Eksodo 40

O Moises vazdel o santuario

1O Del dia orba e Moisesea ta phenda leke:

2O purvo llive katar o purvo chon morabi te chere te vazden o santuario, e chara kai maladon e Devlea, 3ta ka thove ando santuario e arka katar e alava, ta ka ucharela e chitea. 4Ta thov andre o stali ta o kandelabro, ta lachar sukar o stali ta thov pe lete o kandelabro ta ka phabare leke lampare. 5Ta thov o altar sunakuno e taimanoke angla e a arka katar e alava, ta umblav e kortina katar delpe ando santuario. 6Mapalal thov o altar katar o kurbano katar delpe ande chara kai chidiniaon. 7Mapalal thov o lelleno maskar e chara kai chidiniaon ta o altar ta pher le pai. 8Mapalal phande e bar truial ta umblav e kortina katar delpe ando santuario.

9Mapalal le o zeitino katar so si dino ta chor le po santuario ta pe sa so si ande lete. Gia ka santifiki le sa pe ezgodenchar, ta gia ka avel santo. 10Ta thov zeitino katar so si dino po altar katar o kurbano ta pe sa leke ezgode. Gia ka santifiki o altar, ta gia ka avel iek altar santisimo. 11Ta i thov zeitino po lelleno ta pe rig kai thodol, ta gia ka santifiki le.

12Mapalal inllar e Aarone ta leke chaurren pasa o udar katar e chara kai chidiniaon, ta ka jalave len paiea. 13Ta ka chere o Aaron te thovel pe pe e patave sante. Mapalal ka thove pe lete o zeitino, ta ka santifiki le te sai avel mo popo. 14Mapalal ka chere te aven pase leke chaurre, ta ka thove pe lende e fistanura, 15ta thov zeitino pe lende gia sar cherdan le e Aaronoia te sai aven me popura. Gale zeitinoia kai ka thove pe lende, von ka aven popura ostade sa e bursenchar.

16Ta o Moises cherda sa sar o Del phendaia leke te cherel. 17Gia ando llive purvo katar o purvo chon, ando duito burs, o santuario vazdinailo. 18O Moises cherda te vazden o santuario, ta thoda leke riga te thodol, ta thoda leke table, ta thoda leke kasta, ta vazdia leke pulsura. 19Vazdia e chara upral katar o santuario ta thoda upral ogoia chara, gia sar o Del phendaia te cherel o Moiseseke.

20Mapalal lia e table katar o zakono ta thoda len ande arka katar e alava, mapalal thoda e pulsura e altareke ta thoda upral o propisiatorio upral katar e arka. 21Mapalal thoda e arka ando santuario, ta thoda e kortina buliardi, ta ucharda e arka katar e alava, gia sar o Del phendaia e Moiseseke te cherel.

22Mapalal thoda o stali andre ande chara kai chidiniaon, pe rig katar o norte katar o santuario avri katar e kortina. 23Upral po stali lacharda o marrne angla o Del, gia sar o Del phendaia leke te cherel.

24Ta i thoda o kandelero andre ande chara kai chidiniaon, angla o stali, pe rig katar o sur katar o santuario, 25ta phabarda e lampare angla o Del, gia sar o Del phendaia e Moiseseke te cherel.

26O altar sunakuno thoda le andre katar e chara kai chidiniaon, angla e kortina, 27ta phabarda o taimano kai khandel sukar, gia sar o Del phendaia e Moiseseke te cherel.

28Mapalal o Moises umblada e kortina katar delpe ando santuario. 29Mapalal thoda o altar kai phabardol o kurbano kotar katar delpe ande e chara kai chidiniaon, ta phabarda upral pe lete o kurbano ta so si dino, gia sar o Del phendaia e Moiseseke te cherel.

30O lelleno thoda le maskar e chara kai chidiniaon ta o altar, ta pherda le pai te jalavenpe. 31Ta kotar ikanena pai o Moises ta o Aaron ta leke chaurre te jalaven pe va ta pe porrne. 32Kana dena ande chara kai chidiniaon ta kana avena pasa o altar, jalavenape gia sar o del phendaia e Moiseseke te cheren.

33Ta gotovisarda kana cherda e bar truial katar o santuario ta katar o altar, ta thoda e kortina kotar katar delpe kai e bar. Gia o Moises gotovisarda o rado.

O oblako upral pe chara kai chidiniaon

Nm 9.15-23

34Ondaka iek oblako ucharda e chara kai chidiniaon ta o baripe e Devleko pherda o santuario.#1 R 8.10-11; Is 6.4; Ez 43.4-5; Apo 15.8. 35Ta o Moises nasti dela ande chara kai chidiniaon soke o oblako achiloia upral pe chara, ta o baripe e Devleko pherela o santuario. 36Ta kana o oblako vazdiniaola upre katar o santuario, e israelitura peravena pe chare te laden. 37A te na vazdiniaola upre o oblako, von ni ladena, lligo ni avela o llive kai o oblako vazdiniaola. 38Soke o oblako e Devleko saia ollivesea po santuario ta orachaia saia iek iag upral pe lete angla e akha katar sa israelitura kaigo ladena.#Ek 13.21-22.

Currently Selected:

Eksodo 40: BACHRO

Highlight

Copy