Eksodo 39
39
Cherdon e patave e poponenge
Ek 28.1-43
1Cherde e patave te sai radilpe ando santuario. Cherdelen katar o chiti vuneto purpura ta lolo, ta i gia cherdile e patave sante e Aaronoke, gia sar phendaia o Del e Moiseseke te cherel.
2Ta i cherde o efod cherdo katar o sunakai, ta chititar vuneto purpura, lolo ta lino bangardo. 3Ta marde kotora sunakai, ta chindelen sargo thava te suvenlen ando chiti vuneto, purpura, lolo ta lino, ta cherdelen but sukar. 4Ta thode po efod dui kavisura phangle pe leke dui riga. 5O kavisi kai llala upral po e fod te sai istarel le, saia cherdo isto gia: Sunakuno, chitetar vuneto purpura, lolo ta lino bangardo, gia sar o Del phendaia e Moiseseke te cherel.
6E barra katar e kornalina thodelen pe kotora sunakune e anavenchar katar e chaurre katar o Israel, cherde sargo e sellura. 7Mapalal o Bezalel thoda len pe kavisura kai llan pe dume katar o efod, te sai denpe golli e chaurre katar o Israel, gia sar o Del phendaia e Moiseseke te cherel.
8I o pektoral saia cherdo katar iek suvtipe but sukar sargo o efod: Sunakuno, chitetar vuneto, chiti lolo ta lino bangardo. 9Saia iek pe iek ta stare rigengo, ta saia le bis ta dui sentimetrura pe suako rig. 10Saia pe lete star fisie barrastune but sukar. E purvo fisia saia la iek rubi, iek krisolito ta iek esmeralda, 11e duito fisia iek granate, iek safiro ta iek jade, 12e trito fisia, iek jasinto, iek agata ta iek amatista, 13e starto fisia iek berilo, iek onise ta iek jaspe. E barra sea thode pe kotora sunakune. 14Ta e barra sea desudui pala e desudui anava katar e chaurre katar o Israel. Pe suako barr saia pisime iek anav prema e desudui viche sargo sello.
15Upral po pektoral cherde iek lanchura katar o sunakai lacho, bangarde sargo fisie. 16Ta i cherde dui kotora sunakune, ta dui alkave sunakune, ta thode e alkave pe dui riga upre katar o pektoral. 17Ta e lanchura sunakune thodelen upral katar e dui alkave. 18E dui riga katar e lanchura thodelen upral katar e dui kotora sunakune, ta phanglelen pe kavisura katar o efod katar leki rig angluni. 19Ta i cherde aver dui alkave sunakune ta thodelen pe dui riga tele katar o pektoral pe rig andre pasa o efod. 20Ta cherde ios dui alkave sunakune ta thode len pe rig anglal katar e kavisura katar o efod, pe rig telal pasa o suvdipe ta cherricha upre katar o kavisi katar o efod. 21Mapalal phangle leke alkave pe alkave katar o efod iekhe solea vuneto, te sai achel o pektoral upre katar o kavisi katar o efod ta te na mukliardol o pektoral katar o efod, gia sar phendaia o Del e Moiseseke te cherel.
22Sa o gertachi katar o efod cherdila katar iek khuvdipe iekhe chitetar vuneto. 23E rig truial katar o putardipe po maskaral saia la iek bangardipe sargo e chechermave morchake te na pharradol. 24Ta thode truial katar o gertachi te dikhol sukar granade katar o chiti vuneto, purpura, lolo ta lino bangardo. 25Ta i cherde kanpanille desneto katar o sunakai, ta thodelen maskar e granade truial katar sa o gertachi. 26Iek kanpanilla iek granada, aver kanpanilla ta aver granada truial, gia sar o Del phendaia e Moiseseke te cherel.
27Isto gia cherde e fistanura katar o lino lacho, cherdo katar o lleno kai khuvel, e Aaronoke ta leke chaurrenge. 28Isto gia e mitra katar o lino lacho ta e sostea, cherdelen katar o lino lacho, ta aver ezgode te dikhon sukar. 29O kavisi cherde le katar o lino bangardo, vuneto ta lolo. Saia suvdo but sukar, gia sar o Del phendaia e Moiseseke te cherel.
30Ta i cherde o kotor katar e diadema santa, cherdo desneto sunakuno, ta pe lete pisisarde sargo kai pisilpe pe sellura: Santidad e Devleke. 31Mapalal thode leke iek solo vuneto, te sai thoven o kotor upral katar e mitra, pe rig upre gia sar o Del phendaia e Moiseseke te cherel.
Gotovin o rado te cheren o santuario
Ek 35.10-19
32Gia gotovisarde o rado te cheren o santuario, e chara kai chidiniaon e Devlea. E israelitura cherde gia sar o Del phendaia e Moiseseke te cherel. 33Ta die kai o Moises o santuario e chara kai chidiniaon, ta sa leke ezgode:
Leke ganchura, table, alkave pulsura ta leke riga kai thodon, 34e morcha kai ucharena le cherde katar o bakro singenchar makhle ando lolo, e morcha kai ucharena le cherde katar e morcha katar e tejonura, e kortina kai ucharel e arka, 35e arka katar e alava ta leke pulsura, o propisiatorio, 36o stali ta sa leke ezgode, o marrno kai si dino e Devleke, 37o kandelero desneto sunakuno ta leke lamparille, e lamparille kai saia te aven pe pe thana ta sa leke ezgode, o zeitino te kletosarel, 38o altar sunakuno, o zeitino katar so si dino, o taimano kai khandel sukar, e kortina kai delpe ande chara kai chidiniaon, 39o altar cherdo katar o tuch ta leki rejilla tuchni, leke pulsura ta sa leke ezgode, leko lelleno ta leki rig kai thodol, 40e kortine katar e bar, leke pulsura ta leke riga kai thodon, e kortina katar delpe ande bar, e sole, e chile katar e bar, sa ezgode te sai radilpe ando santuario, e chara kai chidiniaon, 41e patave kai radin lenchar ando santuario, e sante patave e Aaronoke o popo, ta e patave leke chaurrenge, te sai radin ando santuario.
42E israelitura cherde sa sar o Del phendaia e Moiseseke te cherel. 43Ta kana o Moises dikhla kai von cherde le gia, dia len po blagosipe.
Currently Selected:
Eksodo 39: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
