Eksodo 4

1Ondaka o Moises phenda e Devleke:

Von ni ka pachan man ta ni ka thoven mange sama, ta ka phenen:

O Del ni sikadilo chuke.

2Ondaka o Del phenda leke:

¿So si ande cho va? O Moises phenda:

Iek rovli. 3O Del phenda leke:

Chude la tele. O Moises chudia la tele, ta isto kote e rovli cherdili sap, ta o Moises nasela latar, 4ondaka o Del phenda leke:

Akana inzar cho va ta istar la e poriatar. O Moises inzarda po va ta kana istarda la, cherdili pale rovli. Ondaka o Del phenda leke:

5Gaia ezgoda si te pachan kai sikadilo chuke o Del, o Gazda che puranengo, o Del e Abraameko, o Del e Isaakeko ta o Del e Jakobeko. 6Ta i phenda leke o Del:

Akana thov cho va ande cho brek. O Moises thoda po va ande po brek, ta kana ikanda po va, dikhla kai leko va saia nasualo katar e lepra ta parrno sargo o iv. 7Ondaka o Del phenda leke:

Thou pale cho va ande cho brek.

Ta o Moises cherda le, ta kana ikanda pale po va katar po brek, leko va saia sasto sargo sa leki esnaga.

8Mapalal o Del phenda leke:

A te na pachaie tut e purvo ezgodaia kai ka dikhen, ta te na thode chuke sama, ondaka ka pachan tut e duito ezgodaia kai ka dikhen.

9A te na pachaie tut ta te na thode chuke sama gale dui ezgodenchar, ikan pai katar e len ta chor le pe phuv. A o pai kai ka ikane katar e len kana ka pherel pe phuv, ka cherdol rat.

10Ondaka o Moises phenda:

¡Tesko mange Devla, soke me ni llanav te dav orba sukar! Soke suako drom kana dav orba achadol mi chib, goleke niko ni thovel mange sama. Gava si mange sar kai sema minono.

11A o Del phenda leke:

¿A ko dia o mui e manuse? ¿O ko cherda e nemave ta e kasuke, e llene kai dikhel ta e korre? ¿Ni sem me o Del?

12Akana tu lla, kai me ka avav tuia kana ka de orba, ta ka sikavav tut so te phene.

13A o Moises phenda:

¡Ioi Devla, molivman chuke, bichal avere llene!

14Ondaka o Del jolailo e Moisesea, ta phenda leke:

¡Etalo kate cho phlal o Aaron o levita! Me llanav kai vou del orba but sukar. Ta vou ka avel te maladol tuia, ta ka veselilpe but kana ka dikhel tut.

15De orba lea, ta phen leke sa so si te phenel, a me ka avav lea ta tuia kana ka den orba, ta ka sikavav tumen so te cheren. 16Tu ka de orba e Aaronoia sargo kana me dav orba lea, a o Aaron ka phenel e foroke so tu ka phene leke. 17Inllar gaia rovli, soke laia ka chere bare ezgode.

O Moises irilpe ando Ejipto

18O Moises irisailo kote kai saia leko sastro o Jetro, ta phenda leke:

Morabi te iriu man ando Ejipto, kote kai si e llene katar mi vicha. Mangav te dikhav dal zivin. O Jetro phenda leke:

Lla, lla ande pas.

19Kana o Moises saia ando Madian, o Del phenda leke:

Irisao ando Ejipto soke mule sa gola kai mangena mundaren tut.

20Ondaka o Moises lia pe rromia ta pe chaurren, thoda len pe iek magarcho ta irisailo ando Ejipto. Ta lia ande po va e rovli e Devleki. 21Ondaka o Del phenda e Moiseseke:

Kana ka ave ando Ejipto, thov sama te chere angla o Faraon e bare ezgode kai diem tut ande che va te chere. A me, ka zuriavav leko lio, ta vou ni ka mukel te llal e foro. 22Ondaka ka phene e Faraonoke:

Gia phenel o Del:

O Israel si mo chaurro o mai purano. 23Me phendem chuke te muke te likel me chaurre, te llal te blagosil man, a sar tu ni muklan le, me ka mundarav che chaurre e mai purane.#Ek 12.29.

24A po drom kai llala o Moises ta leki familia, achile pe iek rig te nakhen e riat, a o Del llelo te maladol e Moisesea ta mangela te mundarel le. 25Ondaka e Sefora lia iek churi barreki ostri, ta chinda e morchi pe chaurreki ta thoda la kai leke porrne, ta phenda:

Chachimaia, tu san mange iek rrom rateko.

26Ondaka o Del mukla te llal e Moisese. A e Sefora phenda kai o Moises saia iek rrom rateko cheres e sirkunsision.

27A o Del phenda e Aaronoke:

Lla po pusto te malado e Moisesea. Ta o Aaron llelo ta malada e Moisese po burdo e Devleko, ta kana dikhla le chumidia le. 28Ondaka o Moises phenda e Aaronoke sa e ezgode kai o Del phendaia leke te phenel, ta e bare ezgode kai phendaia leke te cherel. 29Mapalal llele e dui te chiden e phuren katar o Israel, 30ta o Aaron phenda lenge sa so o Del phendaia e Moiseseke. Ta o Moises cherda angla e llene e bare ezgode kai o Del phendaia leke te cherel.

31Ta o foro pachaia, kana asunde kai o Del thoda lenge sama ta kai dikhla lengi duk. Ondaka die changa ta blagosisarde e Devle.

Currently Selected:

Eksodo 4: BACHRO

Highlight

Copy