Jenesis 26

O Isaak llaltar ando Gerar

1Ande gua vreme ni saia so te jan ande sa goia phuv, isto gia sar saia ande llivesa e Abraameke. Goleke o Isaak llelotar ando Gerar, kote kai zivila o Abimelek, o charo katar e filisteura. 2Ta kote o Del sikadilo leke, ta phenda leke:

Na lla ando Ejipto. Achi ande phuv kai me ka phenav chuke, 3ta zivisar ande gaia phuv. Me ka avav tuia ta ka blagosiv tut, soke tut ta che porodo ka dav sa gala phuvia. Gia ka cherav e alava kai phendem che dadeke e Abraameke. 4Ka cherav cho porodo te avel pe gachin sargo e cheraia kai si ando miloso, ta i ka dav len sa gala phuvia, ta sa o sueto e phuviako ka aven blagosime katar cho porodo, 5soke o Abraam asunda mo avazi ta cherda sa so phendem leke, ta kandia sa me alava ta me zakonura.

6Ondaka o Isaak achilo te zivil ando Gerar, 7ta kana e llene kai zivina kote puchle le cheres e Rebeka, o Isaak darailo te phenel lenge kai voi saia leke rromi, ta phenda lenge kai voi saia leki phiorri, soke e Rebeka saia gia sukar kai o Isaak mislisailo kai e llene kotar ka mundarel le cheres late.

8Nakhlo o vreme ta vou achilo kote. A iek llive kana o Abimelek, o charo katar e filisteura, dikhela katar e penllerava, dikhla kai o Isaak malmila pe rromia e Rebeka. 9Ondaka bichalda te ikharen le, ta phenda leke:

Akana llanav kai voi si chi rromi, ¿A soke phendan kai voi si chi phiorri? A o Isaak phenda leke:

Me mislisailem kai ka mundaren man cheres late.

10A o Abimelek phenda leke:

¿Soke cherdan amenge gava? Cherricha mai but ta vareko katar o foro sai sovtoia che rromiaia, ta tu sai andana pe amende o bilachipe.

11Ondaka o Abimelek dia pe po foro ta phenda:

Vareko te cherela varesavo bilachipe gale lleneke o leke rromiake, ka merel.

12Ande gua burs o Isaak thoda ande phuv simiche ta chidia stotina droma mai but neko so thodaia ande phuv, soke o Del blagosisarda le. 13Gia o Isaak cherdilo but barvalo ta avilale but ezgode. 14Sea le pe gachin bakre, guruva, ta pegachin sluge, kai e filisteura jolaile lea. 15Ta kana leko dad o Abraam zivila, leke sluge e Abraameke putardea bunaria, a mapalal e filisteura phanglea len ta pherdea len chik. 16Ondaka o Abimelek phenda e Isaakeke:

Llatar katar, soke cherdilan mai barvalo neko amen.

17Ta o Isaak llelotar kotar, ta inzarda pi chara ande bari umal katar o Gerar, ta kote achilo te zivil. 18Ta putarda pale e bunaria paieke kai putardea kana leko dad zivila ta kai e filisteura phanglea kana leko dad muloa, ta thoda lenge isto gola anava kai thodaia lenge leko dad. 19A kana e sluge e Isaakeke anade ande goia bari umal, malade iek bunari kai likel pai llundo. 20E chobanura kai arakhena e bakren ando Gerar mardepe e chobanonenchar kai arakhena e bakre e Isaakeke, ta phenena:

Gava pai si amaro. Goleke o Isaak ikharda gua pai Maripe, soke mardeape pala o pai. 21Mapalal leke sluge putarde aver bunari, ta i pala gua bunari mardepe, goleke o Isaak thoda o anav katar gua bunari Sitna.

22O Isaak llelotar dur kotar, ta putarda aver bunari, ta sar ni mardepe pala le, thoda leko anav Rejobot, soke phenda:

Akana o Del mukla amen te llal amenge sukar ande gaia phuv.

23Ta kotar o Isaak llelotar ando Berseba. 24Ta ande goia riat o Del sikadilo leke ta phenda leke:

Me sem o Del che dadeko e Abraameko.

Na dara, me sem tuia.

Cheres mo sluga o Abraam

ka blagosiv tut ta ka bariarav but cho porodo.

25Ondaka o Isaak vazdia iek altar kote ta balagosisarda o anav e Devleko, ta kote vazdia pi chara ta leke sluge putarde iek bunari ande gua than.

O Isaak ta o Abimelek achen pe iek orba

26Iek llive o Abimelek avilo katar o Gerar te del orba e Isaakea. Llana lea leko amal o Ausat, ta o Fikol, kai saia o kapitan katar leke boñikura. 27A o Isaak phenda lenge:

Tumen murzin pe mande, ta dradien man katar tumari phuv, ¿a pala so aven te dikhen man?

28Von phende leke:

Amen dikhlam kai o Del si tuia, ta mislisailam te acha tuia pe iek orba. Ta gaia si e orba: 29Tu te na chere amenge nisavo bilachipe, soke amen ni cherdamle chuke. So amen cherdam chuke si o lachipe ta bichaldam tut ande pas, ta akana o Del blagosil tut.

30Ondaka o Isaak thoda lenge bari sinia, ta von jale ta pile. 31Thiarinako rano ustile ta jale sovel iek avereke. Mapalal o Isaak mukla len te llantar, ta von lleletar ande pas lea.

32Isto ande gua llive, e sluge e Isaakeke avile te den le e viasta kai malade pai ando bunari kai putarena. 33O Isaak thoda o anav katar gua bunari Seba. Goleke gua foro llik akana ikhardol Berseba.

34Kana o Esau saia leke saranda burs, zinisailo e Juditaia chorri katar o Beeri o jitita, ta i zinisailo e Basemataia, kai saia chorri katar aver jitita kai ikhardola Elon. 35Gala dui diskinie tristosarde o zivoto e Isaakeko ta e Rebekako.

Currently Selected:

Jenesis 26: BACHRO

Highlight

Copy