Jenesis 25

O porodo katar o Abraam ta e Setura

1 Kr 1.32-33

1O Abraam avila le aver rromi kai ikhardola Setura. 2Ta e chaurre kai avila le laia si gala:

O Zimran, o Joksan, o Medan, o Madian, o Isbak, ta o Suaj. 3O Joksan saia o dad katar o Seba ta katar o Dedan. O porodo kai likista katar o Dedan si gala:

O Asurim, o Letusim, ta o Leumim. 4E chaurre katar o Madian sea gala:

O Efa, o Efer, o Janok, o Abida, o Elda. Sa gaia vicha likisti katar e Setura. 5Ta o Abraam dia e Isaake sa so saia le. 6A e chaurren kai saia le ogole diskinienchar, o Abraam dia len nesave ezgode. Ta kana saia llundo fulada len katar po chaurro, ta bichalda len dur katar o Isaak karing likel o kham.

O meripe e Abraameko

7O Abraam zivisarda stotina ta eftavardes ta panch burs. 8Ta mulo phurimatar ta thode le pe foroia. 9Ta leke chaurre o Isaak ta o Ismael prajosarde le ande iek putardipe kai si ande pechina ande Makpela, kai si angla o Mamre, ande umal katar o Efron, o chaurro katar o Sojar o jitita. 10Gaia si e umal kai o Abraam chindaia katar e jititura, kote prajosarde e Abraame leke rromiaia e Saraia.#Jen 23.3-16. 11Mapalal kana mulo o Abraam, o Del blagosisarda e Isaake, ta o Isaak zivisarda pasa o bunari kai ikhardol Gua kai zivil ta dikhel man.

O porodo e Ismaeleko

1 Kr 1.28-31

12Gava si porodo kai likisto katar o Ismael o chaurro e Abraameko ta e Agarako, e sluga ejipsia e Saraki, 13gala si e anava katar leke chaurre katar o mai purano llik kai o mai terno:

O purvo kai biandilo saia o Nebaiot, mapalal o Sedar, o Adbeel, o Mibsam, 14o Misma, o Duma, o Masa, 15o Jadar, o Tema, o Jetur, o Nafis, ta o Kedma. 16Gala si e anava katar e desudui chaurre katar o Ismael, ta isto gale anavenchar ikhardile e thana kote kai zivina ta i lenge pere. Ta suako iek gazdarila pe po foro.

17O Ismael saia leke stotina ta tranda ta efta burs ta mulo, ta prajosarde le leke puranenchar. 18Leko porodo beslo ande phuv kai si maskar e Javila ta Chur angla o Ejipto, o drom kai llal ande Asiria. Ta kote mulo angla sa pe phlal.

Biandol o Jakob ta o Esau

19Gava si o porodo e Isaakeko, o chaurro e Abraameko. 20O Isaak saia leke saranda burs kana zinisailo e Rebekaia, kai saia chorri katar o Betuel ta phiorri katar o Laban o arameo, kai zivila ando Padan Aram. 21E Rebeka nasti avena la minone, ta o Isaak molisailo e Devleke pala la. Ta o Del asunda leko molipe ta e Rebeka achili khamni. 22A voi llangla kai ka aven la dui minone soke e minone marenape ande lako lli, ta voi phenda:

Te si te avelpe gia, ¿soke ka ziviu me? Ondaka lleli te puchel e Devle, 23ta o Del phenda lake gia:#Ro 9.12.

Ande cho lli si dui phuvia,

dui forura kai marenpe

mai anglal te biandon.

Iek ka avel mai zuralo neko o gua,

o mai purano ka avel tala o va e mai terneko.

24Kana getosaile e llivesa te maladol lake, avila la bisniakura. 25O purvo kai biandilo, leko mas saia lolo ta leki esnaga saia pherdi bal, goleke thode leko anav Esau. 26Mapalal biandilo leko phlal, istardo katar e kukui katar o porrno pe phlalorreko o Esau, ta thode leko anav Jakob. O Isaak saia leke sovardes burs kana maladila e Rebekake.

O Esau bichinel po liubao kai delpe e chave e mai purane

27E dui minone barile, o Esau saia leke drago te istarel zivirinie ta te zivil ande bare umalia, a o Jakob saia iek lleno but esmiro ta zivila ande chare. 28A o Isaak mai volila e Esaue soke saia leke drago te jal katar e zivirinie kai istarela, a e Rebeka volila mai but e Jakobe.

29Iek llive kana o Jakob chiravela, o Esau irisailoa but chinio katar e umalia, 30ta phenda e Jakobeke:

Moliv man chuke, de man te jav katar gua jape lolo kai cherdan, soke merav bokhatar. Goleke e Esaue ikharenale Edom.

31A o Jakob phenda:

Bichin mange allive o liubao te avav o chavo o mai purano.

32Ondaka o Esau phenda:

Dikhe kai merav bokhatar, a te merava, ¿soke ka trubul man o liubao kai sem o chavo mai purano?

33O Jakob phenda leke:

Ja mange sovel isto akana, ta o Esau jala leke sovel ta bichinda so saia te lel sar o phlal o mai purano.#Ebr 12.16. 34Ondaka o Jakob dia e Esaue marrno ta zumi kai cherdaia katar e lenteje. Kana o Esau jala ta pila, ustilo ta llelotar. Gia si sar o Esau ni chitisailo leke so saia te lel sar o phlal o mai purano.

Currently Selected:

Jenesis 25: BACHRO

Highlight

Copy