke pala e Rakel? ¿A soke kojadan man?
26A o Laban phenda leke:
Kate ni cherdol gia, ni delpe e mai terni te zinilpe mai anglal neko e mai purani. 27Akana achi te nakhen e efta llive katar o biav e Leako, ta mapalal ka da tut e Rakela, te achea manchar po alav kai ka radi mange efta burs ios.
28O Jakob mangla, ta kana getosaile e efta llive katar o biav e Leako, o Laban dia le pe chorra e Rakela te avel leki rromi. 29Ta o Laban dia i e Rakela iek sluga piri kai ikhardola Bila, te sai pomozil la. 30O Jakob sovto i e Rakelaia, ta volisarda la ios mai but neko e Lea. Ta o Jakob saia te radil efta burs ios e Labaneke.
E chaurre e Jakobeke
31Kana o Del dikhla kai o Jakob ni thovela sama e Leake, cherda te aven la minone. A e Rakela nasti avena la minone. 32E Lea achili khamni ta maladila lake iek minono, ta thoda leko anav Ruben, soke phenda:
O Del dikhla mi zalba, akana mo rrom ka volil man.
33Mapalal avila la aver minono, kai thoda leko anav Simeon, ondaka phenda:
O Del dikhla kai ni thovena mange sama, goleke dia man aver minono.
34Mapalal avila la aver chaurro, ta thoda leko anav Levi, soke phenda:
Akana mo rrom ka avel mai but manchar, soke diem le trin chaurre.
35Ta mapalal e Lea avila la aver minono, ta thoda leko anav Juda, soke phenda:
Akana ka blagosiv e Devle. Ta mapalal katar gala ezgode ni avila la ios minone.
Currently Selected:
Jenesis 29: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
