Eksodo 5
5
O Moises ta o Aaron den orba e Faraonoia
1Mapalal katar gala ezgode, o Moises ta o Aaron llele kai o Faraon ta phende leke:
Gia phenda o Gazda, o Del katar o Israel:
Muk te llal me foro po pusto, te sai cherel kote iek slava mange.
2A o Faraon phenda:
¿A ko si o Del? ¿Me te kandav le? ¡Me ni pinllarav ni iek Del e israelengo, ta ni ka mukav e israelen te llantar!
3Ondaka von phende:
O Del katar e ebreura avilo te maladol amenchar, goleke ka lla po pusto, ta ka lla trin llive, ta kote ka da kurbanura e Gazda amare Devle, te na avel pe amende nasualimaia o jarniea.
4Ondaka o charo katar o Ejipto phenda lenge:
Moises ta Aaron, ¿Soke achaven e foro te na radin? ¡Irin tumen kai tumaro rado!
5Ta i phenda lenge o Faraon:
Akana kai si pe gachin israelitura ande phuv, ¿Tumen ka cheren len te na radin?
6Ta isto ande gua llive phenda o Faraon e llenenge kai gazdarina po rado:
7Katar angle, na den char suki e israelen te cheren chikle, gia sar cherdola, ¡Akana te llan isto von te chiden la! 8Ta mangen lendar te cheren isto gola chikle kai cherena omanglal. ¡Ni iek mai cherra! Von si iek lenura, ta goleke urkin: ¡Aven da kurbanura amare Devle! 9Goleke cheren len te radin mai zurale gole llenen. Thoven len te radin ta gia te na thoven sama e alavenge kojamne.
10E llene kai gazdarina po rado llele te phenen e israelenge:
O Faraon mukla gala alava te cherdon: Te na den tumen ios char suki te cheren chikle.
11Akana isto tumen morabi te llan te roden char suki ta te chiden la kote kai tumen malavena la. A na pala gua ni ka cheren isto pe gachin chikle kai omanglal die tumen te cheren.
12Ondaka o foro rispisailo pe sa e phuv katar o Ejipto te roden char suki, te thoven la po than katar e char suki kai dena len omanglal. 13Ta e llene kai gazdarina po rado sigarena len, ta phenena:
¿Sar ni arachi ni allive ni cherden isto gola chikle kai omanglal die tumen te cheren? 14Ta e llene kai gazdarina po rado, marena e llenen katar o Israel kai sea thode te cheren e foro te radil ta phenena:
¿Soke ni arachi ni allive nasti cherden isto gola chikle kai omanglal cherena?
15Ta e israelitura kai sea thode te cheren e foro te radil, avile kai o Faraon ta phende leke:
¿Soke chere gia che slugenchar?
16Amen ni den char suki, ta i mangen amendar te chera chikle, ta i maren amen. ¡E dos si pe llene kai si tala cho va!
17A o Faraon phenda lenge:
¡Tumen sen iek lenura! Goleke phenen:
Aven te da kurbanura e Devle. 18¡Llan te radin! Ni ka den tumen ios char suki, isto gia morabi te cheren isto gola chikle kai cherena omanglal.
19Ondaka e llene israelitura kai sea thode te cheren e foro te radin achile but brigime, kana phende lenge kai saia te cheren ande iek llive isto gola chikle kai cherena omanglal. 20Kana lleletar katar o Faraon maladile e Moisesea ta e Aaronea, kai aduricharena len, 21ta phende lenge:
O Del te dikhel so tumen cherden ta te dukhavel tumen. Soke tumen cherden o Faraon ta e llene kai radin leke te istaren pe kabor joli pe amende, kai isto tumen thoden o jarni ande lenge va te mundaren amen.
O molipe e Moiseseko
22Ondaka o Moises phenda e Devleke molimaia:
Devla, ¿Soke dukhave gale foro? ¿Pala so bichaldan man? 23Sar kai avilem te dav orba e Faraonoia ande cho anav, vou ios mai dukhada che foro, a tu ni cherdan niso te bradui len.
Currently Selected:
Eksodo 5: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
