Jenesis 21

Biandol o Isaak

1Isto gia sar o Del phendaia, e Sara achili khamni, 2ta e Sara achili khamni ta dia iek minono e Abraame ande po phuripe, ando vreme kai o Del phendaia lake.#Ebr 11.11. 3Ta o Abraam thoda e minoneko anav kai e Sara dia le, Isaak. 4Ta pala e ojto llive kai biandilo o Isaak o Abraam cherda leke e sirkunsision, gia sar o Del phendaia leke te cherel.#Jen 17.12; Ech 7.8. 5Ta o Abraam saia leke stotina burs kana biandilo leko minono o Isaak. 6Ondaka e Sara phenda:

O Del cherda man te asav, ta vareko te asunela, ka asal manchar. 7¿Ko phendaia e Abraameke kai me ka dav te piav kolin minonen? A me diem le iek minono ande leko phuripe.

E Agar ta o Ismael si tradine katar o cher e Abraameko

8Ta o minono o Isaak barilo. Ta o llive kai e Sara ni dia le ios te piel kolin, o Abraam cherda iek bari slava. 9A e Sara dikhla kai o chaurro kai diaia e Agar e ejipsia e Abraame, marela espurnia katar o Isaak lako chaurro. 10Ondaka lleli kai o Abraam ta phenda leke:

¡Trade katar gole sluga ta lake chaurre! soke mo chaurro o Isaak ni ka fulavel o barvalipe kai si te lel.#Gl 4.29-30.

11Gaia orba dukhada but e Abraame cheres leko chaurro. 12Ondaka o Del phenda e Abraameke:

Na brigisao katar cho chaurro ni katar chi sluga, ta sa so ka mangel tutar e Sara cherle, soke chi vicha ka avel katar o Isaak.#Ro 9.7; Ebr 11.18. 13A i katar e vicha katar che slugako chaurro ka cherav te avel iek bari phuv, soke si cho chaurro.

14Thiarinako rano o Abraam dia kai e Agar marrno ta iek morchi paiea, ta thoda le pe lake zea, ta dia late e minone e Ismaele ta tradia la. A voi llelitar ta phirela po pusto katar o Berseba, a ni llanela kai llala. 15Ta kana ni achila la ios pai ande morchi, thoda e minone telal tala iek kastorro, 16ta lleli te besel na but dur katar o minono soke phenela:

Ni kamam te dikhav e minone sar ka merel. Ondaka o minono thoda te rovel bare avazea.

17Ta o Del asunda o avazi e minoneko kai rovela, ta katar o miloso o suecho e Devleko ikharda e Agare ta phenda lake:

¿So si chuke Agar? Na dara, soke o Del asunda o roipe e minoneko kote kai si. 18Lla ta vazde e minone, ta istar le e vastetar, soke me ka cherav te likel letar iek bari phuv.

19Ondaka o Del cherda te dikhel iek bunari paieko. Voi lleli ta pherda e morchi pai, ta dia te piel e Ismaele. 20Ta o Del pomozila e minone, ta vou barilo, ta saia but lacho te chudel e llide e arkoia. 21Ta vou zivisarda ando pusto katar o Paran, ta leki dei zinisarda le iekhe diskiniaia katar o Ejipto.

O Abraam ta o Abimelek achen pe iek orba

22Avilape isto ande gua vreme kai o Abimelek llelo te del orba e Abraamea ta llelo lea o Fikol, o mai baro katar leke boñikura. A o Abimelek phenda e Abraameke:

Amen dikha kai o Del pomozil tut pe sa so chere.#Jen 26.26. 23Goleke ja mange sovel po Del isto kate, kai tu ni ka chere o bilachipe mange, ni me chaurreke, ni me unukoke. Ja mange sovel kai gia sar me sema lacho tuia, isto gia tu ka ave lacho e llenenchar katar gaia phuv kai tu zivi.

24Ta o Abraam jala leke sovel.

25A o Abraam phenda leke kai leke ni pela drago so cherde e sluge katar o Abimelek, soke liea katar o Abraam iek bunari. 26A o Abimelek phenda:

Me ni llanav ko cherda gaia ezgoda ta tu ni phendan mange niso, ta me iakom allive asundem le.

27Ondaka o Abraam lia bakre ta guruva, ta dia len kai o Abimelek. Ta isto gua llive e dui achile pe iek orba. 28A o Abraam thoda efta bakre pe iek rig, 29goleke o Abimelek puchla le:

¿Soke thodan gala efta bakria pe iek rig?

30A o Abraam phenda:

Gale efta bakrienchar kai dav tut, si te llane kai me cherdem gava bunari.

31Goleke gua than ikharda le Berseba, soke kote e dui jale sovel.

32Ta kana von achile pe orba ando Berseba, o Abimelek ta o Fikol, o mai baro katar leke boñikura, irisaile kai e phuv katar e filisteura. 33Ta kote o Abraam thoda ande phuv te bariol iek kas, ta kote blagosisarda e Devleko anav o Gazda o Del o ostade. 34Ta o Abraam zivisarda but burs ande phuv katar e filesteura.

Currently Selected:

Jenesis 21: BACHRO

Highlight

Copy